ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 7 ມິຖຸນານີ້, ກອງປະຊຸມລັດຖະມົນຕີການຕ່າງປະເທດສະໄໝພິເສດເພື່ອລະນຶກການສ້າງຕັ້ງສາຍພົວພັນຄູ່ເຈລະຈາຈີນ-ອາຊຽນຄົບຮອບ 30 ປີໄດ້ຈັດຂຶ້ນຢູ່ກຳແພງນະຄອນຈຸ່ງກິ່ງປະເທດຈີນໂດຍການເປັນປະທານຮ່ວມຂອງທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ແລະທ່ານເຕໂອໂດໂຣ ລອກຊິນ ລັດຖະມົນຕີກະຊວງການຕ່າງປະເທດຟີລິບປິນ ທີ່ເປັນປະເທດປະສານງານສາຍພົວພັນຈີນ-ອາຊຽນ, ໂດຍມີລັດຖະມົນຕີກະຊວງການຕ່າງປະເທດຂອງປະເທດສະມາຊິກອາຊຽນແລະທ່ານເລຂາທິການໃຫຍ່ອາຊຽນເຂົ້າຮ່ວມກອງປະຊຸມຄັ້ງນີ້.
ທ່ານຫວາງຢີ້ກ່າວເນັ້ນວ່າ: ຕະຫຼອດໄລຍະ 30 ປີຜ່ານມາ, ຈີນແລະອາຊຽນໄດ້ກາຍເປັນຄູ່ການຄ້າໃຫຍ່ທີ່ສຸດ, ເປັນຄູ່ຮ່ວມມືທີ່ກວມຂົງເຂດການຮ່ວມມືກວ້າງຂວາງທີ່ສຸດ ແລະເປັນຄູ່ຮ່ວມຍຸດທະສາດທີ່ມີຊີວິດຊີວາຫຼາຍທີ່ສຸດ, ເຊິ່ງເປັນຍ້ອນສອງຝ່າຍໄດ້ຮັບຜົນປະໂຫຍດຈາກການໃຫ້ຄວາມສຳຄັນເຊິ່ງກັນແລະກັນເປັນອັນດັບໜຶ່ງໃນສາຍພົວພັນກັບຕ່າງປະເທດຂອງຕົນ, ຖືເອົາປະຊາຊົນເປັນກົກຢ່າງສະເໝີຕົ້ນສະເໝີປາຍ, ສຸມໃສ່ການຮ່ວມມືຕົວຈິງ, ຍຶດໝັ້ນໃນການພັດທະນາແບບເປີດກວ້າງຢ່າງສະເໝີຕົ້ນສະເໝີປາຍ, ເພື່ອບັນລຸເປົ້າໝາຍໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ, ຖືເອົາຜົນປະໂຫຍດລວມຂອງສອງຝ່າຍເປັນສິ່ງສຳຄັນຢ່າງສະເໝີຕົ້ນສະເໝີປາຍ, ຖືເອົາຂໍ້ຂັດແຍ້ງລະຫວ່າງສອງຝ່າຍໄວ້ໃນຖານະອັນເໝາະສົມ. ຈີນແລະອາຊຽນຄວນເລັງສາຍຕາໃສ່ 30 ປີຕໍ່ໜ້າ, ສ້າງສາຍພົວພັນຄູ່ຮ່ວມຍຸດທະສາດຈີນ-ອາຊຽນໃຫ້ມີລະດັບສູງກວ່າເກົ່າ, ສ້າງປະຊາຄົມຮ່ວມຊາຕາກຳທີ່ແໜ້ນແຟ້ນຍິ່ງຂຶ້ນ. ເພື່ອບັນລຸເປົ້າໝາຍດັ່ງກ່າວ, ຈີນມີຂໍ້ສະເໜີ 6 ຂໍ້ຄື:
ໜຶ່ງ, ຄວນລົງເລິກການຮ່ວມມືເພື່ອຕ້ານກັບພະຍາດໂຄວິດ-19. ສອງ, ຄວນຊຸກຍູ້ການຟື້ນຟູເສດຖະກິດ. ສາມ, ຄວນຍົກລະດັບສາຍພົວພັນຈີນ-ອາຊຽນໃຫ້ສູງຂຶ້ນ. ສີ່, ຄວນບັນລຸການເຊັນ “ກົດແຫ່ງການປະພຶດຂອງຝ່າຍຕ່າງໆໃນທະເລຈີນໃຕ້”ໂດຍໄວ. ຫ້າ, ຄວນຍຶດໝັ້ນໃນການປົກປັກຮັກສາລັດທິຫຼາຍຝ່າຍ. ຫົກ, ຄວນຮ່ວມກັນເສີມຂະຫຍາຍຄຸນຄ່າອາຊີ.
ບັນດາລັດຖະມົນຕີກະຊວງການຕ່າງປະເທດອາຊຽນໄດ້ຕີລາຄາສູງຕໍ່ຜົນສຳເລັດອັນໃຫຍ່ຫຼວງທີ່ຈີນຍາດມາໄດ້ໃນການຕ້ານກັບພະຍາດໂຄວິດ-19 ແລະການພັດທະນາເສດຖະກິດສັງຄົມ ໂດຍຢືນຢັນວ່າ ສາຍພົວພັນອາຊຽນ-ຈີນເປັນສາຍພົວພັນທີ່ສຳຄັນທີ່ສຸດແລະໄດ້ຮັບໝາກຜົນຫຼາຍທີ່ສຸດໃນບັນດາສາຍພົວພັນລະຫວ່າງອາຊຽນກັບຄູ່ເຈລະຈາ,ເຊິ່ງໄດ້ກາຍເປັນເສົາຄ້ຳສຳຄັນໃນການຮັກສາສັນຕິພາບ,ສະຖຽນລະພາບກັບການພັດທະນາແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້.
ຄຳເຫັນ
0