ຈັດກອງປະຊຸມສະຫຼອງການສ້າງຕັ້ງມະຫາວິທະຍາໄລກວາງຊີ ສປ ຈີນຄົບຮອບ 90 ປີ
cri2018-12-10 14:59:27
ວັນທີ 8 ທັນວານີ້ ມະຫາວິທະຍາໄລກວາງຊີ ສປ ຈີນໄດ້ຈັດກອງປະຊຸມສະເຫຼີມສະຫຼອງການສ້າງຕັ້ງຄົບຮອບ 90 ປີ. ວິຊາການ, ຜູ້ຕາງໜ້າຂອງມະຫາວິທະຍາໄລຕ່າງໆ ທັງພາຍໃນແລະຕ່າງປະເທດ, ພ້ອມກັບອາຈານ ແລະນັກສຶກສາລວມ 5 ພັນກວ່າຄົນໄດ້ເຂົ້າຮ່ວມກອງປະຊຸມດັ່ງກ່າວ.
ໃນເວລາປະກອບຄຳຄິດຄຳເຫັນໃນກອງປະຊຸມດັ່ງກ່າວ, ທ່ານລູ້ຊິນເຊີ້ ເລຂາຄະນະເລຂາເຂດກວາງຊີເຜົ່າຈວ້າງປົກຄອງຕົນເອງ ສປ ຈີນກ່າວວ່າ, ການພັດທະນາຂອງມະຫາວິທະຍາໄລກວາງຊີແມ່ນເປັນຮູບຫຍໍ້ຂອງການພັດທະນາພາລະກິດການສຶກສາລະດັບສູງຂອງກວາງຊີ, ແມ່ນສ່ວນປະກອບທີ່ສຳຄັນຂອງຜົນງານອັນຮຸ່ງເຮືອງທີ່ເຂດກວາງຊີເຜົ່າຈວ້າງປົກຄອງຕົນເອງ ສ້າງຕັ້ງຂຶ້ນເມື່ອ 60 ປີ ໂດຍສະເພາະແມ່ນນັບແຕ່ຈີນດຳເນີນການປະຕິຮູບແລະໄຂປະຕູສູ່ພາຍນອກໃນ 40 ປີມານີ້.
ມະຫາວິທະຍາໄລກວາງຊີສ້າງຕັ້ງຂຶ້ນເມື່ອປີ 1928, ແມ່ນມະຫາວິທະຍາໄລທີ່ມີປະຫວັດດົນນານກວ່າໝູ່ ແລະໃຫຍ່ກວ່າໝູ່ຂອງກວາງຊີ, ຕະຫຼອດໄລຍະ 90 ປີ, ມະຫາວິທະຍາໄລກວາງຊີໄດ້ຍຶດຖື “ສ້າງຊາດໃຫ້ຈະເລີນ ສ້າງກວາງຊີໃຫ້ຮຸ່ງເຮືອງ”ເປັນວັດຖຸປະສົບໃນການສ້າງມະຫາວິທະຍາໄລ ແລະ ຖື “ຄວາມດຸໝັ່ນ ຈິງໃຈ, ເນັ້ນວິຊາການແລະການປະດິດສ້າງ”ເປັນຄຳຂວັນປະຈຳ, ໄດ້ຝຶກອົບຮົມຜູ້ມີຄວາມຮູ້ຄວາມສາມາດເປັນຈຳນວນຫຼວງຫຼາຍໃຫ້ແກ່ ສັງຄົມ. ປັດຈຸບັນ ມະຫາວິທະຍາໄລກວາງຊີໄດ້ກາຍເປັນໂຮງຮຽນຊັ້ນສູງທີ່ສຳຄັນທີ່ມີກະຊວງສຶກສາທິການຈີນ ແລະອົງການປົກຄອງເຂດກວາງຊີ ຮ່ວມກັນສ້າງສາ ແລະໄດ້ຮັບການສະໜັບສະໜູນເປັນພິເສດຈາກລັດຖະບານ.
