ກອງປະຊຸມສຸດຍອດກຸ່ມ 7 ປະເທດຈະມີການເຈລະຈາຢ່າງດຸເດືອດ
2018-06-07 16:23:55 cri
ວັນທີ 6 ມິຖຸນານີ້, ທ່ານນາງ ແອງເກວລາ ໂດໂຣຊີ ເມີເຄວ ນາຍົກລັດຖະມົນຕີເຢຍລະມັນໄດ້ກ່າວຢູ່ສະພາເຢຍລະມັນວ່າ: ປະເທດຕົນກັບອາເມລິກາ ແລະປະເທດອື່ນໆມີ "ບັນຫາຢ່າງໜັກໜ່ວງ" ກ່ຽວກັບສັນຍາຫຼາຍຝ່າຍຈຳນວນໜຶ່ງ, ສະນັ້ນ ໃນໄລຍະຈັດກອງປະຊຸມສຸດຍອດກຸ່ມ 7 ປະເທດອາດຈະມີການເຈລະຈາຢ່າງດຸເດືອດ.
ທ່ານນາງຊີ້ໃຫ້ເຫັນວ່າ: ເຢຍລະມັນຈະພະຍາຍາມຮັກສາຄວາມເຫັນເປັນເອກະພາບກັນທີ່ບັນລຸໄດ້ກ່ຽວກັບການຄ້າ, ການປ່ຽນແປງດິນຟ້າອາກາດ ແລະບັນຫາອື່ນໆໃນກອງປະຊຸມສຸດຍອດກຸ່ມ 7 ປະເທດ ແລະກອງປະຊຸມຜູ້ນຳກຸ່ມG20 ໃນປີ 2017, ໂດຍສະເພາະແມ່ນຮັກສາລະບົບການຄ້າຫຼາຍຝ່າຍຢ່າງເປັນທຳ ແລະຕ້ານລັດທິປົກປ້ອງການຄ້າ.
ທ່ານນາງກ່າວຕື່ມວ່າ: ທ່ານຈະດຳເນີນການປຶກສາຫາລືກ່ຽວກັບບັນຫາການຄ້າ ແລະສັນຍານິວເຄຼຍອີຣານກັບທ່ານໂດນັນ ທຣຳ ປະທານາທິບໍດີອາເມລິກາ.
ວັນທີ 8 ຫາວັນທີ 9 ມິຖຸນານີ້, ກອງປະຊຸມສຸດຍອດກຸ່ມ 7 ປະເທດທີ່ຈັດຂຶ້ນປີລະເທື່ອຈະໄຂຂຶ້ນຢູ່ເມືອງເກເບັກປະເທດການາດາ.
