ຕິດຕາມສະພາບການຢູ່ແຂວງອັດຕະປືຫຼັງເກີດອຸບັດເຫດເຂື່ອນໄຟຟ້າແຕກ
cri2018-07-30 16:49:22
ຕາມຂ່າວCRI: ຕອນຄ່ຳວັນທີ 23 ກໍລະກົດນີ້, ເຂື່ອນໄຟຟ້າເຊປຽນ-ເຊນ້ຳນ້ອຍແຂວງອັດຕະປືແຕກ, ເຮັດໃຫ້ເກີດຄວາມເສຍຫາຍດ້ານຊີວິດ ແລະ ຊັບສິນຢ່າງໜັກໜ່ວງ. ນັກຂ່າວ CRI ໄດ້ມຸ່ງໜ້າໄປສູ່ເຂດປະສົບໄພ ເພື່ອຕິດຕາມການຊ່ວຍເຫຼືອກູ້ໄພ.
ຕອນຄ່ຳວັນທີ 23 ກໍລະກົດນີ້, ເຂື່ອນໄຟຟ້າເຊປຽນ-ເຊນ້ຳນ້ອຍແຂວງອັດຕະປືແຕກ ເຮັດໃຫ້ຫຼາຍບ້ານຂອງເມືອງສະໜາມໄຊແຂວງອັດຕະປືຖືກນ້ຳຖ້ວມ ແລະ ເຮັດໃຫ້ປະຊາຊົນ 1 ໝື່ນກວ່າຄົນບໍ່ມີທີ່ຢູ່ອາໄສ.
5 ມື້ຜ່ານໄປແລ້ວ, ສະພາບການໃນເຂດປະສົບໄພຢູ່ເມືອງສະໜາມໄຊດີຂຶ້ນເທື່ອລະກ້າວ. ປັດຈຸບັນ, ມີຜູ້ປະສົບໄພ 7.324 ຄົນໄດ້ຮັບການຈັດສັນຢ່າງເປັນລະບຽບຮຽບຮ້ອຍ.
ປະຊາຊົນຜູ້ປະສົບໄພພັກເຊົາຢູ່ສູນບັນເທົາທຸກ
ພໍ່ຕູ້ສິດ ແລະ ຄອບຄົວພັກຢູ່ສູນບັນເທົາທຸກໂຮງຮຽນປະຖົມເມືອງສະໜາມໄຊ. ທ່ານໄດ້ບອກນັກຂ່າວວ່າ: ຕອນຄ່ຳວັນທີ 23 ກໍລະກົດນີ້, ພໍ່ຕູ້ກັບເມຍພວມມ້ຽນເຄື່ອງຫາປາໃນເຮືອນ ແລະ ກຽມຈະກິນເຂົ້າ, ເຫັນນ້ຳໄຫຼເຂົ້າເຮືອນ, ເລີຍມ້ຽນເຄື່ອງຂອງໄປຊັ້ນ 2, ນ້ຳຫຼັ່ງໄຫຼເຂົ້າເຮືອນບໍ່ຂາຍສາຍ. ບໍ່ພໍເທົ່າໃດ, ນ້ຳໃນເຮືອນກໍສູງເຖິງແມັດປາຍແລ້ວ. ພໍ່ຕູ້ຫຼຽວເຫັນເຮືອນທາງຂ້າງຖືກນ້ຳເຊາະພັງລົງ, ພໍ່ຕູ້ແລະເມຍຮູ້ສຶກຢ້ານກົວ. ພໍດີຫຼານຂອງພໍ່ຕູ້ໄດ້ພາຍເຮືອເຂົ້າມາ, ສອງຜົວເມຍໄດ້ຂຶ້ນເຮືອ. ແຕ່ນ້ຳແຮງໂພດ, ເຮືອນ້ອຍຈຳເປັນຕ້ອງລອຍໄປຕາມກະແສນ້ຳ. ລອຍໄປໄດ້ໄລຍະໜຶ່ງ, ພໍ່ຕູ້ໄດ້ດຶງເມຍປີນຂຶ້ນຫຼັກເສົາໄຟຟ້າ. ລໍຖ້າເປັນເວລາໜຶ່ງມື້, ເຈົ້າໜ້າທີ່ຊ່ວຍເຫຼືອໄດ້ມາຊ່ວຍເຫຼືອພໍ່ຕູ້ກັບເມຍ ແລະ ສົ່ງພວກຕົນມາຮອດສູນບັນເທົາທຸກ. ພໍ່ຕູ້ສິດກ່າວວ່າ, ເຮືອນພັງແລ້ວ, ເຄື່ອງຂອງໃນເຮືອນກໍບໍ່ມີແລ້ວ. ສິ່ງທີ່ພໍ່ຕູ້ຄິດຢາກໄດ້ທີ່ສຸດກໍແມ່ນສາມາດກັບບ້ານໂດຍໄວ ແລະ ເລີ່ມສ້າງບ້ານແປງເຮືອນຄືນໃໝ່ຫຼັງໄພພິບັດ.
