ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 21 ກັນຍານີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມການອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດຄັ້ງທີ 76 ແລະກ່າວຄຳປາໄສທີ່ມີຫົວຂໍ້ວ່າ “ຕ້ອງມີຄວາມໝັ້ນໃຈຢ່າງໜັກແໜ້ນ ຮ່ວມກັນຜ່ານຜ່າຄວາມຫຍຸ້ງຍາກ ຮ່ວມກັນສ້າງໂລກທີ່ດີງາມກວ່າເກົ່າ”ໃນຮູບແບບຜ່ານທາງວີດີໂອຈາກນະຄອນຫຼວງປັກກິ່ງ.
ທ່ານສີຈິ້ນຜິງກ່າວວ່າ: ປີນີ້ແມ່ນປີທີ່ພັກກອມມູນິດຈີນສ້າງຕັ້ງຂຶ້ນຄົບຮອບ 100 ປີ, ທັງແມ່ນປີທີ່ສປຈີນຟື້ນຟູທີ່ນັ່ງທີ່ຖືກຕ້ອງຕາມກົດໝາຍຢູ່ອົງການສະຫະປະຊາຊາດຄົບຮອບ 50 ປີ, ຈີນຈະລະນຶກເຫດການປະຫວັດສາດນີ້ຢ່າງຍິ່ງໃຫຍ່. ພວກເຮົາຈະສືບຕໍ່ຕັ້ງໜ້າຊຸກຍູ້ການຮ່ວມມືລະຫວ່າງຈີນກັບອົງການສະຫະປະຊາຊາດໃຫ້ກ້າວຂຶ້ນສູ່ລະດັບສູງກວ່າເກົ່າ, ປະກອບສ່ວນໃໝ່ໃຫຍ່ຫຼວງກວ່າເກົ່າເຂົ້າໃນພາລະກິດອັນສູງສົ່ງຂອງອົງການສະຫະປະຊາຊາດ.
ທ່ານສີຈິ້ນຜິງກ່າວເນັ້ນວ່າ: ເມື່ອ 1 ປີກ່ອນ, ຜູ້ນຳບັນດາປະເທດໄດ້ເຂົ້າຮ່ວມກອງປະຊຸມສຸດຍອດຕ່າງໆເພື່ອລະນຶກການສ້າງຕັ້ງອົງການສະຫະປະຊາຊາດຄົບຮອບ 75 ປີ, ໂດຍໄດ້ໃຫ້ຄຳໝັ້ນສັນຍາວ່າ ຈະຮ່ວມມືກັນຕ້ານກັບພະຍາດໂຄວິດ-19, ຮ່ວມກັນຮັບມືກັບສິ່ງທ້າທາຍ, ຍຶດໝັ້ນໃນລັດທິຫຼາຍຝ່າຍ, ເພີ່ມທະວີບົດບາດຂອງອົງການສະຫະປະຊາຊາດ, ສ້າງອະນາຄົດຮ່ວມໃຫ້ຄົນຍຸກປະຈຸບັນ ກໍຄືຄົນລຸ້ນຫຼັງ. ໃນ 1 ປີທີ່ຜ່ານມາ, ໂລກໄດ້ເກີດມີສະພາບການປ່ຽນແປງທີ່ບໍ່ເຄີຍມີມາກ່ອນໃນຮອບ 100 ປີຜ່ານມາ ແລະການແຜ່ລະບາດຂອງພະຍາດໂຄວິດ-19 ໃນທົ່ວໂລກມີຜົນສະທ້ອນຕໍ່ກັນຢ່າງສະຫຼັບສັບຊ້ອນ. ປະຊາຊົນບັນດາປະເທດມີຄວາມປາຖະໜາອັນແຮງກ້າກວ່າເກົ່າຕໍ່ສັນຕິພາບ ແລະ ການພັດທະນາ, ມີຄວາມຮຽກຮ້ອງສູງກວ່າເກົ່າຕໍ່ຄວາມຍຸຕິທຳ ແລະ ຄວາມເປັນທຳ, ມີຄວາມມຸ້ງຫວັງຢ່າງໜັກແໜ້ນກວ່າເກົ່າຕໍ່ການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ທ່ານສີຈິ້ນຜິງກ່າວເນັ້ນວ່າ, ປະຈຸບັນ, ພະຍາດໂຄວິດ-19 ຍັງຄົງແຜ່ລະບາດຢ່າງຮ້າຍແຮງໃນທົ່ວໂລກ, ສັງຄົມມະນຸດໄດ້ເກີດມີການປ່ຽນແປງຢ່າງເລິກເຊິ່ງ, ໂລກໄດ້ກ້າວເຂົ້າສູ່ໄລຍະທີ່ມີຄວາມວຸ້ນວາຍ ແລະ ເກີດມີການປ່ຽນແປງໃໝ່. ນັກການເມືອງທີ່ມີຄວາມຮັບຜິດຊອບທຸກຄົນຕ້ອງມີຄວາມໝັ້ນໃຈ ຄວາມກ້າຫານ ແລະຄວາມຮັບຜິດຊອບເພື່ອຄົ້ນຄວ້າ ແລະແກ້ໄຂບັນຫາຂອງຍຸກສະໄໝ, ແລະ ຕ້ອງມີທາງເລືອກປະຫວັດສາດ.
