ກອງປະຊຸມສຸດຍອດອົງການຮ່ວມມືຊຽງໄຮອັດລົງ ໄດ້ຮັບຜົນຢ່າງເຕັມເມັດເຕັມໜ່ວຍ
2018-06-11 16:26:46 cri
ກອງປະຊຸມຄັ້ງທີ 18 ຂອງສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮທີ່ໄຂຂຶ້ນຢູ່ນະຄອນຊິ່ງຕາວແຂວງຊ່ານຕຸ່ງ ສປ ຈີນ ໄດ້ອັດລົງຢ່າງຈົບງາມໃນຕອນບ່າຍວັນທີ 10 ມິຖຸນານີ້. ໃນເວລາເປັນປະທານກອງປະຊຸມເປີດກວ້າງຂອງກອງປະຊຸມສຸດຍອດ, ທ່ານ ສີຈິ້ນຜິງ ປະທານປະເທດຈີນໄດ້ສະເໜີໃຫ້ສົ່ງເສີມ "ຈິດໃຈຊຽງໄຮ" ຕື່ມອີກ ເພື່ອສ້າງປະຊາຄົມຮ່ວມຊາຕາກຳຂອງອົງການຮ່ວມມືຊຽງໄຮ, ເຊິ່ງໄດ້ຮັບການຕອບຮັບຢ່າງອົບອຸ່ນຈາກຜູ້ແທນ, ຜູ້ຊ່ຽວຊານແລະນັກວິຊາການທີ່ເຂົ້າຮ່ວມປະຊຸມ.
ໃນພິທີໄຂກອງປະຊຸມໃນມື້ດັ່ງກ່າວ, ທ່ານ ສີຈິ້ນຜິງ ທີ່ເປັນປະທານຂອງປະເທດໝູນວຽນອົງການຮ່ວມມືຊຽງໄຮ ໄດ້ກ່າວປາໄສທີ່ມີຫົວຂໍ້ວ່າ "ສົ່ງເສີມຈິດໃຈຊຽງໄຮ, ສ້າງປະຊາຄົມຮ່ວມຊາຕາກຳ" ໂດຍຊີ້ວ່າ, ນັບແຕ່ສ້າງຕັ້ງຂຶ້ນເປັນເວລາ 17 ປີມານີ້, ອົງການຮ່ວມມືຊຽງໄຮໄດ້ຜ່ານຂະບວນວິວັດທີ່ບໍ່ທຳມະດາ ແລະໄດ້ຮັບຜົນງານອັນໃຫຍ່ຫຼວງ ຄື: ໄດ້ສ້າງການພົວພັນຄູ່ຮ່ວມໃນລັກສະນະສ້າງສັນທີ່ບໍ່ຮ່ວມກຸ່ມ, ບໍ່ເປັນປໍລະປັກກັນ ແລະບໍ່ມີເຈຕະນາຕໍ່ຝ່າຍທີ 3. ນີ້ແມ່ນທິດສະດີແລະພຶດຕິກຳທີ່ປະດິດສ້າງໃໝ່ຢ່າງໃຫຍ່ຫຼວງໃນການພົວພັນລະຫວ່າງຊາດ ໂດຍໄດ້ສ້າງຮູບແບບໃໝ່ແຫ່ງການຮ່ວມມືໃນພາກພື້ນ ເຊິ່ງເປັນການປະກອບສ່ວນໃໝ່ເພື່ອສັນຕິພາບແລະການພັດທະນາຂອງພາກພື້ນ.
ທ່ານ ດີມີຕຣີ ລູກີຢາງເຊັຟ ອັກຄະລັດຖະທູດຂອງສະຖານທູດຣັດເຊຍປະຈຳຈີນ, ຜູ້ຕາງໜ້າຖາວອນຂອງຣັດເຊຍປະຈຳສຳນັກເລຂາທິການອົງການຮ່ວມມືຊຽງໄຮ ໄດ້ໃຫ້ສຳພາດຕໍ່ນັກຂ່າວ CRI ວ່າ:
"ຄຳປາໄສຂອງທ່ານປະທານ ສີຈິ້ນຜິງ ມີເນື້ອໃນອຸດົມສົມບູນຫຼາຍ ທັງເປັນລະບົບຫຼາຍ. ທ່ານໄດ້ຕີລາຄາແລະໃຫ້ການວິນິດໄສຢ່າງຈະແຈ້ງທີ່ສຸດຕໍ່ສະຖານະການຂອງພາກພື້ນກໍຄືຂອງໂລກ, ທ່ານຍັງໄດ້ວິຈານຢ່າງຖືກຕ້ອງແມ່ນຢຳຕໍ່ການຮ່ວມມືໃນສາມຂົງເຂດສຳຄັນຄື: ການເມືອງ, ຄວາມໝັ້ນຄົງພາກພື້ນ ແລະເສດຖະກິດ ພ້ອມດ້ວຍຂົງເຂດວັດທະນະທຳຂອງອົງການຮ່ວມມືຊຽງໄຮ. ນອກນີ້, ທ່ານປະທານ ສີຈິ້ນຜິງ ຍັງໄດ້ສະເໜີຂໍ້ລິເລີ່ມທີ່ມີຄວາມໝາຍຫຼາຍຈຳນວນໜຶ່ງ. ຂ້າພະເຈົ້າເຊື່ອວ່າ, ຂໍ້ລິເລີ່ມເຫຼົ່ານີ້ ຈະໄດ້ຮັບການສະໜັບສະໜູນຈາກບັນດາປະເທດສະມາຊິກ ແລະຈະໄດ້ຮັບການປະຕິບັດຕົວຈິງ."
