ງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດ ຈະຈັດຂຶ້ນໃນວັນທີ 5 ພະຈິກໜ້ານີ້, ກຳແພງນະຄອນຊຽງໄຮທີ່ເປັນເຈົ້າພາບ ໄດ້ອອກແບບເສັ້ນທາງທ່ຽວຊົມທີ່ມີເອກະລັກພິເສດ 45 ສາຍແລະກິດຈະກຳສົ່ງເສີມການລົງທຶນ 30 ຄັ້ງໃຫ້ແກ່ນັກທຸລະກິດທີ່ເຂົ້າຮ່ວມງານຄັ້ງນີ້ ເພື່ອໂຄສະນາສະພາບການດຳເນີນທຸລະກິດຂອງຊຽງໄຮຕື່ມອີກ, ຊຸກຍູ້ເມືອງຕ່າງໆຂອງຊຽງໄຮດຳເນີນການແລກປ່ຽນແລະການເຊື່ອມຈອດດ້ານການສົ່ງເສີມການລົງທຶນກັບໜ່ວຍງານເສດຖະກິດການຄ້າຕ່າງໆທີ່ເຂົ້າຮ່ວມງານວາງສະແດງຄັ້ງນີ້.
ທ່ານ ຊຸ່ນຊິ່ນຮວາ ຫົວໜ້າສູນສົ່ງເສີມການລົງທຶນຂອງຕ່າງປະເທດກຳແພງນະຄອນຊຽງໄຮ ກ່າວວ່າ, ເສັ້ນທາງ 45 ສາຍແລະກິດຈະກຳສົ່ງເສີມການລົງທຶນ 30 ຄັ້ງນັ້ນ ຈະພະຍາຍາມຕອບສະໜອງກັບຄວາມຕ້ອງການທີ່ແຕກຕ່າງກັນຂອງຜູ້ລົງທຶນດ້ານຕ່າງໆໃນຂະແໜງການທີ່ຕ່າງກັນ, ເສີມຂະຫຍາຍທ່າແຮງໃນດ້ານຊັບພະຍາກອນພິເສດໃນການຈັດງານວາງສະແດງສິນຄ້ານຳເຂົ້າຢູ່ຊຽງໄຮນັ້ນຢ່າງເຕັມສ່ວນ, ເຊິ່ງຈະໄດ້ຈັດວາງແລະອອກແບບຢ່າງປານີດໃຫ້ແກ່ນັກທຸລະກິດທຸກປະເພດທີ່ເຂົ້າຮ່ວມງານ ໂດຍໄດ້ປົກຄຸມຫຼາຍຂົງເຂດເຊັ່ນ: ການຜະລິດປັນຍາປະດິດ, ການຄ້າການທະນາຄານ, ຫົວຄິດປະດິດສ້າງດ້ານວັດທະນະທຳ, ສຸຂະພາບແລະອື່ນໆ.
ກິດຈະກຳສົ່ງເສີມການລົງທຶນ 30 ຄັ້ງດັ່ງກ່າວຈະເລີ່ມຈັດຂຶ້ນແຕ່ເດືອນຕຸລານີ້ເປັນຕົ້ນໄປ ຈົນຮອດທ້າຍເດືອນພະຈິກໜ້ານີ້.