ລາຍການພິເສດ:ການເສັງຄວາມຮູ້ກ່ຽວກັບການທ່ອງທ່ຽວເມືອງອູ້ຢວນແຂວງຈ່ຽງຊີ່—ຊົນນະບົດທີ່ສວຍງາມທີ່ສຸດຂອງຈີນ
(GMT+08:00) 2011-01-28 11:01:38 cri
ສະບາຍດີ,ທ່ານຜູ້ຟັງທີ່ເຄົາລົບ,ຍິນດີຕ້ອນຮັບທ່ານຮັບຟັງລາຍການພິເສດການເສັງຄວາມຮູ້ກ່ຽວກັບການທ່ອງທ່ຽວ:ແຂວງຈ່ຽງຊີ່ທີ່ມີສະເໜ່.ຢູ່ຈີນ,ມີຄວາມເວົ້າຄຳໜຶ່ງເວົ້າແນວນີ້ວ່າ:"ໄປເບິ່ງພູໃຫຍ່ 5 ໜ່ວຍກັບຄືນມາແລ້ວ,ກໍ່ຮູ້ສຶກວ່າ,ບໍ່ມີພູໜ່ວຍໃດງາມທໍ່,ໄປທ່ຽວບ້ານອູ້ຢວນມາແລ້ວ,ກໍ່ບໍ່ຕ້ອງໄປເບິ່ງບ້ານອື່ນອີກ!"—ນີ້ແມ່ນຄຳຍ້ອງຍໍຈາກຜູ້ມີຊື່ສຽງຫຼາຍທ່ານພາຍຫຼັງພວກເພິ່ນໄດ້ໄປທ່ຽວບ້ານອູ້ຢວນແຂວງຈ່ຽງຊີ່ແລ້ວ.ມື້ນີ້,ຜູ້ດຳເນີນລາຍການຈະພາທ່ານໄປທ່ຽວບ້ານອູ້ຢວນ,ຊົມທິວທັດຊົນນະບົດທີ່ສວຍງາມທີ່ສຸດຂອງຈີນ.
ກ່ອນອື່ນ,ຜູ້ດຳເນີນລາຍການຈະຕັ້ງຄຳຖາມ 2 ຂໍ້:ຂໍ້ທີໜຶ່ງ,ແມ່ນຄວາມງາມຂອງບ້ານອູ້ຢວນ,ງາມຢູ່ບ່ອນໃດ?ຂໍ້ທີສອງ,ສິ່ງກໍ່ສ້າງຂອງບ້ານບູຮານຈ່ຽງວ່ານແມ່ນມີເອກະລັກວັດທະນະທຳປະເພດໃດ? ຄຳຕອບຈະມີຢູ່ໃນລາຍການຕໍ່ໄປໃນມື້ນີ້,ຂໍໃຫ້ທ່ານຈົ່ງຕັ້ງໃຈຟັງ.
ອູ້ຢວນ,ເມືອງນ້ອຍໆທີ່ຊອກຫາໃນແຜນທີ່ກໍ່ຍັງຍາກ,ຊ້ຳພັດມີຄົນໃຫ້ຄະແນນສູງປານນີ້,ຍ້ອງວ່າແມ່ນບ່ອນງາມທີ່ສຸດຂອງຈີນ,ຄັນຊັ້ນ,ມັນງາມຢູ່ບ່ອນໃດ?ພວກເຮົາມາຟັງທ່ານລີນສ້ຽນຈຸ່ນ,ເລຂາຄະນະພັກເມືອງອູ້ຢວນແນະນຳສູ່ຟັງວ່າ:
