ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ກັນຍານີ້, ທ່ານເສີນຊີ້ ເອກອັກຄະລັດຖະທູດຂອງຄະນະຜູ້ແທນຈີນປະຈຳອົງການ ສປຊ ທີ່ເຊີແນວໄດ້ສົນທະນາກັບຜູ້ຊ່ຽວຊານອິດສະຫຼະກ່ຽວກັບບັນຫາລະບຽບ ການສາກົນທີ່ມີປະຊາທິປະໄຕແລະສະເໝີພາບໃນກອງປະຊຸມຄັ້ງທີ 48 ຂອງສະພາສິດທິມະນຸດ ສປຊ ແລະໄດ້ຕາງໜ້າປະເທດທີ່ມີຄວາມເຫັນຄ້າຍຄືກັນກ່າວຄຳເຫັນ ໂດຍຮຽກຮ້ອງໃຫ້ຝ່າຍຕ່າງໆປະຕິບັດລັດທິຫຼາຍຝ່າຍຢ່າງແທ້ຈິງ, ຊຸກຍູ້ໃຫ້ລະບຽບການສາກົນພັດທະນາໄປຕາມທິດທາງທີ່ຍຸຕິທຳແລະສົມເຫດສົມຜົນກວ່າເກົ່າ ເພື່ອເປັນການຄ້ຳປະກັນທີ່ແຂງແຮງໃຫ້ແກ່ການຊົມໃຊ້ສິດທິມະນຸດຢ່າງເຕັມສ່ວນ.
ທ່ານກ່າວວ່າ: ຝ່າຍຕ່າງໆຄວນຍຶດໝັ້ນຍຸຕິທຳແລະຄວາມເປັນທຳ, ເດັດດ່ຽວຮັກສາລະບົບສາກົນທີ່ຖືເອົາອົງການ ສປຊ ເປັນໃຈກາງ ແລະລະບຽບການສາກົນທີ່ຖືກົດໝາຍສາກົນເປັນພື້ນຖານ, ຄັດຄ້ານການຂົ່ມເຫັງປະເທດອ່ອນນ້ອຍ, ລັດທິ ຝ່າຍດຽວ ແລະໃຊ້ສອງມາດຕະຖານ, ແຕ່ຄວນຍຶດໝັ້ນການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ດຳເນີນການສົນທະນາແລະການຮ່ວມມືບົນພື້ນຖານທີ່ສະເໝີພາບແລະເຄົາລົບເຊິ່ງກັນແລະກັນ, ແກ້ໄຂຄວາມຂັດແຍ້ງໂດຍຜ່ານການປຶກສາຫາລື ແລະສົນທະນາກັນ, ບັນລຸຄວາມໝັ້ນຄົງທົ່ວໄປກັນໂດຍຜ່ານການຮ່ວມມືກັນ, ຊຸກຍູ້ການພັດທະນາແລະຈະເລີນຮຸ່ງເຮືອງຮ່ວມກັນ ແລະຄວນຍຶດໝັ້ນການເປີດປະຕູສູ່ພາຍນອກທີ່ມີຫຼາຍຝ່າຍເຂົ້າຮ່ວມ, ເຄົາລົບຄວາມຫຼາກຫຼາຍສີສັນຂອງອາລະຍະທຳ, ເຄົາລົບເສັ້ນທາງພັດທະນາທີ່ປະເທດຕ່າງໆຄັດເລືອກເອງ, ຫຼີກເວັ້ນການບັງຄັບໃຫ້ປະເທດອື່ນຕ້ອງໃຊ້ລະບອບແລະຮູບແບບສັງຄົມຂອງຕົນ ແລະກໍ່ຄວາມແບ່ງແຍກແລະການເປັນປໍລະປັກກັນ. ຝ່າຍຕ່າງໆຄວນຍຶດໝັ້ນຫຼັກການທົ່ວໄປ, ຍຸຕິທຳ, ພາວະວິໄສແລະບໍ່ມີການຈຳແນກໃນຂົງເຂດສິດທິມະນຸດ, ເພີ່ມທະວີຄວາມສາມັກຄີກັນ, ຮ່ວມມືກັນແລະການສົນທະນາທີ່ມີສະເໝີພາບກັນ, ບໍ່ຫັນບັນຫາສິດທະມະນຸດໃຫ້ເປັນບັນຫາການເມືອງ, ບໍ່ແຊກແຊງວຽກງານພາຍໃນຂອງປະເທດອື່ນ.
ຄຳເຫັນ
0