ພໍ່ຕູ້ສິດເວົ້າວ່າ, ລັດຖະບານລາວໃຫ້ຄວາມສຳຄັນຫຼາຍຕໍ່ວຽກງານກູ້ໄພ, ໄດ້ດຳເນີນການຊ່ວຍເຫຼືອຢ່າງຕັ້ງໜ້າ, ມື້ໃດກໍໄດ້ເຫັນຜູ້ປະສົບໄພຖືກຊ່ວຍເຫຼືອແລະສົ່ງໄປສະຖານທີ່ປອດໄພ. ຢູ່ສະຖານທີ່ປອດໄພ, ໄດ້ແຈກຢາຍເສື້ອຜ້າ, ສາດ, ຜ້າຫົ່ມແລະເຄື່ອງໃຊ້ໃນຊີວິດປະຈຳວັນອື່ນໆ, ຍັງສະໜອງອາຫານມື້ລະ 3 ຄາບ. ປັດຈຸບັນ, ເກືອບທຸກມື້ໄດ້ເຫັນວິສາຫະກິດແລະອາສາສະໝັກຕ່າງປະເທດມາຊ່ວຍເຫຼືອ ແລະບໍລິຈາກເຄື່ອງຊ່ວຍເຫຼືອໃຫ້ເຂດປະສົບໄພ. ພໍ່ຕູ້ສິດກ່າວວ່າ: “ຂອບໃຈການຊ່ວຍເຫຼືອທີ່ບໍ່ເຫັນແກ່ຕົວຂອງຄົນທັງຫຼາຍ, ນີ້ເປັນການໃຫ້ກຳລັງໃຈໃນການດຳລົງຊີວິດຂອງຂ້າພະເຈົ້າ.” ພາບນີ້ຄືປະຊາຊົນຜູ້ປະສົບໄພຮັບເອົາອາຫານຢູ່ສະຖານທີ່ປອດໄພ.
ປະຊາຊົນຜູ້ປະສົບໄພປິ່ນປົວຢູ່ໂຮງໝໍສະໜາມໄຊ ຢ່າງຫຼວງຫຼາຍ. ໜ່ວຍແພດປ້ອງກັນພະຍາດລະບາດຂອງ “ຂະບວນລົດໄຟສັນຕິພາບ” ກອງທັບປົດປ່ອຍປະຊາຊົນຈີນ ກໍໄດ້ປະຈຳຢູ່ໂຮງໝໍດັ່ງກ່າວ. ເຂົາເຈົ້າໄດ້ຊ່ວຍທ່ານໝໍລາວເຮັດວຽກປິ່ນປົວ, ພ້ອມທັງສົ່ງຈຸແພດປິ່ນປົວແລະປ້ອງກັນພະຍາດລະບາດໄປດຳເນີນວຽກງານຢູ່ສະຖານທີ່ປອດໄພ 6 ແຫ່ງ.
ແມ່ຕູ້ມຽນອາຍຸ 65 ປີ ໄດ້ຮັບການປິ່ນປົວຢູ່ໂຮງໝໍສະໜາມໄຊ. ໃນເວລາເກີດນ້ຳຖ້ວມ, ຫຼານຊາຍກົກອາຍຸ 17 ປີ ໄດ້ຍູ້ເພິ່ນຂຶ້ນຫຼັງຄາເຮືອນ, ແຕ່ເຮືອນເພິ່ນບໍ່ສາມາດຮັບກະແສນ້ຳຖ້ວມທີ່ໄຫຼແຮງຈົນພັດເອົາເຮືອນໄປ, ແມ່ຕູ້ມຽນຈຳເປັນຕ້ອງຢູ່ເທິງຫຼັງຄາເຮືອນທີ່ລອຍໄປກັບນ້ຳ. ມື້ຕໍ່ມາ, ເພິ່ນໄດ້ຮັບການຊ່ວຍເຫຼືອ ແລະຖືກສົ່ງໄປໂຮງໝໍສະໜາມໄຊ. ແຕ່ຫຼານຊາຍນ້ອຍທີ່ມີອາຍຸ 7 ປີຂອງແມ່ຕູ້ມຽນ ໄດ້ຫາຍສາບສູນໄປຈົນຮອດປັດຈຸບັນ.
