ຫວຽດນາມມອບຜູ້ຕ້ອງຫາສອງຄົນໃຫ້ຈີນ
2018-06-07 15:00:32 cri
ພາຍໃຕ້ການປະສານງານຂອງຫ້ອງການພົວພັນວຽກງານຕຳຫຼວດສະຖານທູດຈີນປະຈຳຫວຽດນາມ, ເຈົ້າໜ້າທີ່ຕຳຫຼວດຫວຽດນາມໄດ້ມອບຜູ້ຕ້ອງຫາ ສອງຄົນທີ່ມີນາມສະກຸນວ່າ ເຊ້ ໃຫ້ເຈົ້າໜ້າທີ່ຕຳຫຼວດຈີນຢູ່ແຂວງຮັງຮວາ ປະເທດຫວຽດນາມໃນຕອນບ່າຍວັນທີ 6 ມິຖຸນານີ້. ຜູ້ຕ້ອງຫາສອງຄົນນີ້ຖືກສົງໄສວ່າໄດ້ກໍ່ອາຊະຍາກຳຢູ່ໃນກຸ່ມແກ້ງຜິດກົດໝາຍແລ້ວໂຕນໜີໄປຫວຽດນາມ.
ຕາມການສືບສວນສອບສວນຂອງເຈົ້າໜ້າທີ່ຕຳຫຼວດຈີນ, ໃນໄລຍະ 10 ກວ່າປີຜ່ານມາ,ກຸ່ມແກ້ງກະທຳຜິດກົດໝາຍທີ່ມີຜູ້ຕ້ອງຫາມີນາມສະກຸນເຊ້ສອງຄົນນີ້ເປັນຫຼັກແຫຼ່ງນັ້ນ ຖືກສົງໄສວ່າໄດ້ກະທຳຜິດກົດໝາຍຕ່າງໆຢູ່ຈີນເປັນຕົ້ນແມ່ນ ທ້າທາຍເກາະຜິດສ້າງຄວາມວຸ້ນວາຍ,ຄ້າຂາຍສິນຄ້າເຖື່ອນ,ທຳລາຍການເລືອກຕັ້ງ,ກັກຂັງຄົນຢ່າງຜິດກົດໝາຍ,ທຳຮ້າຍຮ່າງກາຍຄົນດ້ວຍເຈດຕະນາບໍ່ດີແລະອື່ນໆ ສົ່ງຜົນເຮັດໃຫ້ຜູ້ຖືກເຄາະຮ້າຍສອງຄົນເສຍຊີວິດ ແລະສ້າງຜົນເສຍຫາຍຕໍ່ຄວາມສະຫງົບທາງສັງຄົມຢ່າງຫຼວງຫຼາຍ.
ຫຼັງກໍ່ຄະດີແລ້ວ, ຜູ້ຕ້ອງຫາສອງຄົນນີ້ໄດ້ລັກລອບຂ້າມຊາຍແດນໄປຫວຽດນາມຕາມລຳດັບໃນຕົ້ນປີ 2018 ນີ້. ພາຍໃຕ້ການສະໜັບສະໜູນດ້ານຂໍ້ມູນແລະການປະສານສົມທົບກັນຈົນສຸດຄວາມສາມາດຂອງເຈົ້າໜ້າທີ່ຕຳຫຼວດຈີນ, ຫວ່າງມໍ່ໆນີ້, ເຈົ້າໜ້າທີ່ຕຳຫຼວດຫວຽດນາມໄດ້ປະສົບຜົນສຳເລັດໃນການຈັບກຸມສອງຄົນນີ້ຢູ່ໂຮງແຮມແຫ່ງໜຶ່ງຂອງເມືອງງາຈາງ ແຂວງຮັງຮວາ ທັງຍຶດໄດ້ຂອງກາງສຳຄັນ.
