ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ16ພະຈິກນີ້,ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ຈັດກອງປະຊຸມຖະແຫຼງຂ່າວ.ມີນັກຂ່າວຕັ້ງຄຳຖາມກ່ຽວກັບການພົບປະກັນລະຫວ່າງປະມຸກລັດຈີນແລະອາເມຣິກາ ແລະບັນຫາທີ່ກ່ຽວຂ້ອງກັບຊ່ອງແຄບໄຕ້ຫວັນ.
ທ່ານຈ້າວລີ້ຈ່ຽນກ່າວວ່າ: ການພົບປະກັນຂອງປະມຸກລັດຈີນແລະອາເມຣິກາໃນເວລາສຳຄັນ ເປັນການຊີ້ທິດເຍືອງທາງໃຫ້ກັບສາຍພົວພັນລະຫວ່າງສອງຝ່າຍອີກເທື່ອໜຶ່ງ,ມີຄວາມໝາຍສຳຄັນຕໍ່ກັບການຂະຫຍາຍສາຍພົວພັນລະຫວ່າງຈີນແລະອາເມຣິກາໃນໄລຍະຕໍ່ໜ້າ. ສາຍພົວພັນຈີນ- ອາເມຣິກາໃນປັດຈຸບັນກຳລັງຢູ່ໃນປາກທາງແບ່ງທີ່ສຳຄັນ,ຫວັງວ່າອາເມຣິກາຈະສາມາດຮ່ວມກັບພວກເຮົາເດີນຕາມເສັ້ນທາງດຽວກັນ,ໃຊ້ພຶດຕິກຳຕົວຈິງເພື່ອຈັດຕັ້ງປະຕິບັດເນື້ອໃນຈິດໃຈການພົບປະກັນລະຫວ່າງປະມຸກລັດຈີນ-ອາເມຣິກາ,ສືບຕໍ່ຮັກສາການສົນທະນາກັນແລະການແລກປ່ຽນຄວາມຄິດເຫັນກັນ, ເພີ່ມທະວີການແລກປ່ຽນແລະຮ່ວມມືກັນ,ແບກຫາບໜ້າທີ່ຄວາມຮັບຜິດຊອບຂອງຕົນເພື່ອຄວບຄຸມຄວາມຂັດແຍ້ງກັນ,ຊຸກຍູ້ໃຫ້ສາຍພົວພັນຈີນ-ອາເມຣິກາກັບຄືນເຂົ້າສູ່ທິດທາງການຂະຫຍາຍຕົວຢ່າງປອດໃສແລະໝັ້ນທ່ຽງ.
ທ່ານຈ້າວລີ້ຈ່ຽນກ່າວຕື່ມວ່າ: ກ່ຽວກັບຜົນກະທົບທີ່ມີຕໍ່ສະຖານະການຢູ່ຊ່ອງແຄບໄຕ້ຫວັນທີ່ເກີດຈາກການພົບປະລະຫວ່າງປະມຸກລັດຈີນ-ອາເມຣິກາ,ຂ້າພະເຈົ້າຄຶດວ່າທ່ານປະທານສີຈິ້ນຜິງໄດ້ຊີ້ແຈງຢ່າງເຕັມທີ່ເຖິງຫຼັກໝັ້ນແລະຫຼັກການຂອງຈີນໃນບັນຫາໄຕ້ຫວັນແລ້ວໃນເວລາພົບປະກັນ.ຝ່າຍອາເມຣິກາຄວນເຄົາລົບສັນຍາສອງຝ່າຍທີ່ຈີນແລະອາເມຣິກາກ້າວເຖິງຂັ້ນເປັນເອກະພາບກັນແລ້ວ ແລະມະຕິທີ່ສະມັດຊາໃຫຍ່ອົງການສະຫະປະຊາຊາດຮັບຮອງຢ່າງເປັນທາງການ,ມີທ່າທີທີ່ຖືກຕ້ອງຕໍ່ກັບສະພາບຄວາມເປັນຈິງແລະຄວາມເຫັນຂອງບັນດາປະເທດສ່ວນຫຼາຍໃນໂລກທີ່ໄດ້ຍຶດໝັ້ນໃນຫຼັກການປະເທດຈີນດຽວ,ໃຊ້ການກະທຳຕົວຈິງເພື່ອສ້າງຄວາມໄວ້ເນື້ອເຊື່ອໃຈກັນໃຫ້ກັບປະຊາຊົນຈີນ ກໍຄືໃຫ້ກັບປະຊາຄົມໂລກ.
ຄຳເຫັນ
0