ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 31 ຕຸລາຜ່ານມານີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມສຸດຍອດ G20 ຄັ້ງທີ 16 ຜ່ານທາງວິດີໂອຢູ່ນະຄອນຫຼວງປັກກິ່ງ ໂດຍໄດ້ປະກອບຄຳເຫັນກ່ຽວກັບການປ່ຽນແປງຂອງດິນຟ້າອາກາດ, ພະລັງງານການພັດທະນາແບບຍືນຍົງ ແລະບັນຫາອື່ນໆ.
ທ່ານສີຈິ້ນຜິງກ່າວວ່າ: ການປ່ຽນແປງຂອງດິນຟ້າອາກາດແລະບັນຫາພະລັງງານແມ່ນສິ່ງທ້າທາຍທີ່ພົ້ນເດັ່ນຂອງໂລກໃນປັດຈຸບັນ, ກ່ຽວພັນເຖິງຜົນປະໂຫຍດຮ່ວມຂອງປະຊາຄົມໂລກ ທັງກ່ຽວພັນເຖິງອະນາຄົດຂອງໜ່ວຍໂລກ. ປະຊາຄົມໂລກມີຄວາມປາຖະໜາແລະແຮງຂັບເຄື່ອນເພື່ອຮ່ວມກັນຮັບມືກັບສິ່ງທ້າທາຍເພີ່ມຂຶ້ນຢ່າງບໍ່ຢຸດຢັ້ງ, ແຕ່ສຳຄັນແມ່ນຕ້ອງມີການກະທຳຕົວຈິງ ຄື: ໜຶ່ງ, ຕ້ອງນຳໃຊ້ນະໂຍບາຍແລະມາດຕະການທີ່ມີຄວາມດຸ່ນດຽງແລະຮ້ອບດ້ານ. ຕ້ອງປະສານສົມທົບການອະນຸລັກສິ່ງແວດລ້ອມແລະການພັດທະນາເສດຖະກິດໃຫ້ເປັນເອກະພາບກັນ, ຕ້ອງຮັບມືກັບການປ່ຽນແປງຂອງດິນຟ້າອາກາດແລະຮັບປະກັນຊີວິດການເປັນຢູ່ຂອງປະຊາຊົນໄປຄວບຄູ່ກັນ, ກຸ່ມເສດຖະກິດຕົ້ນຕໍຄວນເພີ່ມທະວີການຮ່ວມມືໃນດ້ານນີ້; ສອງ, ຈັດຕັ້ງປະຕິບັດ “ສົນທິສັນຍາຂອບການປ່ຽນແປງຂອງດິນຟ້າອາກາດຂອງ ສປຊ” ແລະ “ສັນຍາປາຣີ” ຢ່າງຮອບດ້ານແລະມີປະສິດທິຜົນ. ຕ້ອງຍຶດໝັ້ນຖານະບົດບາດຂອງອົງການ ສປຊ ເປັນຊ່ອງທາງຫຼັກ, ຖືຫຼັກການ ຮ່ວມກັນແຕ່ມີຄວາມຮັບຜິດຊອບທີ່ແຕກຕ່າງກັນເປັນພື້ນຖານ, ຖືກົດໝາຍສາກົນເປັນພື້ນຖານ, ຖືການເຄື່ອນໄຫວທີ່ມີປະສິດທິຜົນເປັນທິດຊີ້ນຳ, ເພີ່ມທະວີການເຄື່ອນໄຫວວຽກງານຂອງຕົນ, ຍົງສູງລະດັບການຮ່ວມມື. ສາມ, ເພີ່ມທະວີການສະໜັບສະໜູນປະເທດພວມພັດທະນາ. ປະເທດສະມາຊິກກຸ່ມ G20 ຄວນນຳໜ້າຊຸກຍູ້ການສົ່ງເສີມແລະການນຳໃຊ້ເຕັກເນັກກ້າວໜ້າ, ປະເທດພັດທະນາແລ້ວກໍຄວນປະຕິບັດຕາມຄຳໝັ້ນສັນຍາ, ໃຫ້ການຊ່ວຍເຫຼືອດ້ານການເງິນແກ່ປະເທດພວມພັດທະນາ.
ທ່ານສີຈິ້ນຜິງຍັງກ່າວວ່າ: ປັດຈຸບັນ, ການແຜ່ລະບາດຂອງພະຍາດໂຄວິດ-19 ໄດ້ສ້າງວິກິດການຫຼາຍຢ່າງ, ຜົນສຳເລັດໃນການພັດທະນາ ຂອງປະຊາຄົມໂລກໃນຫຼາຍປີຜ່ານມາຖືກປັ່ນທອນຢ່າງໜັກໜ່ວງ, ປະເທດພວມພັດທະນາໄດ້ປະເຊີນໜ້າກັບຜົນກະທົບແລະການທົດສອບທີ່ບໍ່ເຄີຍມີມາກ່ອນ. ສະພາບພະຍາດໂຄວິດ-19 ສະແດງໃຫ້ເຫັນອີກຄັ້ງໜຶ່ງວ່າ: ປະເທດຕ່າງໆມີຊາຕາກຳຮ່ວມກັນ, ມີຜົນປະໂຫຍດທີ່ເຊື່ອມໂຍງເຂົ້າກັນ, ແມ່ນປະຊາຄົມຮ່ວມຊາຕາກຳຂອງມວນມະນຸດ. ການຊຸກຍູ້ການພັດທະນາແບບຍືນຍົງຂອງປະເທດພວມພັດທະນາ ຈະສ້າງຄວາມສຸກໃຫ້ກັບປະຊາຊົນຂອງປະເທດທີ່ກ່ຽວຂ້ອງ ທັງກ່ຽວພັນເຖິງອະນາຄົດແລະຊາຕາກຳຂອງມວນມະນຸດແລະໜ່ວຍໂລກ.
ຄຳເຫັນ
0