"ສິ່ງແວດລ້ອມຊີວະພາບຂອງເມືອງອູ້ຢວນງາມທີ່ສຸດ.ພ້ອມກັນນັ້ນ,ຮີດຄອງປະເພນີແລະວັດທະນະທຳຂອງແຫ່ງນີ້ກໍ່ພິເສດຫຼາຍ,ຕົວຢ່າງຄື:ການແຫ່ລົດສະແດງງິ້ວ,ເຄື່ອງຮ່ອນເຕົ້າຮູ້,ການຟ້ອນຜີແລະການສະແດງອື່ນໆ,ຊີວິດວັດທະນະທຳຫຼາກຫຼາຍທີ່ສຸດ.ໃນເມືອງນີ້,ມີບ້ານບູຮານ,ສິ່ງກໍ່ສ້າງເກົ່າແກ່ແລະຂົວບູຮານແຈກຢາຍຢູ່ທຸກແຫ່ງໃນເມືອງ,ຫຼາຍທີ່ສຸດ,ເວົ້າໄດ້ວ່າ,ໃນດິນແດນທີ່ກວ້າງ 3000 ກີໂລຕາແມັດແຫ່ງນີ້,ບໍ່ພຽງແຕ່ມີສິ່ງແວດລ້ອມຊີວະພາບທີ່ດີເທົ່ານັ້ນ,ຍັງມີພື້ນຖານວັດທະນະທຳອັນໜາແໜ້ນ.ຄວາມງາມຂອງອູ້ຢວນ,ກໍ່ງາມຢູ່ບ່ອນວ່າ,ໄດ້ໂຮມຄວາມງາມຂອງທຳມະຊາດແລະວັດທະນະທຳເຂົ້າເປັນອັນດຽວກັນ,ແລະງາມຢູ່ບ່ອນວ່າ,ມະນຸດກັບທຳມະຊາດຢູ່ຮ່ວມກັນຢ່າງກົມກຽວ,ເວົ້າໄດ້ວ່າ,ແມ່ນທຳມະຊາດກັບຄົນເປັນອັນໜຶ່ງອັນດຽວກັນ."
ໃນລະດູໃບໄມ້ປົ່ງ,ດອກຜັກກາດນ້ຳມັນຂອງອູ້ຢວນງາມຫຼາຍ,ສະນັ້ນ,ຈຶ່ງຄິດວ່າ,ເວລາເໝາະສົມທີ່ສຸດໃນການໄປທ່ຽວເມືອງອູ້ຢວນແມ່ນເດືອນ 3 ເດືອນ 4,ນັກທ່ອງທ່ຽວສ່ວນຫຼາຍຈຶ່ງພາກັນໄປທ່ຽວເມືອງອູ້ຢວນໃນໄລຍະນີ້.ແຕ່ທີ່ຈິງແລ້ວ,ໃນທຸກລະດູການ,ເມືອງອູ້ຢວນກໍ່ມີສິ່ງໜ້າເບິ່ງໜ້າຊົມທີ່ຕ່າງກັນ,ຕໍ່ໄປພວກເຮົາມາຟັງທ່ານເກີຈ້ຽນ,ຊາວບ້ານອູ້ຢວນເລົ່າສູ່ຟັງ:
ຢູ່ເມືອງອູ້ຢວນພວກເຮົາ, ໃນ4ລະດູເນື້ອໃນການທ່ອງທ່ຽວມີຫຼາຍຢ່າງຫຼາຍແນວ, ຕົວຢ່າງວ່າ, ໃນລະດູບານໃໝ່, ນັກທ່ອງທ່ຽວມັກໄປເບິ່ງດອກຜັກກາດນ້ຳມັນ, ທີ່ຈິງແລ້ວ, ລະດູບານໃໝ່ອູ້ຢວນຄືກັບຮູບແຕ້ມແຜ່ນໜຶ່ງ:ດອກຜັກນ້ຳມັນສີເຫຼືອງອ່າມຮ່າມ, ດອກໝາກຈອງສີຂາວສະອາດ, ດອກຄາຍສີຍົມພູໜ້າຮັກ, ດອກຕູ້ຈ່ວນສີແດງເຮື່ອເຮືອງ, ແມ່ນ້ຳຂຽວງາມ, ເຮືອນໄທບ້ານທາປູນສີຂາວມຸງດິນຂໍສີດຳ, ໃບໄມ້ຂຽວອຸ່ມທຸ່ມ, ອາກາດອົບອຸ່ນປະກອບເປັນທິວທັດທຳມະຊາດທີ່ສວຍງາມໜ້າອອນຊອນໃຈ.
