ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 5 ພະຈິກນີ້, ທ່ານອັນໂຕນີໂອ ກູເຕີເລສ ເລຂາທິການໃຫຍ່ອົງການ ສປຊ ໄດ້ກ່າວຄຳປາໄສໃນວັນຮັບຮູ້ສຶນາມິໂລກ ໂດຍຮຽກຮ້ອງໃຫ້ປະຊາຄົມໂລກຈົ່ງຍົກສູງຄວາມຮັບຮູ້ຕໍ່ຄື້ນສຶນາມິ ທີ່ເປັນໄພຂົ່ມຂູ່ຕໍ່ຊີວິດ ທັງແບ່ງປັນວິທີໃໝ່ເພື່ອຫຼຸດຄວາມສ່ຽງຈາກຄື້ນສຶນາມິ.
ທ່ານກູເຕີເລສ ກ່າວວ່າ: “ພວກເຮົາຕ້ອງສືບຕໍ່ພະຍາຍາມບົນພື້ນຖານຄວາມຄືບໜ້າທີ່ມີຢູ່ໃນປັດຈຸບັນ ລວມທັງໃຫ້ການບໍລິການຫຼາຍກວ່າເກົ່າແກ່ເຂດຊຸມຊົນທີ່ໄດ້ຮັບຜົນກະທົບຈາກຄື້ນສຶນາມິຢູ່ແຫ່ງຕ່າງໆຂອງໂລກ ແລະບັນຈຸແຜນການສຶນາມິເຂົ້າໃນແຜນຊຸກຍູ້ການພັດທະນາວິທະຍາສາດທະເລແບບຍືນຍົງຮອບ 10 ປີຂອງ ສປຊ.”
ທ່ານກ່າວຕື່ມວ່າ: ການເອົາໃຈໃສ່ວິທະຍາສາດ, ການເພີ່ມທະວີການຮ່ວມມືສາກົນ, ການປ້ອງກັນໄພພິບັດຢ່າງຕັ້ງໜ້າ ແລະການໃຊ້ການເຄື່ອນໄຫວໃນໄລຍະເບື້ອງຕົ້ນ ຄວນເປັນແກນກາງຂອງຄວາມພະຍາຍາມທັງໝົດໃນການຮັບປະກັນໃຫ້ປະຊາຊົນແລະເຂດຊຸມຊົນມີຄວາມປອດໄພ. ການເພີ່ມທະວີການສະໜັບສະໜູນຕໍ່ປະເທດພວມພັດທະນາແລະປັບປຸງການຕິດຕາມວັດແທກແລະການເຕືອນໄພມີຄວາມສຳຄັນເປັນຢ່າງຍິ່ງ. ໂດຍປະເຊີນໜ້າກັບວິກິດການທົ່ວໂລກຕ່າງໆນານາທີ່ນັບມືນັບສັບສົນຂຶ້ນ, ພວກເຮົາຕ້ອງມີການກະກຽມຢ່າງເຕັມສ່ວນ.
ເດືອນທັນວາປີ 2015, ສະມັດຊາໃຫຍ່ອົງການ ສປຊ ໄດ້ກຳນົດເອົາວັນທີ 5 ພະຈິກຂອງແຕ່ລະປີເປັນວັນຮັບຮູ້ສຶນາມິໂລກ. ຕາມການຄາດຄະເນຂອງ ສປຊ, ເມື່ອຮອດປີ 2030, ປະຊາກອນ 50% ຂອງໂລກຈະດຳລົງຊີວິດຢູ່ໃນເຂດແຄມທະເລທີ່ມັກຈະໄດ້ຮັບຜົນກະທົບຈາກໄພນ້ຳຖ້ວມ, ໄພພາຍຸ ແລະໄພຄື້ນສຶນາມິໄດ້ງ່າຍ.
ຄຳເຫັນ
0