ທ່ານສີຈິ້ນຜິງໄດ້ມີຂໍ້ສະເໜີວ່າ:
ໜຶ່ງ, ພວກເຮົາຕ້ອງເອົາຊະນະການແຜ່ລະບາດຂອງພະຍາດໂຄວິດ-19, ຍາດເອົາໄຊຊະນະໃນການຕໍ່ສູ້ໃນບັ້ນສຳຄັນທີ່ພົວພັນເຖິງອະນາຄົດ ແລະ ຊາຕາກຳຂອງມວນມະນຸດ.
ສອງ, ພວກເຮົາຕ້ອງຟື້ນຟູເສດຖະກິດ, ຊຸກຍູ້ການພັດທະນາຂອງໂລກໃຫ້ເຂັ້ມແຂງ ສີຂຽວ ແລະປອດໃສກວ່າເກົ່າ, ຮ່ວມກັນຊຸກຍູ້ໃຫ້ການພັດທະນາຂອງໂລກກ້າວໄປສູ່ໄລຍະໃໝ່ທີ່ມີລັກສະນະດຸນດ່ຽງ ກົມກຽວ ແລະ ກວມລວມ.
ທ່ານສີຈິ້ນຜິງໄດ້ສະເໜີຂໍ້ລິເລີ່ມກ່ຽວກັບການພັດທະນາໂລກວ່າ:
ກ, ຍຶດໝັ້ນການຖືເອົາການພັດທະນາເປັນບຸລິມະສິດ. ຈັດເອົາການພັດທະນາໄວ້ໃນຖານະພົ້ນເດັ່ນໃນຂອບນະໂຍບາຍມະຫາພາກຂອງໂລກ, ເພີ່ມທະວີການປະສານງານດ້ານນະໂຍບາຍຂອງກຸ່ມເສດຖະກິດທີ່ສຳຄັນ, ຮັກສາລັກສະນະຕໍ່ເນື່ອງ ໝັ້ນທ່ຽງ ແລະ ຍືນຍົງ, ສ້າງການພົວພັນຄູ່ຮ່ວມການພັດທະນາໃນໂລກທີ່ມີຄວາມສະເໝີພາບ ແລະ ດຸນດ່ຽງກວ່າເກົ່າ, ຊຸກຍູ້ການປະສານສົມທົບກັນ ແລະ ເພີ່ມທະວີປະສິດທິພາບໃນຂະບວນການພັດທະນາແລະການຮ່ວມມືຫຼາຍຝ່າຍ, ເລັ່ງລັດການຈັດຕັ້ງປະຕິບັດວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດ.
ຂ, ຍຶດໝັ້ນການຖືເອົາປະຊາຊົນເປັນໃຈກາງ. ຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນ, ປົກປ້ອງ ແລະ ສົ່ງເສີມສິດທິມະນຸດໃນຂະບວນການພັດທະນາ, ບັນລຸເປົ້າໝາຍການພັດທະນາເພື່ອປະຊາຊົນ, ອາໄສປະຊາຊົນ, ໃຫ້ປະຊາຊົນໄດ້ຊົມໃຊ້ໝາກຜົນແຫ່ງການພັດທະນາຮ່ວມກັນ, ເຮັດໃຫ້ປະຊາຊົນມີຄວາມຮູ້ສຶກວ່າມີຄວາມສຸກ, ໄດ້ຮັບຜົນປະໂຫຍດ ແລະ ມີຄວາມປອດໄພເພີ່ມຂຶ້ນຢ່າງບໍ່ຢຸດຢັ້ງ, ບັນລຸການພັດທະນາຢ່າງຮອບດ້ານຂອງຄົນ.
ຄ, ຍຶດໝັ້ນໃນຫຼັກການທີ່ສ້າງປະໂຫຍດໃຫ້ທົ່ວເຖິງ ແລະ ກວມລວມ. ຕິດຕາມເອົາໃຈໃສ່ຄວາມຕ້ອງການພິເສດຂອງປະເທດພວມພັດທະນາ, ຜ່ານຮູບການຕ່າງໆ ເຊັ່ນ ເລື່ອນເວລາໄຊ້ໜີ້ສິນ, ຊ່ວຍເຫຼືອການພັດທະນາ ແລະ ອື່ນໆ ເພື່ອສະໜັບສະໜູນປະເທດພວມພັດທະນາ ໂດຍສະເພາະແມ່ນປະເທດທີ່ບໍ່ມີຄວາມເຂັ້ມແຂງທີ່ມີຄວາມຫຍຸ້ງຍາກໜັກໜ່ວງພິເສດ, ອອກແຮງແກ້ໄຂບັນຫາການພັດທະນາບໍ່ດຸນດ່ຽງ ແລະບໍ່ເຕັມສ່ວນ ລະຫວ່າງປະເທດ ແລະ ພາຍໃນປະເທດຕ່າງໆ.