ຢູ່ບ່ອນທີ່ຫ່າງຈາກທິດຕາເວັນອອກຂອງເມືອງອູ້ຢວນ20ກິໂລແມັດ, ມີໝູ່ບ້ານບູຮານແຫ່ງໜຶ່ງທີ່ມີເອກະລັກວັດທະນະທຳສິ່ງກໍ່ສ້າງຫຸ່ຍໂຈ່ວ, ຄືບ້ານຈ່ຽງວ່ານ. ການຈັດວາງຂອງສິ່ງກໍ່ສ້າງບ້ານຈ່ຽງວ່ານມີຈຸດພິເສດດີສົມຄວນ,ຄື:ຖະໜົນສາຍໜຶ່ງມີທາງຮ່ອມ6ເສັ້ນ, ທາງໃໝ່ທາງເກົ່າສັບປົນກັນຢ່າງເປັນລະບຽບຮຽບຮ້ອຍ, ສ້າງມາພັນປີແລ້ວຍັງເປັນລະບຽບດີຢູ່. ທາງຮ່ອມທຸກເສັ້ນລ້ວນແຕ່ມີເອກະລັກຂອງຕົນ, ງາມແບບບູຮານ. ມາຮອດປະຈຸບັນ, ຖະໜົນເກົ່າຂອງຈ່ຽງວ່ານຍັງໄດ້ຮັກສາເອກະລັກຂອງລາຊະວົງມີງແລະລາຊະວົງຊີ່ງ, ທາງຍ່າງແຄບໆ, ຮ້ານຄ້າເກົ່າບໍ່ເທົ່າໃດຫຼັງ, ປະຕູຮ້ານຄ້າຍັງເປັນປະຕູທີ່ປະກອບດ້ວຍແປ້ນໄມ້ຫຼາຍໆແຜ່ນ, ຢູ່ໃນຮ້ານມີຕູ້ເກົ່າ, ມີຫ້າງວາງສິນຄ້າເກົ່າ, ຝາທາງນອກຍັງເປັນຝາເກົ່າໆ. ຍ່າງຫຼິ້ນຢູ່ໃນຫັ້ນ, ກໍ່ຄ້າຍກັບວ່າໄດ້ກັບຄືນສູ່ສະໄໝບູຮານ, ຍັງສຳຜັດກັບບັນຍາກາດຢູ່ບ້ານຈ່ຽງວ່ານໃນສະໄໝລາຊະວົງມີງແລະລາຊະວົງຊີ່ງ. ຢູ່ຈ່ຽງວ່ານມີສິ່ງກໍ່ສ້າງບູຮານທີ່ຮັກສາເປັນຢ່າງດີ, ຍັງມີນ້ຳສ້າງບູຮານ, ສາລາບູຮານ, ຂົວບູຮານ, ທຸກບ່ອນລ້ວນແຕ່ສະແດງໃຫ້ເຫັນຈຸດພິເສດຂອງວັດທະນະທຳຫຸ່ຍໂຈ່ວ. ຜູ້ນຳທ່ຽວທ້ອງຖິ່ນພາພວກເຮົາໄປເບິ່ງຫໍສ່ານສິງ, ເວົ້າສູ່ຟັງວ່າ,
ຢູ່ບ້ານຈ່ຽງວ່ານມີຖະໜົນເກົ່າແກ່ເສັ້ນໜຶ່ງຊື່ວ່າ ຖະໜົນເປີຍເມີນ, ມີເຮືອນເກົ່າແກ່ຫຼາຍຫຼັງໂຮມກັນຢູ່ທີ່ນີ້, ພວກເຮົາໄດ້ເຫັນເຮືອນງາມໆຫຼາຍຫຼັງທີ່ດີສົມຄວນຢູ່ທີ່ນີ້. ຕົວຢ່າງວ່າ, ຫໍສ່ານສີງ, ສ້າງໃນສະໄໝກາງລາຊະວົງຊີ່ງ, ແມ່ນເກົ່າຂອງທ່ານຈ່ຽງຊ່ຽນ, ນັກສຶກສາສາດ, ນັກຄົ້ນຄວ້າພຸດທະສາດສະໜາ, ຮອດປະຈຸບັນປະມານ200ກວ່າປີແລ້ວ. ເມື່ອຍ່າງເຂົ້າທາງໃນກໍ່ເຫັນຈຸດພິເສດຂອງເຮືອນຫຼັງນີ້. ຍ່າງເຂົ້າປະຕູທີສອງ,ພວກເຮົາໄດ້ເຫັນເຮືອຊາວຮຸ່ຍໂຈວຫຼັງຫນຶ່ງບໍ່ເປີດປ່ອງຢ້ຽມ,ຢູ່ຫນ້າປະຕູມີຝາຫນຶ່ງທີ່ດູມໍ,ຮອດປະຈຸບັນ,ເຮືອນຫຼັງນີ້ໄດ້ມີປະຫວັດ 200 ກວ່າປີແລ້ວ,ແຕ່ຍັງມີຄົນຢູ່.
