ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 15 ພະຈິກນີ້, ກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 76 ໄດ້ຄົ້ນຄວ້າພິຈາລະນາບັນຫາການປະຕິຮູບສະພາຄວາມໝັ້ນຄົງ. ທ່ານຈຽງຈູນ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ເຂົ້າຮ່ວມກອງປະຊຸມ ແລະ ຊີ້ແຈງຫຼັກໝັ້ນຂອງຈີນ.
ທ່ານຈຽງຈູນກ່າວເນັ້ນວ່າ, ຕ້ອງຮັບປະກັນໃຫ້ປະເທດຕ່າງໆຮ່ວມກັນຊົມໃຊ້ຜົນຂອງການປະຕິຮູບ. ອົງການສະຫະປະຊາຊາດປະກອບດ້ວຍປະເທດສະມາຊິກ 193 ປະເທດ, ປະເທດຕ່າງໆບໍ່ວ່າໃຫຍ່ຫຼືນ້ອຍ, ເຂັ້ມແຂງຫຼືອ່ອນແອ, ຮັ່ງມີຫຼືທຸກຍາກ, ລ້ວນແຕ່ຄວນໄດ້ຮັບຜົນປະໂຫຍດຈາກການປະຕິຮູບຂອງອົງການສະຫະປະຊາຊາດ. ການປະຕິຮູບບໍ່ຄວນສ້າງຜົນປະໂຫຍດໃຫ້ແກ່ປະເທດຈຳນວນໜຶ່ງເທົ່ານັ້ນ. ຕ້ອງເພີ່ມທະວີຄວາມສາມັກຄີ ແລະ ຄວາມໄວ້ເນື້ອເຊື່ອໃຈກັນລະຫວ່າງປະເທດສະມາຊິກຕ່າງໆ. ການປະຕິຮູບສະພາຄວາມໝັ້ນຄົງກ່ຽວພັນເຖິງຜົນປະໂຫຍດອັນສຳຄັນຂອງປະເທດຕ່າງໆ, ຕ້ອງແລກປ່ຽນຄວາມຄິດເຫັນກັນຢ່າງເຕັມທີ່, ເຄົາລົບຄວາມເຫັນ ແລະ ຄວາມສົນໃຈຂອງຝ່າຍຕ່າງໆ. ແຜນການປະຕິຮູບໃດໆລ້ວນແຕ່ບໍ່ຄວນແລກມາດ້ວຍການທຳລາຍຄວາມສາມັກຄີລະຫວ່າງປະເທດສະມາຊິກ. ຕ້ອງພະຍາຍາມສະແຫວງຫາຄວາມຮັບຮູ້ທີ່ຄ້າຍຄືກັນໂດຍຜ່ານການສົນທະນາ ແລະ ປຶກສາຫາລືກັນ. ບັນຫາ 5 ປະເພດໃຫຍ່ໃນການປະຕິຮູບສະພາຄວາມໝັ້ນຄົງໄດ້ພົວພັນກັນຢ່າງໃກ້ຊິດ, ຕ້ອງສະແຫວງຫາວິທີແກ້ໄຂທີ່ເປັນລະບົບທີ່ເປັນຫ່ວງນຳຜົນປະໂຫຍດ ແລະ ຄວາມສົນໃຈຂອງຝ່າຍຕ່າງໆ ບົນພື້ນຖານການປຶກຫາຫາລືກັນຢ່າງເປັນເອກະພາບກັນ. ໃນສະເພາະໜ້ານີ້, ຝ່າຍຕ່າງໆຍັງມີຄວາມຮັບຮູ້ຕໍ່ທິດທາງລວມຂອງການປະຕິຮູບ ແລະ ຫຼັກການຂັ້ນພື້ນຖານທີ່ບໍ່ຄືກັນ, ສະນັ້ນຍັງຈະມີຂໍ້ຂັດແຍ້ງກັນຢ່າງຫຼວງຫຼາຍ.
ຄຳເຫັນ
0