ງານວາງສະແດງສິນຄ້ານຳເຂົ້າສາກົນຈີນເປີດໂອກາດໃໝ່ໃຫ້ແກ່ປະເທດພວມພັດທະນາ
CRI2018-11-10 14:48:51
ໃນເຂດວາງສະແດງອາຫານ ແລະ ຜະລິດຕະພັນກະສິກຳທີ່ໄດ້ຮັບຄວາມສົນໃຈຫຼາຍໃນງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດ, ຜູ້ວາງສະແດງທີ່ມາຈາກປະເທດພວມພັດທະນາ ແລະປະເທດດ້ອຍພັດທະນາໄດ້ນຳສະເໜີຜະລິດຕະພັນທີ່ມີເອກະລັກພິເສດຂອງປະເທດຕົນຢ່າງຫ້າວຫັນ, ເຊິ່ງໄດ້ດຶງດູດນັກທຸລະກິດເຂົ້າມາຫາລືເລື່ອງການຮ່ວມມືທຸລະກິດ.
ໃນຂະນະທີ່ປະເທດທີ່ພັດທະນາແລ້ວວາງສະແດງເຕັກໂນໂລຊີ ແລະ ຜະລິດຕະພັນລະດັບສູງ, ປະເທດພວມພັດທະນາ ແລະປະເທດດ້ອຍພັດທະນາ ໄດ້ນຳມາເຊິ່ງຜະລິດຕະພັນທີ່ມີສີສັນພິເສດຂອງຕົນລວມທັງ ອາຫານ, ຜະລິດຕະພັນກະສິກຳ, ເຄື່ອງນຸ່ງຫົ່ມ, ເຄື່ອງໃຊ້ປະຈຳວັນ, ພ້ອມດ້ວຍຊັບພະຍາກອນທ່ອງທ່ຽວ ແລະ ວັດທະນະທຳປະຫວັດສາດ ຢ່າງອຸດົມສົມບູນ ເພື່ອແຂ່ງຂັນກັບຜະລິດຕະພັນຂອງປະເທດທີ່ພັດທະນາແລ້ວ. ເຊິ່ງເຮັດໃຫ້ມີຄວາມຮູ້ສຶກຢ່າງເລິກເຊິ່ງວ່າ: ການສະແຫວງຫາຊີວິດທີ່ຜາສຸກເປັນຄວາມປາຖະໜາຮ່ວມຂອງປະຊາຊົນບັນດາປະເທດໃນໂລກ, ບໍ່ຄວນປະຖິ້ມໃຜໄວ້ຢູ່ທາງຫຼັງບົນເສັ້ນທາງແຫ່ງການພັດທະນາ; ທ່ານປະທານສີຈິ້ນຜິງໄດ້ສະເໜີທັດສະນະທີ່ສ້າງ “ປະຊາຄົມຮ່ວມຊາຕາກຳຂອງມວນມະນຸດ”, ແລະໄດ້ສະເໜີເຈດຈຳນົງທີ່ “ຍຶດໝັ້ນການພັດທະນາແບບມີຜົນປະໂຫຍດທົ່ວເຖິງ ແລະ ກວມລວມ, ຊຸກຍູ້ໃຫ້ປະເທດຕ່າງໆພັດທະນາພ້ອມກັນ” ໃນການກ່າວສູນທອນພົດໃນພິທີເປີດງານວາງສະແດງຄັ້ງນີ້ ໄດ້ເປັນການຊີ້ແຈງທິດທາງ ແລະຊ່ອງທາງແຫ່ງການບັນລຸຄວາມປາຖະໜາດັ່ງກ່າວ.