ສິ່ງທີ່ເຮັດໃຫ້ຄົນຈ່ຽງວ່ານພາກພູມໃຈນັ້ນແມ່ນູພູໂຮ້ລົງ,ເຂົາເຈົ້າຖືວ່າຄົນເຜົ່ານີ້ມີປະຊາກອນຫຼວງຫຼາຍແລະມີຄົນເກັ່ງຫຼາຍແມ່ນຍ້ອນຮ່ວງຈຸ້ຍຂອງສາຍພູໂຮ້ລົງດີຫຼາຍ,ທີ່ຈິງແລ້ວ,ທັດສະນະຮ່ວງຈຸ້ຍແບບນີ້ກໍ່ບໍ່ເປັນຫນ້າເຊື້ອປານໃດ, ແຕ່ຄົນຈ່ຽງວ່ານໄດ້ສ້າງແບບຢ່າງອັນດີງາມໃຫ້ພູຫນ່ວຍນີ້,ປູກຕົ້ນໄມ້ແລະອະນຸລັກທຳມະຊາດ.ປະຈຸບັນ,ເມື່ອຍ່າງເຂົ້າພູໂຮ້ລົງ,ກໍ່ເຫມືອນດັ່ງຍ່າງເຂົ້າປ່າໄມ້ຕຶບດົງນາ,ຢູ່ເທິງພູເຕັມໄປດ້ວຍຕົ້ນໄມ້ໃຫຍ່ຕຶບຈົນຫຼຍວບໍ່ເຫັນຢ້າ,ອັນໄດ້ເພີ່ມຄວາມສວຍງາມບໍ່ຫນ້ອຍໃຫ້ແກ່ບບ້ານຈ່ຽງວ່ານທີ່ສ້າງຕາມສາຍພູໂຮ້ລົງ.
ມີນັກທ່ອງທ່ຽວເວົ້າວ່າ: "ເມື່ອມາຮອດເມືອງອູ້ຢວນ,ບ່ອນອື່ນບໍ່ໄປກໍ່ໄດ້,ແຕ່ຖ້າບໍ່ໄປຢາມບ້ານຫຼີເຄິ່ງທີ່ມີນ້ຳຫ້ວຍໄຫຼຈົ້ນໆ,ມີຂົວນ້ອຍກາຍຂ້າມເຮືອນໄປຫາເຮືອນຄົນແລ້ວ,ກໍ່ທໍ່ກັບວ່າ,ທ່ານມາເມືອງອູ້ຢວນເສຍຖ້ຽວລ້າໆ."
ຄຳວ່າເຄິ່ງໃນພາສາທ້ອງຖິ່ນຫມາຍເຖິງນ້ຳຫ້ວຍ,ແຕ່ໃນບ້ານນີ້ຄົນສ່ວນໃຫຍ່ລ້ວນແຕ່ມີນາມສະກຸນຫຼີ,ເຂົາເຈົ້າໄດ້ດຳລົງຊີວິດຢູ່ສອງຟັ່ງນ້ຳຫ້ວຍແຫ່ງນີ້ທຸກເຊັ່ນຄົນ,ສະນັ້ນ ບ້ານບູຮານແຫ່ງນີ້ຈຶ່ງເອີ້ນກັນວ່າ"ຫຼີເຄິ່ງ"ແປວ່າບ້ານນ້ຳຫ້ວຍຫຼີຫ່າງຈາກເມຶອງອູ້ຢວນ 12 ກິໂລແມັດ.ສິ່ງກໍ່ສ້າງຢູ່ແຫ່ງນີ້ສ້າງແບບອ່ານຮຸ້ຍທີ່ມີຊື່ສຽງ,ເຮັດໃຫ້ຄົນຮູ້ສຶກວ່າມີບັນຍາກາດທີ່ສະຫງົບງຽບແລະສິລິມົງຄຸນ.ຍ່າງໄປຕາມກາງຫີນສີຂຽວແຫ່ງນີ້,ພວກເຮົາໄດ້ຊົມພາວວິວສວຍງາມທີ່ມີນ້ຳຫ້ວຍ,ຂົວນ້ອຍແລະເຮືອນຄົນ.
