ທ່ານສີຈິ້ນຜີງແລະທ່ານປູຕີນຊົມການແຂ່ງຂັນຮອກກີນ້ຳກ້າມມິດຕະພາບຊາວໜຸ່ມເຍົາວະຊົນຈີນຣັດເຊຍ
2018-06-09 16:33:12 cri
ຕອນຄ່ຳວັນທີ 8 ມິຖຸນານີ້ ທ່ານສີຈິ້ນຜີງ ປະທານປະເທດຈີນໄດ້ພ້ອມກັບທ່ານປູຕີນ ປະທານາທິບໍດີຣັດເຊຍຮ່ວມກັນຊົມການແຂ່ງຂັນຮອກກີນ້ຳກ້າມມິດຕະພາບຊາວໜຸ່ມເຍົາວະຊົນຈີນຣັດເຊຍຢູ່ນະຄອນທຽນສິນ.
ນັກກິລາຮອກກີນ້ຳກ້າມຊາວໜຸ່ມເຍົາວະຊົນຂອງສອງປະເທດໄດ້ແຂ່ງຂັນກັນຢ່າງຫ້າວຫັນ,ປະມຸກລັດທັງສອງປະເທດໄດ້ຕົບມືເພື່ອສະແດງຄວາມຊົມເຊີຍຕໍ່ການແຂ່ງຂັນຂອງນັກກິລາ. ທ່ານສີຈິ້ນຜີງເວົ້າກັບທ່ານປູຕີນວ່າ, ການແຂ່ງຂັນລະຫວ່າງຊາວໜຸ່ມເຍົາວະຊົນຈີນຣັດເຊຍເຊີດຊູກຳລັງໃຈທີ່ສຸດ, ເຊິ່ງສະແດງໃຫ້ເຫັນມິດຕະພາບຂອງຊາວໜຸ່ມເຍົາວະຊົນສອງຊາດ, ຈີນຍິນດີຮ່ວມກັບຣັດເຊຍ ຊຸກຍູ້ການແລກປ່ຽນແລະການຮ່ວມມືກັນລະຫວ່າງສອງຊາດໃນລາຍການກິລາຕ່າງໆເຊັ່ນຮອກກີນ້ຳກ້າມເປັນຕົ້ນ. ຊາວໜຸ່ມເຍົາວະຊົນສອງຊາດຕ້ອງເພີ່ມທະວີການແລກປ່ຽນກັນ, ເພື່ອຊຸກຍູ້ໃຫ້ການພົວພັນໄມຕີຈິດິດຕະພາບຖານບ້ານໃກ້ເຮືອນຄຽງທີ່ດີລະຫວ່າງຈີນກັບຣັດເຊຍສືບທອດກັນຕະຫຼອດໄປ. ທ່ານປູຕີນກ່າວວ່າ, ການແຂ່ງຂັນຂອງຊາວໜຸ່ມເຍົາວະຊົນສອງຊາດໃນມື້ນີ້ມ່ວນຫຼາຍ, ລາຍການຮອກກີນ້ຳກ້າມຂອງຈີນຈະມີອະນາຄົດທີ່ດີງາມ. ຫວັງວ່າ ລາຍການກິລາຮອກກີນ້ຳກ້າມຊາວໜຸ່ມເຍົາວະຊົນແບບນີ້ສາມາດກາຍເປັນສາຍພານໃໝ່ແຫ່ງມິດຕະພາບສອງຊາດຈີນຣັດເຊຍ.
ທ່ານສີຈິ້ນຜີງແລະທ່ານປູຕີນໄດ້ຂີ່ລົດໄຟຄວາມໄວສູງຈາກນະຄອນຫຼວງປັກກິ່ງໄປນະຄອນທຽນສິນເພື່ອເຂົ້າຮ່ວມກິດຈະການດັ່ງກ່າວ, ທັງເປັນພິຍານການເຊັນເອກະສານຮ່ວມມືສອງຝ່າຍຫຼາຍສະບັບເຊັ່ນທາງລົດໄຟແລະການຂົນສົ່ງສິນຄ້າລະຫວ່າງຈີນກັບຣັດເຊຍເປັນຕົ້ນ.