ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 28 ກັນຍານີ້, ທ່ານວາງຢີ້, ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນ ກັບທ່ານ ໂຈເຊ ໂບເຣວ, ຜູ້ແທນຂັ້ນສູງດ້ານນະໂຍບາຍການຕ່າງປະເທດແລະຄວາມໝັ້ນຄົງຂອງສະຫະພາບເອີຣົບ ຮ່ວມກັນເປັນເຈົ້າພາບຈັດງານສົນທະນາທາງຍຸດທະສາດລະດັບສູງລະຫວ່າງຈີນກັບສະຫະພາບເອີຣົບຮອບທີ 11.
ທ່ານວາງຢີ້ກ່າວວ່າ: ອາເມຣິກາ, ອັງກິດແລະອົສຕຼາລີໄດ້ສ້າງການພົວພັນຄູ່ຮ່ວມຄວາມໝັ້ນຄົງ 3 ຝ່າຍ ແລະວາງແຜນຈະດຳເນີນການຮ່ວມມືສ້າງເຮືອດຳນ້ຳນິວເຄຼຍ, ປະຊາຄົມໂລກ ໂດຍສະເພາະແມ່ນປະເທດອາຊີປາຊິຟິກ ມີຄວາມສົນໃຈ ແລະມີຄວາມກັງວົນຕໍ່ເລື່ອງນີ້ໃນລະດັບສູງ, ຫຼາຍປະເທດໄດ້ສະແດງຄວາມເປັນຫ່ວງແລະຄວາມສົງໄສ. ຝ່າຍຈີນເຫັນວ່າ ເລື່ອງນີ້ຈະເປັນໄພຂົ່ມຂູ່ແຝງຊ້ອນ 3 ຢ່າງ ຕໍ່ສັນຕິພາບ ສະຖຽນລະພາບໃນພາກພື້ນ ແລະລະບຽບການສາກົນ, ຄື:
ໜຶ່ງ, ໄພແຝງຊ້ອນທີ່ຈະພາໃຫ້ກັບຄືນໄປສູ່ຍຸກສົງຄາມເຢັນ, ສອງ, ໄພແຝງຊ້ອນທີ່ຈະພາໃຫ້ເກີດມີການແຂ່ງຂັນດ້ານອາວຸດຍຸດໂທປະກອນທາງການທະຫານ, ສາມ, ໄພແຝງຊ້ອນທີ່ຈະພາໃຫ້ເກີດມີການແຜ່ຜາຍອາວຸດນິວເຄຼຍ.
ທ່ານວາງຢີ້ກ່າວເນັ້ນວ່າ, ໃນເວລາ ອາເມຣິກາ, ອັງກິດແລະອົສຕຼາລີ ເພີ່ມທະວີການພົວພັນດ້ານການທະຫານ ໄດ້ເຮັດໃຫ້ການເປັນປໍລະປັກກັນລະຫວ່າງກຸ່ມຕ່າງໆຮ້າຍແຮງຂຶ້ນຕື່ມ, ຈີນໄດ້ສະເໜີຂໍ້ລິເລີ່ມກ່ຽວກັບການພັດທະນາໂລກ, ສະໝັກເຂົ້າຮ່ວມສັນຍາການພົວພັນຄູ່ຮ່ວມມືຂ້າມປາຊິຟິກຮອບດ້ານແລະກ້າວໜ້າ ຢ່າງເປັນທາງການ. ແມ່ນໃຜກຳລັງປຸກປັ່ນກະແສການປະທະກັນແລະການເປັນປໍລະປັກກັນ, ແມ່ນໃຜສ້າງໄພອັນຕະລາຍຕໍ່ສັນຕິພາບແລະສະຖຽນລະພາບ, ແມ່ນໃຜກຳລັງຊຸກຍູ້ການເຊື່ອມໂຍງເຂົ້າກັນໃນພາກພື້ນ, ຊຸກຍູ້ສັນຕິພາບແລະການພັດທະນາ, ນີ້ເປັນເລື່ອງທີ່ແຕກຕ່າງກັນຢ່າງຈະແຈ້ງ. ພວກເຮົາຮຽກຮ້ອງໃຫ້ສາມປະເທດດັ່ງກ່າວ ຈົ່ງເດີນຕາມກະແສຂອງຍຸກສະໄໝ, ປ່ຽນຂໍ້ຕົກລົງ, ເພື່ອເສີມຂະຫຍາຍບົດບາດຂອງຕົນໃນລັກສະນະສ້າງສັນທີ່ມີຕໍ່ສັນຕິພາບແລະສະຖຽນລະພາບຂອງພາກພື້ນ.
ຄຳເຫັນ
0