ຮູບ​ປັ້ນມ້າ​ຂີ່​ນົກ​ແອ່ນ​ບິນ

中国国际广播电台


         ທັງ​ເອີ້ນວ່າ”ມ້າ​ທອງແລ່ນ​”,​ຫຼໍ່​ດ້ວຍ​ທອງ​ສຳ​ລິດ,ສູງ 34,5 ຊັງ​ຕີ​ແມັດ,ຍາວ 45 ​ຊັງ​ຕີແມັດ,ກວ້າງ 10 ຊັງຕີ​ແມັດ,ຜະລິດ​ໃນ​ສະ​ໄໝ​ລາຊະວົງ​ຕົງ​ຮ້ານ,ຂຸດ​ອອກ​ຈາກ​ສຸສານ​ອູ​ເວ່​ເລ​ໄທ​ຂອງ​ແຂວງ​ການ​ຊູ່,ປັດຈຸບັນ ​ເກັບ​ຮັກສາ​ຢູ່​ຫໍພິພິດທະ​ພັນ​ແຂວງ​ການ​ຊູ່.

ມ້າ​​ແລ່ນ​ໄວແມ່ນ​ພາຫະນະ​ທີ່​ວ່ອງ​ໄວ​ແລະ​ບັງ​ເກີດ​ຜົນ​ກວ່າ​ໝູ່​ໃນ​ການ​ສູ້​ລົບ,ຂົນ​ສົ່ງ​ແລະ​ສື່ສານ​ໃນ​ສະ​ໄໝ​ບູຮານ​ຂອງ​ຈີນ,ທະຫານ​ມ້າ​ທີ່​ເຂັ້ມ​ແຂງ​ກໍ​ແມ່ນ​ເງື່ອນ​ໄຂ​ການ​ທະຫານ​ທີ່​ຂາດ​ເຂີນ​ບໍ່​ໄດ້​ໃນ​ການ​ຕ້ານ​ການ​ຮຸກ​ຮານ​ຂອງ​ເຜົ່າ​ຊົ່ງນູ​ແລະ​ຮັກສາ​ຄວາມ​ສະຫງົບ​ຂອງ​ເຂດ​ພາກ​ເໜືອ​ຂອງ​ລາ​ຊະ​ວົງ​ຮ້ານ,ສະນັ້ນ ຄົນ​ໃນ​ລາ​ຊະ​ວົງ​ຮ້ານ​ມັກ​ມ້າ​ລື່ນ​ກາຍ​ລາຊະວົງ​​ໃດໆ,​ແລະ​ຖື​ມ້າ​ເປັນ​ສັນຍະລັກ​​ໃຫ້​ແກ່ກຽດສັກ​ສີ​ຂອງ​ຊາດ,ກຳລັງ​ເຂັ້ມ​ແຂງຂອງ​ຊາດ​ແລະ​ຄຸນ​ງາມຄວາມ​ດີ​ວີລະ​ກຳ. ດັ່ງນັ້ນ ຮູບຊົງ​ມ້າ​ຢ່າງຫຼວງຫຼາຍ​ໄດ້​ປະກົດ​ຕົວ​ໃນ​ຮູບປັ້ນ​ແລະ​ເຄື່ອງ​ສິລະ​ປະ​ໃນ​ລາ​ຊະ​ວົງ​ຮ້ານ,​ໃນ​ນັ້ນ ສິ່ງ​ທີ່​ເຮັດ​ໃຫ້​ຄົນ​ຍ້ອງຍໍ​ກວ່າ​ໝູ່​ກໍ​ແມ່ນ​ຮູບ​ປັ້ນ”ມ້າ​ຂີ່​ນົກ​ແອ່ນ​ບິນ”ທີ່​ມີ​ຊື່​ສຽງ​ໃນ​ໂລກ.

ມ້າ​ທີ່​ພວມ​ແລ່ນ​ໄວ​ໂຕ​ນີ້​ມີ​ທ່າ​ທາງ​​ເຂັ້ມ​ແຂງ,ມັນ​ເງີຍ​ໜ້າ​ແກວ່ງ​ຫາງ,ຫົວ​ອຽງ​ໄປ​ຊ້າຍ​ໜ້ອຍ​ໜຶ່ງ,ສາມ​ຂາ​ໂຍງ​ຂຶ້ນ,ມີ​ແຕ່​ຂາຫຼັງຂວາ​ຢືນ​ຢູ່ຫຼັງນົກ​ແອ່ນ​ທີ່ພືປີກ​ບິນ​​ໄວ​ປານ​ລົມ. ຮູບຮ່າງ​ເຂັ້ມ​ແຂງ​ລ້ຳສັນ​ຂອງ​ມ້າ​​ໄດ້​ສະ​ແດງ​ໃຫ້​ເຫັນ​ກຳລັງ​ອັນ​ແຂງ​ແຮງຂອງ​ມັນ,​ແຕ່​ກິລິຍາ​ຂອງ​ມັນຊ້ຳ​ພັດຄ່ອງ​ແຄ້ວ​ປານ​ນີ້,ຈົນກະທັ້ງຄົນ​ທັງຫຼາຍ​ໄດ້​ລືມ​ແລ້ວ​ວ່າ​ມັນ​ມີ​​ແຕ່​ໃຊ້​ຕີນ​​ດຽວ​,​ເອົາ​ນ້ຳໜັກ​ໝົດ​​ໂຕ​ໄວ້​ຢູ່ຫຼັງນົກ​ແອ່ນ​ທີ່​ນ້ອຍໆ.

ຮູບ​ປັ້ນ”ມ້າ​ຂີ່​ນົກ​ແອ່ນ​ບິນ”​ແມ່ນ​ຫົວ​ກະທິຂອງ​ນັກ​ສິລະ​ປິນລາຊະວົງ​ຮ້ານ​ທີ່​ເຮັດ​ໃຫ້ສະຕິ​ປັນຍາລະດັບ​ສູງ,ຈິນຕະນາການ​ອັນ​ອຸດົມສົມບູນ,ນ້ຳ​ໃຈ​ໂລ​ມັງ​ຕິກ​ແລະ​ຝີ​ມື​ສິລະ​ປະ​ທີ່​ຍອດ​ຢ້ຽມ​ປະສານ​ກັນ,​ແມ່ນ​ມິ່ງຂວັນ​ທີ່​ມີ​ໜ້ອຍ​ໃນ​ດ້ານ​ສິລະ​ປະ​ປັ້ນຮູບ​ໃນ​ສະ​ໄໝ​ບູຮານ​ຂອງ​ຈີນ.