ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 2 ຕຸລານີ້, ເວົ້າສຳລັບອາເມຣິກາແລ້ວ, ເປັນມື້ທີ່ມືດມົນທີ່ສຸດ. ມື້ນັ້ນ, ຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາມີເຖິງ 700.258 ຄົນ, ທ່ານໂຈ ໄບເດັນ ປະທານາທິບໍດີອາເມຣິກາຈິ່ງໄດ້ອອກຖະແຫຼງການ ເພື່ອສະແດງຄວາມໄວ້ອາໄລຕໍ່ຜູ້ເສຍຊີວິດ ແລະ ຮຽກຮ້ອງໃຫ້ປະຊາຊົນອາເມຣິກາພາກັນໄປສັກວັກຊິນ.
ໃນວັນທີ 29 ມີນາປີກາຍນີ້, ທ່ານໂດໂນ ທຣຳ ອະດີດປະທານາທິບໍດີອາເມຣິກາກໍ່ເຄີຍໄດ້ບອກນັກຂ່າວວ່າ: ຖ້າລັດຖະບານອາເມຣິກາບໍ່ໃຊ້ມາດຕະການຕົວຈິງ, ຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາອາດຈະສູງເຖງ 2,2 ລ້ານຄົນ. ໃນເວລານັ້ນ, ຫຼາຍຄົນຖືວ່າຄຳເວົ້າຂອງທ່ານໂດໂນ ທຣຳ ເປັນເລື່ອງຕະຫຼົກ. ເພາະວ່າ: ບໍ່ມີໃຜເຊື່ອວ່າ: ອາເມຣິກາທີ່ເປັນປະເທດທີ່ມີເງື່ອນໄຂທາງການແພດທີ່ດີທີ່ສຸດໃນໂລກຈະບໍ່ສາມາດຜ່ານຜ່າການທົດສອບຈາກການແຜ່ລະບາດຂອງພະຍາດໂຄວິດ-19 ໄດ້.
ວັນທີ 19 ມັງກອນປີນີ້, ຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາໄດ້ມີຫຼາຍກວ່າ 4 ແສນຄົນ ເຊິ່ງເທົ່າກັບຈຳນວນຊາວອາເມຣິກາທີ່ຜູ້ເສຍຊີວິດໃນສົງຄາມໂລກຄັ້ງທີ 2; ວັນທີ 20 ກັນຍານີ້, ຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາມີເຖິງ 675.885 ຄົນ ເຊິ່ງຫຼາຍກວ່າຈຳນວນຜູ້ເສຍຊີວິດໃນໄລຍະຂອງການລະບາດຂອງໄຂ້ຫວັດໃຫຍ່ ທີ່ເກີດຂຶ້ນຢູ່ອາເມຣິກາໃນປີ 1918. ປັດຈຸບັນ, ເມື່ອຈຳນວນຜູ້ເສຍຊີວິດຍ້ອນເປັນພະຍາດດັ່ງກ່າວຢູ່ອາເມຣິກາມີຫຼາຍກວ່າ 7 ແສນຄົນແລ້ວ, ຄົນທັງຫຼາຍຈະຈຳເປັນຕ້ອງໄດ້ທົບທວນຄືນຄຳເວົ້າຂອງທ່ານໂດໂນ ທຣຳ ໃນປີກາຍນີ້.
ແຕ່ສິ່ງທີ່ໜ້າເປັນຫ່ວງນັ້ນກໍຄື: ສະພາບການແຜ່ລະບາດຂອງພະຍາດໂຄວິດ-19 ຢູ່ອາເມຣິກາບໍ່ໄດ້ປະກົດມີທ່ວງທ່າທີ່ດີຂຶ້ນ, ຢູ່ຫຼາຍລັດທາງພາກເໜືອອາເມຣິກາ, ສະພາບການແຜ່ລະບາດຂອງພະຍາດກໍ່ນັບມື້ນັບຮ້າຍແຮງຂຶ້ນ. ມາຮອດເວລາ 5 ໂມງເຄິ່ງຂອງວັນທີ 10 ຕຸລານີ້ຕາມເວລາວຽງຈັນ, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ອາເມຣິກາລວມທັງໝົດມີເຖິງ 45.176.843 ກໍລະນີ, ມີຜູ້ເສຍຊີວິດລວມທັງໝົດ 732.954 ຄົນ. ໃນໄລຍະເວລາບໍ່ຮອດໜຶ່ງອາທິດ, ຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ມີເກືອບ 4,6 ແສນກໍລະນີ ແລະ ມີປະຊາຊົນອາເມຣິກາ 3 ໝື່ນກວ່າຄົນເສຍຊີວິດຍ້ອນເປັນພະຍາດດັ່ງກ່າວ.
