ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 28 ກັນຍານີ້, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວວ່າ: ຈີນສະໜັບສະໜູນສົນທິສັນຍາວ່າດ້ວຍການເກືອດຫ້າມການທົດລອງອາວຸດນີວເຄລຍຮອບດ້ານ ໃຫ້ມີຜົນສັກສິດໂດຍໄວ ແລະຈະສືບຕໍ່ປະກອບສ່ວນໃນເລື່ອງນີ້ ທັງຈະສຸມຄວາມພະຍາຍາມຢ່າງບໍ່ລົດລະເພື່ອບັນລຸເປົ້າໝາຍອັນສູງສົ່ງໃນການເກືອດຫ້າມຢ່າງຮອບດ້ານແລະທຳລາຍອາວຸດນີວເຄຍຢ່າງສິ້ນເຊີງ.
ຕາມຂ່າວແຈ້ງວ່າ: ສະພາຄວາມໝັ້ນຄົງອົງການສະຫະປະຊາຊາດຈະຈັດກອງປະຊຸມໃນວັນທີ 28 ກັນຍານີ້, ເພື່ອລະນຶກການເຊັນສົນທິສັນຍາວ່າດ້ວຍການເກືອດຫ້າມການທົດລອງອາວຸດນີວເຄລຍຮອບດ້ານຄົບຮອບ 25 ປີ, ບັນດາຝ່າຍຈະຮຽກຮ້ອງໃຫ້ສືບຕໍ່ສຸມຄວາມພະຍາຍາມເພື່ອຊຸກຍູ້ສົນທິສັນຍາສະບັບນີ້ໃຫ້ມີຜົນສັກສິດໂດຍໄວ ແລະມຸ້ງໜ້າໄປສູ່ການບັນລຸເປົ້າໝາຍທີ່ໂລກປອດອາວຸດນີວເຄລຍໂດຍໄວ.
ທ່ານນາງຮວ້າຊຸ່ນຢິງກ່າວວ່າ: ການຮ່ວມມືດ້ານເຮືອດຳນ້ຳນີວເຄລຍລະຫວ່າງອາເມຣິກາ ອັງກິດແລະອົສຕຣາລີມີຄວາມສ່ຽງຢ່າງຮ້າຍແຮງໃນການແຜ່ຜາຍອາວຸດນີວເຄລຍ, ໄດ້ຝືນກັບເນື້ອໃນຈິດໃຈຂອງສົນທິສັນຍາບໍ່ແຜ່ຜາຍອາວຸດນີວເຄລຍ, ເຊິ່ງຈະສ້າງແບບຢ່າງບໍ່ດີໃນປະຫວັດສາດ, ແລະຈະເປັນການກະຕຸກຊຸກຍູ້ໃຫ້ປະເທດອື່ນໆພາກັນຮຽນເອົາເປັນແບບຢ່າງ, ຖືວ່າເປັນການທຳລາຍກົນໄກສາກົນວ່າດ້ວຍການບໍ່ແຜ່ຜາຍອາວຸດນີວເຄລາຍ, ເຮັດໃຫ້ການແຂ່ງຂັນກຳລັງຮົບໃນພາກພື້ນຮຸນແຮງຂຶ້ນ, ປະຊາຄົມໂລກຄວນສາມັກຄີກັນເພື່ອຮ່ວມກັນຄັດຄ້ານສາມປະເທດດັ່ງກ່າວທີ່ໄດ້ຮ່ວມມືໃນດ້ານເຮືອດຳນ້ຳນີວເຄລຍ, ຕ້ອງບໍ່ປ່ອຍປະລະເລີຍເລື່ອງນີ້ເດັດຂາດ.
ຄຳເຫັນ
0