ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 5 ເມສານີ້, ທ່ານສີຈີ້ນຜີງ ປະທານປະເທດຈີນໄດ້ສົ່ງສານໄປຍັງທ່ານຫງວຽນຊວນຟຸກ ເພື່ອຊົມເຊີຍທ່ານທີ່ໄດ້ຮັບການເລືອກຕັ້ງເປັນປະທານປະເທດຫວຽດນາມ.
ໃນສານຊົມເຊີຍ, ທ່ານສີຈີ້ນຜີງໄດ້ລະບຸວ່າ: ສອງປະເທດຈີນ-ຫວຽດນາມແມ່ນປະເທດສັງຄົມນິຄົມທີ່ມີພູຜາແມ່ນ້ຳຕິດຈອດກັນ. ນັບແຕ່ປີກາຍເປັນຕົ້ນມາ, ສອງປະເທດໄດ້ຊ່ວຍເຫລືອເຊິ່ງກັນ ແລະກັນ, ຮ່ວມມືກັນຍາດມາໄດ້ຜົນສຳເລັດອັນສຳຄັນໃນດ້ານການຄວບຄຸມການແຜ່ລະບາດຂອງພະຍາດໂຄວິດ-19, ສາຍພົວພັນລະຫວ່າງສອງປະເທດພັດທະນາໄປຕາມທ່ວງທ່າທີ່ດີ, ພ້ອມທັງໄດ້ຮ່ວມກັນຂຽນໜ້າໃໝ່ແຫ່ງໄມຕີຈິດມິດຕະພາບແບບບ້ານໃກ້ເຮືອນຄຽງລະຫວ່າງຈີນ-ຫວຽດນາມໃນປຶ້ມປະຫວັດສາດ.
ທ່ານສີຈີ້ນຜີງກ່າວເນັ້ນໜັກວ່າ: ຂ້າພະເຂົ້າເອົາໃຈໃສ່ໃນລະດັບສູງຕໍ່ການພັດທະນາສາຍພົວພັນລະຫວ່າງຈີນ ແລະຫວຽດນາມ, ຍີນດີຮ່ວມກັບທ່ານທຳຄວາມພະຍາຍາມ, ໂດຍຖືການສ້າງສາຄູ່ຮ່ວມຊາຕາກຳທີ່ມີຄວາມໝາຍຍຸດທະສາດຕໍ່ສອງປະເທດເປັນທິດທາງ, ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດປະສົບຜົນສຳເລັດອັນໃໝ່ທີ່ໃຫຍ່ກວ່າເກົ່າຢ່າງບໍ່ຢຸດຢັ້ງ, ນຳເອົາຄວາມຜາສຸກໃຫ້ແກ່ລັດຖະບານ ແລະປະຊາຊົນສອງປະເທດໃຫ້ຫລາຍກວ່າເກົ່າ.
ມື້ດຽວກັນ, ທ່ານຫລີເຄີ້ສຽງ ນາຍົກລັດຖະມົນຕີຈີນໄດ້ສົ່ງສານຊົມເຊີຍໄປຍັງທ່ານຟາມມິງຈິງທີ່ໄດ້ຮັບເລືອກຕັ້ງເປັນນາຍົກລັດຖະມົນຕີຫວຽດນາມ, ໂດຍກ່າວວ່າ:ຍິນດີຮ່ວມກັບທ່ານຟາມມິງຈິງທຳຄວາມພະຍາຍາມ ຊຸກຍູ້ໃຫ້ຍຸດທະສາດດ້ານການພັດທະນາເຊື່ອມຈອດກັນຢ່າງໝັ້ນທ່ຽງ, ເລັ່ງລັດການສ້າງສະພາບການຮ່ວມມືທີ່ຕ່າງຝ່າຍຕ່າງໄດ້ຜົນປະໂຫຍດ, ປະກອບສ່ວນອັນຕັ້ງໜ້າເຂົ້າໃນການພັດທະນາສາຍພົວພັນມິດຕະພາບແບບບ້ານໃກ້ເຮືອນຄຽງ ແລະການຮ່ວມມືຮອບດ້ານ ລະຫວ່າງຈີນ-ຫວຽດນາມ.
ຄຳເຫັນ
0