ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI:ວັນທີ 4 ມິຖຸນານີ້, ທ່ານຫວ່າງເວີນປີ່ນ, ໂຄສົກກະຊວງການຕ່າງປະເທດຈີນປະກາດວ່າ, ໂດຍຕອບສະໜອງຕາມຄຳເຊີນຂອງທ່ານຫວາງຢີ້, ທີ່ປຶກສາແຫ່ງລັດ, ທັງເປັນລັດຖະມົນຕີກະຊວງການຕ່າງປະເທດຈີນ, ທ່ານລູຮຸດ ພັນໄຈຕານ, ທູດພິເສດຂອງປະທານາທິບໍດີອິນໂດເນເຊຍ, ຜູ້ຈັດສັນການຮ່ວມມືກັບຈີນ, ລັດຖະມົນຕີກະຊວງການຈັດສັນວຽກງານທະເລອິນໂດເນເຊຍຈະເດີນທາງໄປຢ້ຽມຢາມຈີນແຕ່ວັນທີ 5 ຫາວັນທີ 9 ມິຖຸນານີ້. ທ່ານຫວາງຢີ້ກັບທ່ານລູຮຸດຈະເປັນປະທານຮ່ວມໃນກອງປະຊຸມຄັ້ງປະຖົມມະລືກຂອງກົນໄກຮ່ວມມືສົນທະນາລະດັບສູງລະຫວ່າງຈີນ-ອິນໂດເນເຊຍຢູ່ນະຄອນກຸ້ຍຢາງແຂວງກຸ້ຍໂຈ່ວຂອງຈີນ. ທ່ານຫວ່າງເວີນປີ່ນກ່າວວ່າ, ຈີນຍິນດີຮ່ວມກັນກັບອິນໂດເນເຊຍ, ສືບຕໍ່ຜັນຂະຫຍາຍຄວາມຮັບຮູ້ທີ່ເປັນເອກະພາບກັນລະຫວ່າງປະມຸກລັດສອງປະເທດໃຫ້ດີ, ນຳໃຊ້ກົນໄກການຮ່ວມມືສົນທະນາລະດັບສູງໃຫ້ດີຢ່າງເຕັມທີ່, ຊຸກຍູ້ໃຫ້ໄມຕີຈິດມິດຕະພາບລະຫວ່າງຈີນ-ອິນໂດເນເຊຍໄດ້ຮັບຜົນສຳເລັດຫຼາຍກວ່າເກົ່າຫຼັງການແຜ່ລະບາດຢ່າງໃຫຍ່ຂອງພະຍາດໂຄວິດ-19.
ຕາມການແນະນຳໂດຍຝ່າຍຈີນ, ກົນໄກການຮ່ວມມືສົນທະນາລະດັບສູງລະຫວ່າງຈີນ-ອິນໂດເນເຊຍປະກອບດ້ວຍ 3 ກົນໄກລະດັບຮອງນາຍົກລັດຖະມົນຕີຄືກົນໄກຄວາມໝັ້ນຄົງທາງການເມືອງ, ກົນໄກເສດຖະກິດ, ກົນໄກວັດທະນະທຳທີ່ມີຢູ່ແລ້ວລະຫວ່າງສອງປະເທດ. ທ່ານວ່າງເວີນປີ່ນກ່າວໃນວັນທີ 4 ມິຖຸນານີ້ວ່າ, ກົນໄກນີ້ມີຜົນດີຕໍ່ການເຕົ້າໂຮມຊັບພະຍາກອນສອງຝ່າຍໃຫ້ດີກວ່າເກົ່າ, ແລະຈະຊຸກຍູ້ໃຫ້ການຮ່ວມມືລະຫວ່າງສອງປະເທດຫຼັງການແຜ່ລະບາດຢ່າງໃຫຍ່ຂອງພະຍາດໂຄວິດ-19 ກ້າວໄປໜ້າຢ່າງມີປະສິດທິຜົນສູງແລະຕິດແທດຕົວຈິງ. ກອງປະຊຸມຄັ້ງປະຖົມມະລືດຂອງກົນໄກນີ້ມີຄວາມໝາຍທີ່ສຳຄັນ, ສອງຝ່າຍໄດ້ຝາກຄວາມຫວັງສູງ.
ຄຳເຫັນ
0