ຈ, ຍຶດໝັ້ນການຂັບເຄື່ອນດ້ວຍການປະດິດສ້າງໃໝ່. ກຳແໜ້ນໂອກາດປະຫວັດສາດການປະຕິວັດວິທະຍາສາດເຕັກໂນໂລຢີ ແລະ ການປ່ຽນແປງໃໝ່ດ້ານອຸດສາຫະກຳຮອບໃໝ່, ເລັ່ງລັດຫັນປ່ຽນໝາກຜົນດ້ານວິທະຍາສາດເຕັກໂນໂລຢີໃຫ້ກາຍເປັນກຳລັງການຜະລິດຕົວຈິງ, ສ້າງສະພາບແວດລ້ອມດ້ານການພັດທະນາວິທະຍາສາດເຕັກໂນໂລຢີທີ່ເປີດກວ້າງ ຍຸຕິທຳ ເປັນທຳ ແລະບໍ່ມີການຈຳແນກ, ຂຸດຄົ້ນແຮງຂັບເຄື່ອນໃໝ່ເພື່ອຊຸກຍູ້ການເຕີບໂຕດ້ານເສດຖະກິດຫຼັງການແຜ່ລະບາດຂອງພະຍາດໂຄວິດ-19, ຮ່ວມມືກັນເພື່ອບັນລຸການພັດທະນາແບບກ້າວກະໂດດ.
ສ, ຍຶດໝັ້ນໃນຫຼັກການທີ່ມະນຸດ ແລະ ທຳມະຊາດຢູ່ຮ່ວມກັນຢ່າງກົມກຽວກັນ. ປັບປຸງການຄຸ້ມຄອງສິ່ງແວດລ້ອມຂອງໂລກ, ຕັ້ງໜ້າຮັບມືກັບການປ່ຽນແປງຂອງດິນຟ້າອາກາດ, ສ້າງປະຊາຄົມຮ່ວມຊີວິດລະຫວ່າງມະນຸດກັບທຳມະຊາດ.
ຊ, ຍຶດໝັ້ນໃນທິດທາງການປະຕິບັດງານ. ເພີ່ມທະວີການທຸ້ມເທຊັບພະຍາກອນເພື່ອການພັດທະນາ, ສຸມໃສ່ການຮ່ວມມືໃນຂົງເຂດຕ່າງໆ ເຊັ່ນ: ການຫຼຸດຜ່ອນຄວາມທຸກຍາກ, ຄວາມໝັ້ນຄົງດ້ານສະບຽງອາຫານ, ການຕ້ານພະຍາດ ແລະວັກຊີນ, ລະດົມທຶນເພື່ອການພັດທະນາ, ການປ່ຽນແປງຂອງດິນຟ້າອາກາດ ແລະ ການພັດທະນາແບບສີຂຽວ, ການຫັນເປັນອຸດສາຫະກຳ, ເສດຖະກິດດີຈີຕອນ, ການເຊື່ອມໂຍງເຊື່ອມຈອດ ແລະອື່ນໆ, ສ້າງປະຊາຄົມຮ່ວມຊາຕາກຳເພື່ອການພັດທະນາທົ່ວໂລກ.
ສາມ, ພວກເຮົາຕ້ອງເພີ່ມທະວີຄວາມສາມັກຄີ, ປະຕິບັດຕາມທັດສະນະການພົວພັນສາກົນທີ່ເຄົາລົບເຊິ່ງກັນແລະກັນ, ແລະຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ.
ສີ່, ພວກເຮົາຕ້ອງປັບປຸງການບໍລິຫານໂລກໃຫ້ສົມບູນກວ່າເກົ່າ, ຈັດຕັ້ງປະຕິບັດລັດທິຫຼາຍຝ່າຍຢ່າງແທ້ຈິງ.
ໃນໄລຍະສຸດທ້າຍຂອງຄຳປາໄສ, ທ່ານສີຈິ້ນຜິງກ່າວເນັ້ນວ່າ: ໂລກໄດ້ຢືນຢູ່ທາງແບ່ງຂອງປະຫວັດສາດອີກຄັ້ງໜຶ່ງ. ຂ້າພະເຈົ້າເຊື່ອໝັ້ນວ່າ, ກະແສຟອງແຫ່ງສັນຕິພາບ ການພັດທະນາ ແລະຄວາມກ້າວໜ້າຂອງມວນມະນຸດຈະບໍ່ມີສິ່ງໃດສາມາດສະກັດກັ້ນໄດ້. ຂໍໃຫ້ພວກເຮົາຈົ່ງມີຄວາມໝັ້ນໃຈຢ່າງໜັກແໜ້ນ, ຮ່ວມມືກັນຮັບມືກັບໄພຂົ່ມຂູ່ ແລະສິ່ງທ້າທາຍຂອງໂລກ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ຮ່ວມກັນສ້າງໂລກທີ່ດີງາມກວ່າເກົ່າ.
ຄຳເຫັນ
0