ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 29 ຕຸລານີ້, ທ່ານຫວາງຢີ້, ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານນາງ ເຣັດໂນ ມາຊູດີ, ລັດຖະມົນຕີກະຊວງການຕ່າງປະເທດອິນໂດເນເຊຍ ຢູ່ທີ່ນະຄອນຫຼວງໂຣມຂອງອີຕາລີ.
ສອງຝ່າຍໄດ້ແລກປ່ຽນຄວາມຄິດເຫັນ ກ່ຽວກັບການຮ່ວມມືຂອງກຸ່ມ G20. ທ່ານຫວາງຢີ້ກ່າວວ່າ: ຈີນສະໜັບສະໜູນອິນໂດເນເຊຍທີ່ຈະຈັດກອງປະຊຸມສຸດຍອດກຸ່ມ G20 ໃນປີໜ້າ, ຍິນດີຮ່ວມກັບອິນໂດເນເຊຍ ແລະຝ່າຍຕ່າງໆທີ່ກ່ຽວຂ້ອງ, ເຮັດໃຫ້ກອງປະຊຸມດັ່ງກ່າວ ເອົາໃຈໃສ່ນຳຄວາມຮຽກຮ້ອງທີ່ສົມເຫດສົມຜົນຂອງຕະຫຼາດທີ່ຈະເລີນໃໝ່ ແລະປະເທດພວມພັດທະນາ ໃຫ້ຫຼາຍກວ່າເກົ່າ. ທ່ານນາງ ເຣັດໂນ ມາຊູດີ ກ່າວວ່າ: ອິນໂດເນເຊຍຍິນດີຮ່ວມກັບຈີນ, ຊຸກຍູ້ກຸ່ມ G20 ຮັກສາຜົນປະໂຫຍດຮ່ວມຂອງຕະຫຼາດທີ່ຈະເລີນໃໝ່ ແລະປະເທດທີ່ພວມພັດທະນາ ໃຫ້ດີກວ່າເກົ່າ, ໃຫ້ຄວາມສຳຄັນແກ່ຄວາມເປັນຫ່ວງທີ່ສົມເຫດສົມຜົນຂອງປະເທດຜ້ານກາງ ແລະປະເທດນ້ອຍໃຫ້ຫຼາຍກວ່າເກົ່າ, ຮັບມືກັບສິ່ງທ້າທາຍຕ່າງໆໃນທົ່ວໂລກຢ່າງມີປະສິດທິຜົນຫຼາຍກວ່າເກົ່າ.
ນອກນີ້, ສອງຝ່າຍຍັງໄດ້ແລກປ່ຽນຄວາມຄິດເຫັນກ່ຽວກັບການຮ່ວມມືຈີນ-ອາຊຽນ ໂດຍມີຄວາມເຫັນເປັນເອກະພາບກັນວ່າ: ຈະເລັ່ງລັດການກະກຽມກອງປະຊຸມສຸດຍອດເພື່ອລະນຶກການສ້າງການພົວພັນຄູ່ສົນທະນາຈີນ-ອາຊຽນຄົບຮອບ 30 ປີ, ຊຸກຍູ້ການຍົກລະດັບການພົວພັນສອງຝ່າຍ ເພື່ອເພີ່ມພະລັງແຮງໃຫ້ກັບສັນຕິພາບ ແລະການພັດທະນາຂອງພາກພື້ນ.
ຄຳເຫັນ
0