ແຫ່ງນີ້ງາມປານສະຫວັນເມືອງຄົນ,ສະຫງົບມິດງຽບ,ບໍ່ຊິງດີຊີງເດັ່ນກັບໃຜ,ຢູ່ແບບທຳມະຊາດ,ເຮືອນທັງຫມົດໃນເມືອງອູ້ຢວນມີແຕ່ແຫ່ງນີ້ທີ່ມີຄວາມຮູ້ສຶກແບບນີ້,ໄທບ້ານປຸກເຮືອນຢູ່ຕາມສອງຝັ່ງນ້ຳຫ້ວຍແລະທ່ຽວໄປມາຕາມຂົວນ້ອຍແຫ່ງນີ້.
ແຕ່ວ່າສຳລັບຄົນຕ່າງແຂວງແລ້ວ,ຄວາມສວຍງາມແບບບູຮານຂອງເມືອງນີ້ມີຄວາມດຶງດູດຫຼາຍກວ່າ:
ພວກເຮົາເຫັນວ່າ ວຽກວັດຖຸບູຮານ,ວັດທະນະທຳບູຮານຂອງເມືອງນີ້ຮັກສາໄດ້ດີຫຼາຍ,ສິ່ງກໍ່ສ້າງບູຮານບໍ່ໄດ້ຖືກທຳລາຍຈັກບ່ອນ,ໄດ້ຮັກສາໄວ້ເປັນຢ່າງດີ.
ໃນເວລາທີ່ການສຳພາດໃກ້ຈະສິ້ນສູດລົງ,ພວກເຮົາໄດ້ຍິນສຽງເພງທີ່ຄຸ້ມຫູຄືເພງຈີນທີ່ຊື່ວ່າໃຈຂອງຂ້ອຍທີ່ເປັນຄົນຈີນ
ພວກເຮົາຍ່າງໄປຊອກຫາສຽງດົນຕີດັ່ງກ່າວ, ຈິ່ງຮູ້ວ່າສຽງດົນຕີນີ້ແມ່ນ"ຂຸ່ຍຖາວຕີ" ,ຄືຂຸ່ຍທີ່ເຮັດດ້ວຍດິນໜຽວຊະນິດໜຶ່ງ,ຮູບຊົງຂອງມັນປານີດຫລາຍ,ອັນນ້ອຍອັນໃຫຍ່ສຽງກໍ່ຕ່າງກັນ,ອັນນ້ອຍສຽງເສາະໃສ,ອັນໃຫຍ່ສຽງນຸ້ມນວນ, ຫັດເປົ່າກໍງ່າຍ.
ເມືອງອູ້ຢວນ,ຊົນນະບົດທີ່ງາມກວ່າໝູ່ຂອງຈີນ,ງາມແບບລຽບງ່າຍ ,ງາມແບບທໍາມະຊາດແລະກົມກືນກັນ,ທຸກບ່ອນກໍສະແດງໃຫ້ເຫັນວັດທະນະທໍາແລະຮີດຄອງປະເພນີຊົນນະບົດ, ທໍາມະຊາດຂອງເມືອງນີ້ເຮັດໃຫ້ຄົນມີຈິດໃຈສະຫງົບ.
ສຸດທ້າຍ, ພວກເຮົາມາທວນຄືນສອງຄໍາຖາມຂອງລາຍການມື້ນີ້, ຂໍ້ທີໜຶ່ງແມ່ນຄວາມງາມຂອງເມືອງອູ້ຢວນແມ່ນງາມຢູ່ບ່ອນໃດແທ້? ຂໍ້ທີສອງສິ່ງກໍ່ສ້າງບ້ານຈ່ຽງວ່ານມີລັກສະນະວັດທະນະທໍາແບບໃດ. ຍິນດີຕ້ອນຮັບທ່ານເຂົ້າຮ່ວມການເສັງຄວາມຮູ້ກ່ຽວກັບແຂວງຈ່ຽງຊີ.
