ສະພາບການ​ຂຸດ​ລົດ​ມ້າ​ທອງ​ໃນ​ສຸສານ​ຊິນ​ສີ​ຮົງ​ເຕ

中国国际广播电台

           ໃນ​ປີ 1980 ພາຍຫຼັງຄົ້ນພົບ​ຮູບ​ປັ້ນທະຫານ​ແລະ​ມ້າ​ໃນ​ສຸສານ​ຊິນ​ສີ​ຮົງ​​ເຕ 6 ປີ​ແລ້ວ,ພະນັກງານ​ບູຮານ​ນະ​ຄະດີ​ຂອງ​ຈີນ​ກໍ​ໄດ້​ຄົ້ນພົບ​ລົດ​ມ້າ​ທອງ​ໃນ​ສຸສານ​ຊິນ​ສີ​ຮົງ​ເຕອີກ,ການ​ຄົ້ນພົບ​ດັ່ງ​ກ່າວ​ໄດ້​ບັນລື​ໂລກ​ອີກ​ເທື່ອ​ໜຶ່ງ.

ຜູ້​ທີ່​ຄົ້ນພົບ​ມິ່ງຂວັນ​ແຫ່ງ​ຊາດ​ດັ່ງກ່າວກ່ອນ​ໝູ່​ແມ່ນ​ທ່ານ​ຢາງ​ຊີ້​ເຕີ ພະນັກງານ​ບູຮານ​ນະ​ຄະດີ. ​ໃນ​ຄາວ​ນັ້ນ ທ່ານ​ພວມ​ເຈາະຢັ່ງ​ແທກ,ທັນ​ໃດ​ນັ້ນ ​ໄດ້​ເຫັນ​ຝອດ​ຄຳ​ທີ່​ໃຫຍ່​ສ່ຳ​ນິ້ວມື​ທີ່​ຫົວ​ເຈາະ​ນຳ​ອອກມາ​ຈາກ​ບ່ອນ​ເລິກ 7 ​ແມັດ. ​ໃນ​ເວລາ​ທ່ານ​ມອບ​ຝອດ​ຄຳ​ໃຫ້​ທ່ານ​ເຊີງ​ເຊຍ​ຮວາ ຜູ້​ບັນຊາ​ການ​ຢູ່​ກັບ​ບ່ອນ​ນັ້ນ ທ່ານ​ເຊີງ​ເຊຍ​ຮວາ​ຕື້ນ​ຕັນ​ໃຈ​ຈົນ​ມື​ສັ່ນ. ທ່ານ​ຮູ້​ວ່າ,ລົດ​ມ້າ​ທອງ​ທີ່​ຄົນ​ທັງຫຼາຍ​ຊອກ​ຫາ​ຢ່າງ​ລຳບາກ​ນັ້ນ​ໄດ້
ຊອກ​ພົບ​ແລ້ວ.

ພາຍ​ໃຕ້​ການ​ຊີ້​ນຳ​ຂອງ​ຜູ້​ຊ່ຽວຊານ,ວຽກ​ງານ​ຂຸດ​ໄດ້​ດຳ​ເນີນ​​ໄປຢ່າງ​ສຸຂຸມ​ຮອບ​ຄອບ, ​ເມື່ອ​ໄດ້​ຂຸດ​ເປັນ​ເວລາ​​ເກືອບ​ໜຶ່ງ​ເດືອນ,​ເລື່ອງ​ອັດສະຈັນ​ໄດ້​ປະກົດ​ອອກ​ມາ​​ໃນ​ທີ່​ສຸດ. ຢູ່​ບ່ອນ​ໃຕ້​ດິນ 7,8 ​ແມັດ,​ໄດ້​ມີ​ລົດ​ທອງ​ສອງ​ຄັນ,ມ້າ​ທອງ 8 ​ໂຕ​ແລະຜູ້​ຂັບ​ລົດ​ມ້າທອງ​ສອງ​ຄົນ​ໄດ້​ປະກົດ​ອອກ​ມາ.

