ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ໃນເວລາປະກອບຄຳເຫັນໃນກອງປະຊຸມເວທີປຶກສາຫາລືສັນຕິພາບໂລກຄັ້ງທີ 9, ທ່ານໂກຈົກຕົ່ງ ລັດຖະມົນຕີທີ່ປຶກສາແຫ່ງລັດກິດຕິມະສັກຂອງສິງກະໂປໄດ້ຕີລາຄາສູງຕໍ່ການພັດທະນາຂອງຈີນ. ກ່ຽວກັບເລື່ອງນີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 6 ກໍລະກົດນີ້ວ່າ, ຈີນສະແດງຄວາມຊົມເຊີຍຕໍ່ການຕີລາຄາທີ່ກ່ຽວຂ້ອງຂອງທ່ານໂກຈົກຕົ່ງ.
ຕາມຂ່າວແຈ້ງວ່າ, ໃນກອງປະຊຸມເວທີປຶກສາຫາລືສັນຕິພາບໂລກຄັ້ງທີ 9ທີ່ຈັດຂຶ້ນໃນຫວ່າງມໍ່ໆມານີ້, ທ່ານ ໂກຈົກຕົ່ງກ່າວວ່າ, ຈີນໄດ້ສຸມຄວາມພະຍາຍາມຍົກສູງລະດັບຄຸນນະພາບຊີວິດຂອງປະຊາຊົນໂດຍຜ່ານການເຕີບໂຕດ້ານເສດຖະກິດ, ແຕ່ບໍ່ແມ່ນສະແຫວງຫາການເປັນເຈົ້າອຳນາດຢູ່ອາຊີ ຫຼື ທ້າທາຍຖານະເຈົ້າອຳນາດໂລກຂອງອາເມຣິກາ, ການພັດທະນາຂອງຈີນໄດ້ເສີມຂະຫຍາຍບົດບາດທີ່ຕັ້ງໜ້າໃຫ້ກັບອາຊີ ກໍຄືໂລກ.
ໃນເວລາຕອບຄຳຖາມທີ່ກ່ຽວຂ້ອງຂອງນັກຂ່າວ, ທ່ານຈ້າວລີ້ຈ່ຽນຊີ້ອອກວ່າ, ກວ່າເວລາໃດໝົດໃນໂລກປະຈຸບັນນີ້, ຄວນຍຶດໝັ້ນການຮ່ວມມື ແລະເປີດປະຕູສູ່ພາຍນອກ, ປະຖິ້ມແນວຄິດເປັນປໍລະປັກກັນ ແລະ ປິດປະຕູ. ຈີນຈະສືບຕໍ່ຮ່ວມມືກັບກຳລັງທີ່ກ້າວໜ້າທັງໝົດຂອງໂລກເພື່ອກ້າວເດີນໄປໜ້າ, ເຊີດຊູຄ່ານິຍົມຮ່ວມຂອງມວນມະນຸດ ຄື ສັນຕິພາບ ການພັດທະນາ ຄວາມຍຸດຕິທຳ ຄວາມເປັນທຳ ປະຊາທິປະໄຕ ແລະ ເສລີພາບ, ຊຸກຍູ້ສັນຕິພາບ ແລະ ການພັດທະນາຮ່ວມກັນຂອງໂລກ, ຄັດຄ້ານລັດທິເຈົ້າອຳນາດ ແລະ ການເມືອງມະຫາອຳນາດ, ສູ້ຊົນຢ່າງບໍ່ລົດລະເພື່ອຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ຄຳເຫັນ
0