ຂ່າວສານຊິນຮວາລາຍງານວ່າ: ກອງປະຊຸມສະພາມົນຕີອົງການອາຫານແລະການກະເສດສະຫະປະຊາຊາດຫຼືFAOສະໄໝທີ 159 ໄດ້ຈັດຂຶ້ນຢູ່ສຳນັກງານໃຫຍ່ອົງການນີ້ທີ່ຕັ້ງຢູ່ນະຄອນໂຣມປະເທດອີຕາລີ. ຜູ້ຕາງໜ້າຖາວອນປະເທດສະມາຊິກແລະຜູ້ແທນສະພາມົນຕີອົງການFAOປະມານ 300 ທ່ານໄດ້ເຂົ້າຮ່ວມ.
ກອງປະຊຸມຄັ້ງນີ້ມີຫົວຂໍ້ວ່າ "ລຶບລ້າງຄວາມທຸກຍາກກັບຄວາມອຶດຫິວ,ຮັບປະກັນສິດທິສະບຽງອາຫານ". ທ່ານນິວຕຸ້ນ ຜູ້ຕາງໜ້າຖາວອນຂອງຈີນປະຈຳອົງການFAOກ່າວວ່າ: ຈີນຕັ້ງໜ້າເຂົ້າຮ່ວມການຮ່ວມມືສາກົນແລະປະກອບສ່ວນຕາມຄວາມສາມາດຂອງຕົນ ຂະນະດຽວກັນ, ປະເທດຕົນກໍໄດ້ມີການພັດທະນາເຊັ່ນກັນ. ມາເຖິງປັດຈຸບັນ, ຈີນໄດ້ສົ່ງຜູ້ຊ່ຽວຊານແລະເຕັກນິກວິຊາການຫຼາຍກວ່າ 1000 ຄົນໄປອາຟຣິກກາ,ອາຊີ,ມະຫາສະໝຸດປາຊີຟິກໃຕ້,ທະວີບອາເມຣິກາລາຕິນແລະພາກພື້ນກາລາອິບເພື່ອຊ່ວຍເຫຼືອປະເທດໃນພາກພື້ນເຫຼົ່ານີ້ຍົກສູງຄວາມໝັ້ນຄົງດ້ານສະບຽງອາຫານແລະທາດບຳລຸງຂອງປະຊາຊົນ.
ໃນກອງປະຊຸມຄັ້ງນີ້, ຜູ້ຕາງໜ້າຈາກອົງການຈັດຕັ້ງລັດຖະບານຈີນ,ການາ,ເຄນຢາ,ເຊເນການແລະສາທາລະນະລັດຈາດໄດ້ແລກປ່ຽນບົດຮຽນກ່ຽວກັບມາດຕະການລຶບລ້າງຄວາມທຸກຍາກແລະຄວາມອຶດຫິວຂອງແຕ່ລະປະເທດກໍຄືສິ່ງທ້າທາຍທີ່ກຳລັງຜະເຊີນ.