ຕໍ່ເລື່ອງນີ້, ທ່ານ ອຳຈັດ ອັບບັສ ຫົວໜ້າຄະນະການເມືອງມະຫາວິທະຍາໄລພູນຈັບປາກີສະຖານ ເຫັນວ່າ, ທັດສະນະກ່ຽວກັບປະຊາຄົມຮ່ວມຊາຕາກຳຂອງອົງການຮ່ວມມືຊຽງໄຮ ມີຄວາມໝາຍຊີ້ນຳນຳພາຕໍ່ການຮ່ວມມືລະຫວ່າງປະເທດສະມາຊິກໃນອະນາຄົດ. ທ່ານ ກ່າວວ່າ:
"ໃນໂອກາດກ່າວປາໄສ, ທ່ານປະທານ ສີຈິ້ນຜິງ ໄດ້ເນັ້ນເຖິງຕ່າງຝ່າຍຝ່າຍໄດ້ຮັບຜົນປະໂຫຍດແລະການຊົມໃຊ້ຮ່ວມກັນ, ປະເທດສະມາຊິກຄວນປະລະຄວາມຂັດແຍ້ງກັນ, ເຮັດໃຫ້ການພັດທະນາສ້າງຜົນປະໂຫຍດໃຫ້ແກ່ທຸກໆປະເທດໃນພາກພື້ນຕົນ. ນອກນີ້, ໃນຂົງເຂດຕໍ່ຕ້ານການກໍ່ການຮ້າຍ, ບໍ່ມີປະເທດໃດສາມາດເອົາຕົວລອດໄດ້, ທຸກປະເທດມີແຕ່ເພີ່ມທະວີຄວາມສາມັກຄີແລະການປະສານງານກັນເທົ່ານັ້ນ ຈຶ່ງຈະສາມາດບັນລຸສະຖຽນລະພາບແລະການພັດທະນາຢ່າງຖາວອນໄດ້. ຂ້າພະເຈົ້າເຫັນວ່າ, ການທີ່ທ່ານ ສີຈິ້ນຜິງ ກ່າວເຖິງແຜນການພັດທະນາຂອງອົງການຮ່ວມມືຊຽງໄຮໃນອະນາຄົດນັ້ນ ແມ່ນມີຄວາມໝາຍເລິກເຊິ່ງຍາວນານ."
ທ່ານ ກາວທາມ ບາມບາວາເລ ເອກອັກຄະລັດຖະທູດອິນເດຍປະຈຳຈີນໄດ້ໃຫ້ສຳພາດຕໍ່ນັກຂ່າວວິທະຍຸ CRI ວ່າ, ບົດປາໄສຂອງທ່ານປະທານ ສີຈິ້ນຜິງ ໄດ້ຊີ້ທິດເຍືອງທາງໃຫ້ແກ່ການພັດທະນາຂອງອົງການຮ່ວມມືຊຽງໄຮໃນອະນາຄົດ, ອິນເດຍຫວັງວ່າຈະເສີມຂະຫຍາຍບົດບາດຍິ່ງໃຫຍ່ກວ່າເກົ່າພາຍໃນຂອບອົງການຮ່ວມມືຊຽງໄຮ. ທ່ານກ່າວວ່າ:
"ເທື່ອນີ້ເປັນເທື່ອທຳອິດທີ່ອິນເດຍເຂົ້າຮ່ວມກອງປະຊຸມສຸດຍອດອົງການຮ່ວມມືຊຽງໄຮໃນນາມປະເທດສະມາຊິກທາງການ. ໃນໜຶ່ງປີຜ່ານມາ, ອິນເດຍໄດ້ປະກອບສ່ວນຂອງຕົນເຂົ້າໃນຂົງເຂດຄວາມໝັ້ນຄົງ, ການຕ້ານການກໍ່ການຮ້າຍ, ການພັດທະນາເສດຖະກິດ, ການແລກປ່ຽນວັດທະນະທຳ ແລະຂົງເຂດອື່ນໆທີ່ອົງການຮ່ວມມືຊຽງໄຮສົນໃຈທີ່ສຸດ, ໃນອະນາຄົດ, ບໍ່ຕ້ອງສົງໄສເລີຍວ່າ, ອິນເດຍຕ້ອງເສີມຂະຫຍາຍບົດບາດຍິ່ງໃຫຍ່ກວ່າເກົ່າຢ່າງແນ່ນອນ."
