ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 16 ຕຸລານີ້, ລົດໄຟລາວ-ຈີນ EMU ຂະບວນ “ລ້ານຊ້າງ” ໄດ້ເດີນທາງໄປເຖິງນະຄອນຫຼວງວຽງຈັນຂອງ ສປປ ລາວແລ້ວ, ສອງຝ່າຍລາວ-ຈີນໄດ້ຈັດພິທີສົ່ງມອບລົດໄຟດັ່ງກ່າວຢູ່ສະຖານີລົດໄຟວຽງຈັນ.
ການອອກແບບແລະຜະລິດລົດໄຟ EMU ຂະບວນ “ລ້ານຊ້າງ” ແມ່ນສ່ວນປະກອບສຳຄັນຂອງການສ້າງທາງລົດໄຟລາວ-ຈີນ ເຊິ່ງໄດ້ຮັບຄວາມເອົາໃຈໃສ່ໃນລະດັບສູງຈາກພັກແລະລັດຖະບານລາວ, ທ່ານທອງລຸນ ສິສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວໄດ້ຊີ້ນຳແລະກວດກາແຜນການອອກແບບດ້ວຍຕົນເອງ, ທ່ານພັນຄຳ ວິພາວັນ ນາຍົກລັດຖະມົນຕີລາວກໍໄດ້ຕັ້ງຊື່ໃຫ້ລົດໄຟ EMU ວ່າ: ຂະບວນ “ລ້ານຊ້າງ” ເຊິ່ງແມ່ນຜົນງານການປະສານສົມທົບກັນທາງດ້ານສະຕິປັນຍາແລະຄວາມພະຍາຍາມຂອງປະຊາຊົນທັງສອງປະເທດ, ທັງຈະກາຍເປັນຂີດໝາຍທີ່ປະຊາຊົນລາວຈະນຳພາປະເທດຊາດໄປສູ່ຄວາມຮັ່ງມີຂຶ້ນ ທັງແມ່ນການສະແຫວງຫາຊີວິດການເປັນຢູ່ທີ່ດີງາມ. ການສົ່ງມອບລົດໄຟ EMU ຢ່າງເປັນທາງການແລະສະດວກ, ເປັນຂີດໝາຍສະແດງໃຫ້ເຫັນວ່!: ທາງລົດໄຟລາວ-ຈີນຈາກໄລຍະກໍ່ສ້າງພວມກ້າວໄປສູ່ໄລຍະເປີດບໍລິການ, ເປັນການປະກາດໃຫ້ຮູ້ວ່າ: ສປປ ລາວກຳລັງກ້າວເຂົ້າສູ່ຍຸກສະໄໝແຫ່ງການຂົນສົ່ງດ້ວຍທາງລົດໄຟ, ປະຊາຊົນລາວຈະພົບກັບຍຸກສະໄໝໃໝ່ແຫ່ງການປ່ຽນແປງດ້ານການຂົນສົ່ງຂອງ ສປປ ລາວ.
ປະເທດລາວມີຊັບພະຍາກອນບໍ່ແຮ່ອັນອຸດົມສົມບູນ, ແຕ່ຍ້ອນວ່າການຄົມມະນາຄົມຍັງຢູ່ໃນໄລຍະການພັດທະນາ, ສະນັ້ນ, ເສດຖະກິດຂອງລາວໃນຫຼາຍປີຜ່ານມາຈິ່ງຖືເອົາກະສິກຳເປັນຕົ້ນຕໍ. ສຳລັບປະເທດລາວເຊິ່ງເປັນປະເທດບໍ່ຕິດຈອດກັບທະເລ, ຖ້າມີທາງລົດໄຟສາຍໜຶ່ງທີ່ສາມາດເຊື່ອມຕໍ່ກັບປະເທດອື່ນໄດ້, ກໍຈະສາມາດຊຸກຍູ້ການຄ້າກັບຕ່າງປະເທດຂອງລາວໄດ້ຢ່າງຫຼວງຫຼາຍ, ສະນັ້ນໃນ “ແຜນການພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 8” ຂອງປະເທດລາວ, ທາງລົດໄຟລາວ-ຈີນໄດ້ຖືກຈັດເຂົ້າເປັນໂຄງການສຳຄັນຂອງຊາດໂຄງການໜຶ່ງ.
