ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 18 ຕຸລານີ້, ມີນັກຂ່າວຖາມວ່າ: ຫວ່າງກ່ອນນີ້ບໍ່ດົນ, ພິທີສົ່ງມອບລົດໄຟຂະບວນລ້ານຊ້າງທີ່ຈະໃຊ້ໃນທາງລົດໄຟຈີນ-ລາວ ໄດ້ຈັດຂຶ້ນຢູ່ນະຄອນຫຼວງວຽງຈັນ. ມີສື່ມວນຊົນວິເຄາະວ່າ: ທາງລົດໄຟຈີນ-ລາວ ຈະນຳເອົາຄວາມສຸກແລະຄວາມຈະເລີນຮຸ່ງເຮືອງມາສູ່ປະຊາຊົນສອງຊາດ. ຂໍຖາມແດ່ ທ່ານໂຄສົກມີຄວາມຄິດເຫັນແນວໃດກ່ຽວກັບເລື່ອງນີ້?
ທ່ານ ຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນຕອບວ່າ: ທາງລົດໄຟຈີນ-ລາວ ແມ່ນໝາກຜົນທີ່ເປັນສັນຍະລັກຂອງການເຊື່ອມຈອດກັນລະຫວ່າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ກັບ ຍຸດທະສາດ “ຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດ” ຂອງປະເທດລາວ. ການສົ່ງມອບລົດໄຟຂະບວນລ້ານຊ້າງ ແມ່ນຂີດໝາຍທີ່ສຳຄັນອັນໜຶ່ງ ເຊິ່ງສະແດງໃຫ້ເຫັນວ່າ: ທາງລົດໄຟຈີນ-ລາວ ຈາກໄລຍະການກໍ່ສ້າງ ຈະກ້າວເຂົ້າສູ່ໄລຍະບໍລິການ. ນີ້ແມ່ນເລື່ອງດີ ແລະເປັນສິລິມຸງຄຸນ ທີ່ຈະສ້າງຄວາມສຸກໃຫ້ແກ່ປະຊາຊົນສອງຊາດຈີນ-ລາວ. ທາງລົດໄຟເສັ້ນນີ້ ໄດ້ສ່ອງແສງໃຫ້ເຫັນເຖິງຈິດໃຈທີ່ປຶກສາຫາລືຮ່ວມກັນ, ສ້າງສາຮ່ວມກັນ ແລະຊົມໃຊ້ຮ່ວມກັນ, ເຊິ່ງຈະເປັນການຍົກສູງລະດັບພື້ນຖານໂຄງລ່າງ ແລະ ການເຊື່ອມໂຍງເຊື່ອມຈອດກັນຂອງປະເທດລາວ ກໍຄືຂອງພາກພື້ນ ທັງຊຸກຍູ້ເສດຖະກິດໃຫ້ມີການພັດທະນາແບບຍືນຍົງ.
ທ່ານ ຈ້າວລີ້ຈ່ຽນ ກ່າວເນັ້ນໜັກວ່າ: ປີນີ້ ແມ່ນປີທີ່ຈີນລາວສ້າງຕັ້ງສາຍພົວພັນທາງການທູດຄົບຮອບ 60 ປີ ທັງເປັນປີມິດຕະພາບຈີນ-ລາວ. ຈີນຍິນດີຮ່ວມກັບລາວ ຖືເລື່ອງນີ້ເປັນໂອກາດທີ່ດີ, ຕັ້ງໜ້າເຊື່ອມຕໍ່ກັບຍຸດທະສາດການພັດທະນາ, ລົງເລິກການຮ່ວມມືທາງຍຸດທະສາດຮອບດ້ານ, ຊຸກຍູ້ການສ້າງໂຄງການຕ່າງໆ ເຊັ່ນ: ທາງລົດໄຟ ເປັນຕົ້ນຢ່າງໜັກແໜ້ນ ເພື່ອສ້າງປະຊາຄົມຮ່ວມຊາຕາກຳຈີນ-ລາວ.
ຄຳເຫັນ
0