ຄວາມຈິງແລ້ວ, ງານວາງສະແດງຄັ້ງນີ້ກໍເປັນແບບຢ່າງທີ່ຊຸກຍູ້ການພັດທະນາແບບກວມລວມ ແລະມີຜົນປະໂຫຍດທົ່ວເຖິງ. ວິສາຫະກິດ 3600 ກວ່າແຫ່ງໄດ້ນຳເອົາຜະລິດຕະພັນຂອງຕົນມາວາງສະແດງ, 172 ປະເທດ ເຂດແຄວ້ນ ແລະອົງການຈັດຕັ້ງສາກົນໄດ້ເຂົ້າຮ່ວມ, ເຊິ່ງລວມທັງສະມາຊິກG20, ປະເທດບຣິກສ, ປະເທດສະມາຊິກອົງການຮ່ວມມືຊຽງໄຮ, 58 ປະເທດລຽບຕາມ “ໜຶ່ງແລວໜຶ່ງເສັ້ນທາງ” ແລະ 35 ປະເທດດ້ອຍພັດທະນາ, ເຊິ່ງໄດ້ສ່ອງແສງໃຫ້ເຫັນເຖິງການມີສ່ວນຮ່ວມຈາກທົ່ວໂລກທີ່ກວ້າງຂວາງທີ່ສຸດ. ສຳລັບເລື່ອງນີ້, ທ່ານໂຣເບີໂຕ ອາເຊເວໂດ ຜູ້ອຳນວຍການໃຫຍ່ອົງການການຄ້າໂລກກ່າວວ່າ, ເປັນເວລາດົນນານມາແລ້ວທີ່ຈີນໄດ້ສ້າງສາຍພົວພັນທີ່ດີກັບບັນດາປະເທດພວມພັດທະນາ ລວມທັງປະເທດດ້ອຍພັດທະນາ, ຈີນເປີດກວ້າງການນຳເຂົ້າສິນຄ້າຈະເຮັດໃຫ້ປະເທດເຫຼົ່ານີ້ໄດ້ຮັບຜົນປະໂຫຍດຕື່ມອີກ.
ປະຈຸບັນນີ້, ການກະທຳຕ້ານໂລກາພິວັດ ແລະ ລັດທິປົກປ້ອງການຄ້າໄດ້ປາກົດຂຶ້ນ, ເສດຖະກິດໂລກຜະເຊີນກັບຄວາມກົດດັນທີ່ເຕີບໂຕຊ້າລົງ, ເຊິ່ງປະເທດພວມພັດທະນາ ແລະປະເທດດ້ອຍພັດທະນາຈະໄດ້ຮັບຜົນກະທົບໄດ້ງ່າຍກ່ອນໝູ່. ຖ້າຢາກຈັດຕັ້ງປະຕິບັດວາລະການພັດທະນາແບບຍືນຍົງ 2030ຂອງອົງການສະຫະປະຊາຊາດ, ຮັບມືກັບຄວາມສ່ຽງ ແລະສິ່ງທ້າທາຍຮ່ວມຂອງມວນມະນຸດ, ອາໄສພຽງແຕ່ຄວາມພະຍາຍາມຂອງຈີນປະເທດດຽວນັ້ນແມ່ນບໍ່ພຽງພໍ, ຫາກຕ້ອງການບັນດາປະເທດໃນໂລກແກ້ໄຂຄວາມເຫັນທີ່ຂັດແຍ້ງກັນ, ເສີມຂະຫຍາຍທ່າແຮງຂອງຕົນ, ຊຸກຍູ້ການພັດທະນາແບບກວມລວມ. ໂດຍເໝືອນດັ່ງທ່ານປະທານສີຈິ້ນຜິງໄດ້ຊີ້ໃຫ້ເຫັນຂະນະກ່າວສູນທອນພົດວ່າ: “ໃນຊູ່ມື້ນີ້ທີ່ຂະບວນການເສດຖະກິດໂລກາພິວັດກ້າວສູ່ລວງເລິກ, ຜູ້ເຂັ້ມແຂງເປັນເສືອສະໝິງ ຜູ້ອ່ອນແອເປັນກວາງສະມັ່ນ, ຜູ້ຊະນະເອົາປຽບທຸກຢ່າງນັ້ນຈະເປັນເສັ້ນທາງທີ່ນັບມື້ນັບແຄບເຂົ້າຈົນກາຍເປັນເສັ້ນທາງຕັນ, ການພັດທະນາແບບກວມລວມ ແລະສ້າງຜົນປະໂຫຍດໃຫ້ທົ່ວເຖິງ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດຈຶ່ງຈະເປັນເສັ້ນທາງຖືກຕ້ອງທີ່ນັບມື້ນັບສົດໃສ ແລະ ກວ້າງອອກ.” ດັ່ງນັ້ນ, ງານວາງສະແດງສິນຄ້ານຳເຂົ້າສາກົນຈີນຄັ້ງນີ້, ກໍເໝືອນດັ່ງໄດ້ເປີດປະຕູໃໝ່ທີ່ກ້າວສູ່ເສັ້ນທາງທີ່ຖືກຕ້ອງ.