ພາຍໃຕ້ການນຳພາທີ່ເຂັ້ມແຂງຂອງຜູ້ນຳທັງສອງປະເທດລາວ-ຈີນ, ພາຍໃຕ້ຄວາມເອົາໃຈໃສ່ແລະການວາງແຜນການໂດຍກົງຂອງຜູ້ນຳສູງສຸດທັງສອງປະເທດ, ການສ້າງທາງລົດໄຟລາວຈີນສາມາດຜ່ານຜ່າຄວາມຫຍຸ້ງຍາກໄດ້, ແລະກ້າວໄປຂ້າງໜ້າພາຍໃຕ້ສະພາບການຂອງການແຜ່ລະບາດຂອງພະຍາດໂຄວິດ-19, ແລະໄດ້ຮັບຜົນງານທີປະຈັກຕາຊາວໂລກ. ໂດຍຜ່ານການກໍ່ສ້າງເປັນໄລຍະເວລາ 5 ປີ, ປະເທດລາວໄດ້ຕ້ອນຮັບມາລົດໄຟທັນສະໄໝຂະບວນທຳອິດທີ່ຂຶ້ນກັບປະເທດຕົນໃນປະຫວັດສາດຂອງຊາດ. ນີ້ແມ່ນຄວາມຄືບໜ້າທີ່ມີລັກສະນະຕັດສິນໃນຂະບວນການກໍ່ສ້າງທາງລົດໄຟລາວ-ຈີນ, ທັງເປັນໝາກຜົນຕົວຈິງທີ່ເປັນສັນຍາລັກໃນໂຄງການເຊື່ອມຕໍ່ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນກັບຍຸດທະສາດຫັນຈາກປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດຂອງລາວ ເຊິ່ງໄດ້ສ້າງພື້ນຖານອັນໝັ້ນແກ່ນໃຫ້ແກ່ທາງລົດໄຟລາວ-ຈີນເປີດບໍລິການໃນວັນທີ 2 ທັນວາປີ້ນີ້ເຊິ່ງພໍດີເປັນວັນຊາດແຫ່ງ ສປປ ລາວ.
ໃນພິທີໄຂກອງປະຊຸມວຽກງານຄົມມະນາຄົມແບບຍືນຍົງທົ່ວໂລກຂອງອົງການສະຫະປະຊາຊາດສະໄໝທີ່ສອງທີ່ຈັດຂຶ້ນໃນເມື່ອບໍ່ດົນມານີ້, ທ່ານສີຈິ້ນຜິງ ປະທານປະເທດຈີນໄດ້ກ່າວຄຳປາໄສໂດຍສະເໜີວ່າ: ຄວນເສີມຂະຫຍາຍບົດບາດນຳໜ້າໃນວຽກງານຄົມມະນາຄົມ, ນີ້ກໍເປັນທິດນຳໃຫ້ແກ່ວຽກງານການເຄື່ອນໄຫວຂອງທາງລົດໄຟລາວ-ຈີນ.
