ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 13 ເມສານີ້, ງານຮູບເງົາສາກົນປັກກິ່ງຄັ້ງທີ 9 ທີ່ມີອົງການຮູບເງົາແຫ່ງຊາດຈີນເປັນຜູ້ຊີ້ນຳ, ສະຖານີວິທະຍຸໂທລະພາບສູນກາງຈີນແລະອົງການປົກຄອງນະຄອນຫຼວງປັກກິ່ງເປັນເຈົ້າພາບໄດ້ຈັດຂຶ້ນຢູ່ສູນຜະລິດຮູບເງົາດິຈິຕອນແຫ່ງຊາດຂອງກຸ່ມບໍລິສັດຮູບເງົາຈີນ ໂດຍທ່ານເຊີ້ນໄຫຊົງ ຮອງຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນ, ຜູ້ອຳນວຍການໃຫຍ່ສະຖານີວິທະຍຸໂທລະພາບສູນກາງຈີນ, ປະທານຄະນະຈັດງານຮູບເງົາສາກົນປັກກິ່ງຄັ້ງທີ 9 ໄດ້ກ່າວປະກາດເປີດງານຮູບເງົາຄັ້ງນີ້.
ປີນີ້ພໍດີເປັນປີຄົບຮອບ 70 ປີແຫ່ງການສະຖາປະນາ ສປ ຈີນ, ງານຮູບເງົາຄັ້ງນີ້ມີຫົວຂໍ້ຫຼັກວ່າ “ເຮືອນແລະປະເທດຊາດ”, ຮູບເງົາເລື່ອງ “ນັກດົນຕີ” ທີ່ກ່ຽວກັບເລື່ອງລາວຂອງທ່ານສຽນຊິ່ງໄຫ ນັກດົນຕີຈີນ ທີ່ຈີນແລະກາຊັກສະຖານຮ່ວມກັນຖ່າຍທຳນັ້ນເປັນຮູບເງົາເປີດງານ. ທຸກລາຍການໃນພິທີເປີດງານຮູບເງົາແມ່ນນັກວິຊາການຮູບເງົາເປັນຜູ້ສະແດງ, ນັກວິຊາການຮູບເງົາຈີນແລະຕ່າງປະເທດເຕົ້າໂຮມກັນໃນງານຄັ້ງນີ້ເພື່ອສຳຜັດກັບການແລກປ່ຽນແລະການເຊື່ອມໂຍງເຂົ້າກັນລະຫວ່າງວັດທະນະທຳຮູບເງົາຈີນແລະຕາເວັນຕົກ.
ສະຖານີວິທະຍຸໂທລະພາບສູນກາງຈີນໄດ້ຕິດຕັ້ງອຸປະກອນເຮັດໃຫ້ ສະຖານທີ່ຈັດພິທີເປີດແລະປິດງານຮູບເງົາແລະສະຖານທີ່ຈັດງານວັດທະນະທຳຮູບເງົາຫຼືຄານີວານ ມີສັນຍານລະບົບ 5G ປົກຄຸມແລະຖືວ່າເປັນເທື່ອທຳອິດທີ່ວິທະຍຸໂທລະພາບສູນກາງຈີນໄດ້ນຳໃຊ້ຫ້ອງທົດລອງສື່ມວນຊົນ 5G ເພື່ອບັນຸລເປົ້າໝາຍການຖ່າຍທອດສົດດ້ວຍພາບທີ່ມີຄວາມລະອຽດສູງພິເສດຜ່ານ APP ຂ່າວCCTVຂອງສະຖານີຕົນ. ຢູ່ສະຖານທີ່ຈັດງານຮູບເງົາຄັ້ງນີ້ໄດ້ຕິດຕັ້ງກ້ອງຖ່າຍພາບຄວາມລະອຽດສູງພິເສດ 4K ເຊິ່ງສະພາບງານຮູບເງົາທີ່ໜ້າປະທັບໃຈຕ່າງໆທີ່ຖ່າຍດ້ວຍກ້ອງຖ່າຍດັ່ງກ່າວຈະອອກອາກາດໃນຊ່ອງພາບຄວາມລະອຽດສູງພິເສດ 4KຂອງໂທລະພາບCCTV. ແຜນຍຸດທະສາດໃໝ່ “5G+4K+AI”ຂອງສະຖານີວິທະຍຸໂທລະພາບສູນກາງຈີນໄດ້ສ້າງຈຸດພົ້ນເດັ່ນໃໝ່ໃຫ້ແກ່ການລາຍງານຂ່າວງານຮູບເງົາສາກົນປັກກິ່ງຄັ້ງນີ້.
ຂ່າວແຈ້ງວ່າ: ມີ 85 ປະເທດແລະເຂດແຄວ້ນໄດ້ສະເໜີຮູບເງົາທັງໝົດ 775 ເລື່ອງເຂົ້າຊິງລາງວັນ “ທ່ຽນທານ”ເຊິ່ງເປັນລາງວັນຕົ້ນຕໍຂອງງານຮູບເງົາສາກົນຄັ້ງນີ້, ໃນທີ່ສຸດ ມີ 15 ເລື່ອງໄດ້ເຂົ້າແຂ່ງຂັນລາງວັນດັ່ງກ່າວໃນຮອບຊິງຊະນະເລີດ, ຮູບເງົາຈີນແລະຕ່າງປະເທດເກືອບ 500 ເລື່ອງຈະສາຍຢູ່ໃນໂຮງຮູບເງົາ 30 ແຫ່ງຂອງນະຄອນຫຼວງປັກກິ່ງ. ນອກນີ້, ງານຮູບເງົາຍັງຈະຈັດເວທີປຶກສາຫາລືຮູບເງົາພາຍໃຕ້ຫົວຂໍ້ “ສປ ຈີນສະຖາປະນາຂຶ້ນຄົບຮອບ 70 ປີ”, ງານວັດທະນະທຳຮູບເງົາຫຼືຄານີວານ ແລະກິດຈະກຳສຳຄັນອື່ນໆທັງໝົດ 7 ປະການແລະກິດຈະກຳອື່ນໆ 300 ກວ່າລາຍການ. ງານຮູບເງົາສາກົນປັກກິ່ງຄັ້ງທີ 9 ທີ່ຈະດຳເນີນໄປເປັນເວລາ 1 ອາທິດຈະຈັດພິທີມອບລາງວັນ “ທ່ຽນທານ”ໃນພິທີປິດງານ.
ຄຳເຫັນ
0