ແຕ່ວ່າ: ໃນຂະນະທີ່ພະຍາດໂຄວິດ-19 ໄດ້ແຜ່ລະບາດຢູ່ອາເມຣິກາຮ້າຍແຮງຄືແນວນີ້, ບຸກຄົນທີ່ “ຄັດຄ້ານການຕ້ານການແຜ່ລະບາດຂອງພະຍາດ” ຢູ່ອາເມຣິກາຈຳນວນໜຶ່ງພັດໄດ້ຄັດຄ້ານການໃສ່ຜ້າປິດປາກ, ຄັດຄ້ານການສັກວັກຊິນ, ຈົນເຖິງຂັ້ນຕໍ່ຕ້ານມາດຕະການປ້ອງກັນແລະຄວບຄຸມການແຜ່ລະບາດຂອງພະຍາດຂອງລັດຖະບານອາເມຣິກາດ້ວຍກຳລັງຮຸນແຮງ ດ້ວຍຂໍ້ອ້າງທີ່ວ່າ: “ປະຊາທິປະໄຕ”, “ເສລີພາບ” ແລະ “ສິດທິມະນຸດ”.
ອັນທີ່ເອີ້ນວ່າປະຊາທິປະໄຕ, ໝາຍເຖິງປະຊາຊົນເປັນເຈົ້າຕົນເອງ, ແຕ່ພັດໄດ້ເສຍຊີວິດຍ້ອນເປັນພະຍາດ, ຄັນຊັ້ນ, ຈະເປັນເຈົ້າຕົນເອງໄດ້ຄືແນວໃດ? ອັນທີ່ເອີ້ນວ່າເສລີພາບ, ຕ້ອງເປັນເສລີພາບທີ່ຍັງມີຊີວິດຢູ່, ຖ້າຄົນທີ່ລ່ວງລັບໄປແລ້ວ, ເສລີພາບກໍຈະບໍ່ມີຄວາມໝາຍຫຍັງເລີຍ. ອັນທີ່ເອີ້ນວ່າສິດທິມະນຸດ ກໍເຊັ່ນກັນ. ປະຊາຊົນອາເມຣິກາ 7 ແສນຄົນທີ່ເສຍຊີວິດຍ້ອນເປັນພະຍາດໂຄວິດ-19, ໃຜຈະເປັນຜູ້ປົກປ້ອງສິດທິມະນຸດຂອງພວກເຂົາເຈົ້າ?
“ເສລີພາບ” ຈະບໍ່ສາມາດປ້ອງກັນແລະຄວບຄຸມພະຍາດໂຄວິດ-19 ໄດ້, “ປະຊາທິປະໄຕ” ກໍບໍ່ສາມາດສະກັດກັ້ນການແຜ່ລະບາດຂອງພະຍາດໂຄວິດ-19ໄດ້, “ສິດທິມະນຸດ” ກໍບໍ່ສາມາດເຮັດໃຫ້ປະຊາຊົນອາເມຣິກາທີ່ເສຍຊີວິດຍ້ອນເປັນພະຍາດ ນັ້ນສາມາດໄປປ່ອນບັດຄັດຄ້ານຕາມຈຸດປະສົງຂອງເຂົາເຈົ້າໄດ້. ໃນຂະນະທີ່ຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາມີຫຼາຍກວ່າ 7 ແສນຄົນແລ້ວ, ອາເມຣິກາໄດ້ຕີລະຄັງ 700 ເທື່ອ ເພື່ອສະແດງການໄວ້ອາໄລເຖິງຜູ້ເສຍຊີວິດ 7 ແສນຄົນ. ໃນສະພາບການແບບນີ້, ຖ້າອາເມຣິກາບໍ່ປະຕິບັດຕາມມາດຕະການຢ່າງບັງເກີດຜົນ ເພື່ອສະກັດກັ້ນການແຜ່ລະບາດຂອງພະຍາດໂຄວິດ-19, ທຸກຮູບແບບໃນການໄວ້ອາໄລກໍຈະບໍ່ມີຄວາມໝາຍຫຍັງເລີຍ!
ຄຳເຫັນ
0