ແມ່ຕູ້ມຽນເວົ້າວ່າ, ທຸກມື້ ກໍມີທ່ານໝໍຈີນມາກວດກາຫ້ອງຄົນເຈັບ. ເຖິງວ່າບໍ່ເຂົ້າໃຈພາສາເພີ່ນເວົ້າຫຍັງກໍຕາມ, ແຕ່ແມ່ຕູ້ສາມາດຮູ້ສຶກໄດ້ເຖິງຝີມືປິ່ນປົວທີ່ເກັ່ງແລະຄວາມເອົາໃຈໃສ່ທີ່ລະອຽດປານີດຂອງທ່ານໝໍຈີນ. ແມ່ຕູ້ຮູ້ສຶກຂອບໃຈຫຼາຍຕໍ່ທ່ານໝໍຈີນ. ພາບນີ້ຄືທ່ານ ເຊີນຈ່າງ ຫົວໜ້າຈຸແພດຈີນກຳລັງກວດພະຍາດໃຫ້ແມ່ຕູ້.
ຜູ້ປະສົບໄພຜູ້ໜຶ່ງຖືຢາທີ່ໜ່ວຍແພດ “ຂະບວນລົດໄຟສັນຕິພາບ”ສະໜອງໃຫ້
ພາບ 10: ຫຼັງຈາກເກີດເຫດການເຂື່ອນໄຟຟ້າແຕກແລ້ວ,ໜ່ວຍກູ້ໄພຫຼາຍໜ່ວຍຂອງຈີນໄດ້ເດີນທາງໄປກູ້ໄພແລະຊ່ວຍເຫຼືອຢ່າງຮີບດ່ວນ. ທ່ານ ວາງປິ່ນ ຫົວໜ້າໜ່ວຍກູ້ໄພແກະຜູ້ຂອງອົງການສາທາລະນະປະໂຫຍດພື້ນເມືອງແຂວງເຈີ້ຈ່ຽງບອກໃຫ້ນັກຂ່າວຮູ້ວ່າ,ໜ່ວຍແພດຕົນໄດ້ຊອກຮູ້ສະພາບເຂດປະສົບໄພໂດຍຜ່ານຊາວແຂວງເຈີ້ຈ່ຽງຈີນຢູ່ລາວກ່ອນຈະອອກເດີນທາງໄປເຂດປະສົບໄພ ແລະໄດ້ນຳເອົາອຸປະກອນວິຊາການເພື່ອຊ່ວຍເຫຼືອຕິດມືໄປນຳຈຳນວນບໍ່ໜ້ອຍ.
ໜ່ວຍກູ້ໄພແກະຜູ້ດຳເນີນການກູ້ໄພແລະຊ່ວຍເຫຼືອຢູ່ເຂດປະສົບໄພ
ບໍລິສັດຈີນຢູ່ລາວຫຼາຍແຫ່ງບໍລິຈາກເງິນແລະເຄື່ອງຊ່ວຍເຫຼືອຢ່າງຕັ້ງໜ້າ,ເພື່ອສະແດງນ້ຳໃຈຮັກແພງຂອງຕົນຕໍ່ປະຊາຊົນຢູ່ເຂດປະສົບໄພຂອງແຂວງອັດຕະປື. ທີມເຕັກໂນໂລຊີຮັບມືສຸກເສີນບໍລິສັດດາວທຽມລາວໄດ້ນຳເອົາອຸປະກອນໂທລະຄົມຜ່ານດາວທຽມສຸກເສີນໄປເຂດປະສົບໄພ ເພື່ອຮັບປະກັນວຽກງານໂທລະຄົມແລະການສົ່ງສັນຍານໂທລະພາບຢູ່ເຂດດັ່ງກ່າວ.
ບໍລິສັດດາວທຽມລາວບໍລິຈາກໂທລະພາບຜ່ານດາວທຽມງວດໜຶ່ງ,ເພື່ອໃຫ້ປະຊາຊົນຢູ່ເຂດປະສົບໄພສາມາດເບິ່ງໂທລະພາບແລະຮູ້ຂໍ້ມູນຂ່າວສານຈາກພາຍນອກໄດ້,ແລະຊ່ວຍຜ່ອນຄາຍຄວາມເຄັ່ງຕຶງຂອງເຂົາເຈົ້າ.
ບໍລິສັດຫົວເຫວີຍຈີນໄດ້ສົ່ງທີມລົດກູ້ໄພຢ່າງທັນເວລາ ສົ່ງເຄື່ອງຊ່ວຍເຫຼືອໄປໃຫ້ປະຊາຊົນຢູ່ເຂດປະສົບໄພ.
