ເຂດກວາງຊີເລັ່ງພັດທະນາການຄ້າເອເລັກໂຕຣນິກຂ້າມຊາດທີ່ຫັນໜ້າສູ່ອາຊຽນ
CRI2018-09-05 15:57:32
ທ່ານສີວ໌ຈິນ ຮອງຫົວໜ້າພະແນກການຄ້າເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ກ່າວໃນວັນທີ 4 ກັນຍານີ້ວ່າ: ກວາງຊີ ຈະໃຊ້ມາດຕະການຕ່າງໆ ເຊັ່ນ: ສ້າງຖານການຄ້າເອເລັກໂຕຣນິກຂ້າມຊາດຈີນ-ອາຊຽນ, ດຶງດູດວິສາຫະກິດການຄ້າເອເລັກໂຕຣນິກຂ້າມຊາດມາສ້າງຕັ້ງສາຂາຢູ່ກວາງຊີ, ສ້າງຕັ້ງສຳນັກງານໃຫຍ່ການຄ້າເອເລັກໂຕຣນິກທີ່ຫັນໜ້າສູ່ອາຊຽນ ແລະອື່ນໆ ເພື່ອເລັ່ງລັດການພັດທະນາການຄ້າເອເລັກໂຕຣນິກຂ້າມຊາດຈີນ-ອາຊຽນ.
ພິທີຖະແຫຼງຂ່າວການສົ່ງເສີມການສ້າງເຂດກວາງຊີດີຈີຕອນໄດ້ຈັດຂຶ້ນໃນວັນດັ່ງກ່າວຢູ່ນະຄອນໜານໜິງ ເທດສະບານເຂດກວາງຊີ, ທ່ານ ສີວ໌ຈິນ ໄດ້ຖະແຫຼງວ່າ: ໃນຊຸມປີຜ່ານມາ, ການຄ້າເອເລັກໂຕຣນິກຢູ່ກວາງຊີ ໄດ້ມີການພັດທະນາຢ່າງວ່ອງໄວ ແລະ ກາຍເປັນພະລັງໃໝ່ໃນການຊຸກຍູ້ຂະແໜງການບໍລິການກໍຄືເສດຖະກິດເຂດກວາງຊີໃຫ້ມີການເຕີບໂຕ. ເດືອນກໍລະກົດປີນີ້, ນະຄອນໜານໜິງ ໄດ້ຮັບອະນຸຍາດໃຫ້ສ້າງຕັ້ງເຂດທົດລອງສັງລວມການຄ້າເອເລັກໂຕຣນິກຂ້າມຊາດ.
ນອກນີ້, ເຂດກວາງຊີຍັງຈະຄິດຄົ້ນຮູບການໃໝ່ໃນການຕິດຕາມຄຸ້ມຄອງການຜ່ານດ່ານສຳລັບການຄ້າເອເລັກໂຕຣນິກຂ້າມຊາດ ເພື່ອຍົກສູງປະສິດທິພາບການແຈ້ງເຂົ້າອອກດ່ານ, ການຊຳລະ ແລະການຕິດຕາມຄຸ້ມຄອງທຸລະກິດຕ່າງໆ ເຊັ່ນ ການຜ່ານດ່ານ, ການຄືນພາສີ, ການເສຍພາສີ, ການຊຳລະດ້ວຍເງິນຕາຕ່າງປະເທດ ແລະອື່ນໆ.
