ຫົວເຫວີຍຈະລົງທຶນ 81 ລ້ານໂດລາສະຫະລັດສະໜັບສະໜູນການສ້າງສະພາບໃໝ່ດ້ານດີຈີຕອນຢູ່ອາຊີຕາເວັນອອກສຽງໃຕ້
ຂ່າວສານຊິນຮວາລາຍງານວ່າ: ກິດຈະກຳ "ວັນ ນະວັດຕະກຳອາຊີປາຊີຟິກຫົວເຫວີຍ"ຄັ້ງທີ 4 ທີ່ກະຊວງວິທະຍາສາດເຕັກໂນໂລຊີໄທແລະບໍລິສັດຫົວເຫວີຍຮ່ວມກັນເປັນເຈົ້າພາບໄດ້ຈັດຂຶ້ນຢູ່ນະຄອນຫຼວງບາງກອກໃນວັນທີ 6 ມິຖຸນານີ້. ບໍລິສັດຫົວເຫວີຍໄດ້ປະກາດໃນກິດຈະກຳນີ້ວ່າ: ໃນ 3 ປີຕໍ່ໜ້າ, ຫົວເຫວີຍຈະລົງທຶນ 81 ລ້ານໂດລາສະຫະລັດເພື່ອສະໜັບສະໜູນພາກພື້ນອາຊີຕາເວັນອອກສຽງໃຕ້ສ້າງສະພາບແວດລ້ອມໃໝ່ດ້ານດີຈີຕອນ.
ທ່ານອູເຫວີຍທ່າວ ຜູ້ອຳນວຍການໃຫຍ່ສຳນັກງານຫົວເຫວີຍປະຈຳອາຊີຕາເວັນອອກສຽງໃຕ້ໃຫ້ຮູ້ວ່າ: ເງິນທຶນກ້ອນນີ້ຈະໃຊ້ໃນການເປີດຫ້ອງທົດລອງ,ໂຄງການຜູ້ພັດທະນາຄລາວ, ການ ສ້າງຊັບພະຍາກອນມະນຸດດ້ານເຕັກນິກຂໍ້ມູນຂ່າວສານແລະການສື່ສານ. ຂະນະດຽວກັນ, ຫົວເຫວີຍຈະຖ່າຍທອດບົດຮຽນດ້ານເຕັກນິກຂໍ້ມູນຂ່າວສານແລະການສື່ສານໃນໄລຍະ 30 ປີຜ່ານມານັ້ນໃຫ້ຄູ່ຮ່ວມມືເພື່ອຊ່ວຍຂະແໜງການດັ່ງກ່າວໃຫ້ເຕີບໂຕຮ່ວມກັນ.
ມື້ດຽວກັນ, ອົງການພັດທະນາວິທະຍາສາດເຕັກໂນໂລຊີແຫ່ງຊາດໄທ, ອົງການປະດິດສ້າງແຫ່ງຊາດໄທແລະບໍລິສັດຫົວເຫວີຍປະຈຳໄທໄດ້ຮ່ວມກັນລົງນາມໃນບົດບັນທຶກວ່າດ້ວຍການຮ່ວມມືດ້ານຍຸດທະສາດທີ່ຫັນໜ້າສູ່ຕະຫຼາດໂລກເພື່ອເພີ່ມທະວີການຮ່ວມມືຄົ້ນຄວ້າປະດິດສ້າງ.