ກໍຄືດັ່ງຄວາມເວົ້າຂອງທ່ານຈ່ຽງຈ້າຍຕຸ່ງ ເອກອັກຄະລັດຖະທູດ ສປ ຈີນປະຈຳ ສປປ ລາວທີ່ກ່າວໃນພິທີສົ່ງ-ມອບຂະບວນລົດໄຟລາວ-ຈີນ EMU ຂະບວນລ້ານຊ້າງວ່າ: ໃນໄລຍະ 5 ປີທີ່ກໍ່ສ້າງທາງລົດໄຟລາວ-ຈີນ, ໄດ້ສ້າງໂອກາດວຽກງານທຳໃຫ້ປະຊາຊົນລາວໄດ້ຫຼາຍກວ່າ 1 ແສນ 1 ໝື່ນກວ່າຕຳແໜ່ງງານ, ຊ່ວຍເຫຼືອຊາວບ້ານທີ່ລຽບຕາມທາງລົດໄຟລາວ-ຈີນສ້າງເສັ້ນທາງແລະສ້າງຮ່ອງລະບາຍນ້ຳຍາວປະມານ 2000 ກິໂລແມັດ, ໃນຂະບວນການພັດທະນາແລະການເຄື່ອນໄຫວໄລຍະຕໍ່ໄປ, ສອງຝ່າຍຄວນສືບຕໍ່ສ້າງຜົນປະໂຫຍດທີ່ປະຈັກຕາ ແລະ ແຕະຕ້ອງໄດ້ຈິງໃຫ້ຫຼາຍກວ່າເກົ່າໃຫ້ກັບປະຊາຊົນທົ່ວໄປ, ຊຸກຍູ້ການຮ່ວມມື “ໜຶ່ງແລວໜຶ່ງເສັ້ນທາງ” ແລະການສ້າງປະຊາຄົມຮ່ວມຊາຕາກຳຈີນ-ລາວຢ່າງແທ້ຈິງ.
ໃນໂອກາດເຂົ້າຮ່ວມພິທີສົ່ງມອບຂະບວນລົດໄຟລາວ-ຈີນດັ່ງກ່າວ, ທ່ານວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການແລະຂົນສົ່ງໄດ້ຕີລາຄາຢ່າງສູງຕໍ່ທາງລົດໄຟລາວ-ຈີນ. ທ່ານກ່າວວ່າ: ເມື່ອທາງລົດໄຟລາວ-ຈີນສ້າງສຳເລັດແລະເປີດບໍລິການແລ້ວ, ກໍຖືວ່າຜູ້ກໍ່ສ້າງທັງຫຼາຍໄດ້ຢືນຢັນຄຳໝັ້ນສັນຍາທີ່ສວຍງາມໃຫ້ແກ່ພັກ, ລັດແລະປະຊາຊົນທັງສອງປະເທດ. ລາວຈະພະຍາຍາມຮ່ວມກັນກັບຈີນ, ຢືນຢູ່ບົນຈິດໃຈການສ້າງປະຊາຄົມຮ່ວມຊາຕາກຳລາວ-ຈີນ, ສ້າງທາງລົດໄຟລາວ-ຈີນໃຫ້ເປັນໂຄງການລັກສະນະແຫ່ງມິດຕະພາບ, ສ້າງຄວາມຜາສຸກໃຫ້ແກ່ປະຊາຊົນທັງສອງປະເທດ.
ໃນໄລຍະ 5 ປີທີ່ສ້າງທາງລົດໄຟລາວ-ຈີນ, ໄດ້ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນຢູ່ລຽບຕາມທາງລົດໄຟ. ເຊື່ອວ່າ, ຄຽງຄູ່ກັບທາງລົດໄຟລາວ-ຈີນເປີດບໍລິການໃນວັນທີ 2 ທັນວານີ້ຢ່າງເປັນທາງການ, ການຮ່ວມມືເສດຖະກິດການຄ້າລະຫວ່າງລາວ-ຈີນຈະພັດທະນາຢ່າງຮອບດ້ານແລະໂຄງການກໍ່ສ້າງສຳຄັນຕ່າງໆໄດ້ຮັບການຈັດຕັ້ງປະຕິບັດຕົວຈິງເປັນກ້າວໆ, ພາບອະນາຄົດຂອງການຮ່ວມມືພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຈະກວ້າງຂວາງ ແລະ ສວຍງາມກວ່າເກົ່າ.
ຄຳເຫັນ
0