ຫຼັງຈາກ​ລົດ​ມ້າ​ທອງ​ປະກົດ​ອອກ​ມາ​ແລ້ວ,ຈະ​ເອົາ​ມັນ​ອອກມາ​ແນວ​ໃດ? ຜູ້​ຊ່ຽວຊານ​ກໍ​ໄດ້​ຄິດຢ່າງ​ສຸຂຸມ​ຮອບ​ຄອບ. ພວກ​ເພິ່ນ​ໄດ້​ຂຸດຮ່ອງທີ່​ເລິກ 10 ​ແມັດ​ຢູ່​ອ້ອມ​ຂ້າງ​ລົດ​ມ້າ​ທອງ,​ແລ້ວ​ໃຊ້​​ແປ້ນ​ໄມ້​ອ້ອມ​ລົດ​ມ້າ​ທອງ​ພ້ອມ​ດ້ວຍ​ດິນ​ທີ່​ໜາ​ແມັດ​ກວ່າ,ປະກອບ​ເປັນ​ຫີບ​ໄມ້​ຂະໜາດ​ໃຫຍ່ 4 ຫີບ. ຫຼັງຈາກ​ນັ້ນ ​ໃຊ້​ເຄື່ອງ​ຍົກຍົກ​ເອົາ​ປຸ້ງກິ໋​ເຫຼັກກ້າ​​ໃຫຍ່​ພິລຶກ​ທີ່​ເຮັດ​ເປັນ​ພິ​ເສດ​ໄວ້​ຢູ່​ໃນຂຸມ,​ໃຊ້​ກິກລົດດັນປຸ້ງກິ໋​ເຫຼັກກ້າ​ເຂົ້າທາງລຸ່ມ​ຂອງ​ລົດ​ມ້າ​ທອງ​ໄປເທື່ອ​ລະ​ເລັກ​ເທື່ອ​ລະ​ໜ້ອຍ,​ເຮັດ​​ໃຫ້​ຫີບ​ໄມ້​ທັງໝົດ​ເຂົ້າ​ໃນ​ປຸ້ງກິ໋,​ໃນ​ທີ່​ສຸດ,​ໄດ້​ໃຊ້​ເຄື່ອງ​ຍົກ​ຍົກ​​ເອົາຫີບໄມ້ທີ່​ອ້ອມ​ລົດ​ມ້າ​ທອງ​ນັ້ນ​ໄວ້​ໃນ​ລົດ​ບັນທຸກ,​ແລ້ວ​ຂົນ​ໄປ​ຫໍ​ວາງສະ​ແດງ​ຮູບ​ປັ້ນທະຫານ​ມ້າ​ຊິນ​ສີ​ຮົງ​ເຕຢ່າງ​ລະມັດລະວັງ​ທີ່​ສຸດ.

ວຽກ​ງານຊຳລະ​ສ້ອມ​ແປງ​ລົດ​ມ້າທອງແມ່ນ​ດຳ​ເນີນ​ຢູ່​ໃນ​ຫໍວາງສະ​ແດງ​ຮູບ​ປັ້ນ​ທະຫານ​ມ້າ​ຊິນ​ສີ​ຮົງ​ເຕ,​ເມື່ອ​ໄດ້​ສ້ອມ​ແປງ​ເກືອບ​ສອງ​ປີ​ແລ້ວຈຶ່ງ​ໄດ້​​ເອົາ​ມາວາງສະ​ແດງ​ຢ່າງ​ເປີດ​ເຜີຍ,ພໍ​​ໄດ້​ວາງສະ​ແດງ​ລົດ​ມ້າ​ທອງ​ກໍ​ໄດ້​ສະ​ເທືອ​ນ​ທົ່ວ​ໂລກ.

    ລົດ​ມ້າ​ທອງ​ໃຫຍ່​ສ່ຳ 1 ສ່ວນ 2 ຂອງລົດ​ມ້າແທ້,​ໄດ້ອອກ​ແບບ​ຢ່າງ​ພຽນ​ໃຈ,​ເຮັດ​ຢ່າງ​ປານີດ,ມີກຳມະ​ວິທີ​ຍອດ​ຢ້ຽມ,ບໍ່​ມີ​ອັນ​ປຽບ​ໄດ້. ກຳມະ​ວິທີ​ເຮັດ,ບາງ​ອັນ​ຈົນ​ຮອດ​ປັດຈຸບັນ​ຍັງ​ໃຊ້​ຢູ່,ບາງ​ອັນ​ຍັງ​ບໍ່​ທັນ​ຮູ້​​ເທື່ອ.