ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ພະຈິກນີ້ຕາມເວລາທ້ອງຖິ່ນ, ສະໜາມບິນສາກົນຮາສຟີວ-ແຈັກສັນນະຄອນແອດແລນຕາ ທີ່ເປັນສະໜາມບິນທີ່ມີເຮືອບິນຂຶ້ນແລະລົງຫຼາຍທີ່ສຸດຢູ່ອາເມຣິກາໄດ້ເກີດເຫດການຍິງກັນ, ສົ່ງຜົນເຮັດໃຫ້ມີ 3 ຄົນໄດ້ຮັບບາດເຈັບ, ສະໜາມບິນໄດ້ຕົກເຂົ້າສູ່ສະພາບວຸ້ນວາຍໄລຍະໜຶ່ງ ແລະ ໄດ້ສັ່ງໂຈະໝົດທຸກຖ້ຽວບິນເປັນການຊົ່ວຄາວ.
ບໍ່ເທົ່າໃດຍມື້ກ່ອນ ຄືໃນວັນທີ 17 ພະຈິກນີ້, ຮ້ານເຄັກແຫ່ງໜຶ່ງໃນນະຄອນເມມຟີສລັດເຕນເນສຊີຂອງອາເມຣິກາໄດ້ເກີດເຫດການຍິງກັນ, ທ່ານຢັງ ໂດຟ ນັກຮ້ອງເພງແຣບ ທີ່ພວມຊື້ຂະໜົມຖືກລູກປືນແລ້ວເສຍຊີວິດ. ທ່ານຢັງ ໂດຟເຄີຍປະສົບເຫດການຖືກຍິງຫຼາຍເທື່ອ, ທ່ານຍັງໄດ້ແຕ່ງເພງທີ່ມີຊື່ວ່າ: “ການຍິງກັນ 100 ເທື່ອ” ເພື່ອລະນຶກເຖິງເຫດການທີ່ຕົນລອດຊີວິດ ພາຍຫຼັງຕົນເອງໄດ້ຂັບລົດໄປພົບເຫັນເຫດການຍິງກັນ 100 ກວ່າເທື່ອຢູ່ນະຄອນຊາລັອດລັດຄາໂຣໄລນາເໜືອ. ແຕ່ວ່າ: ທ່ານຢັງ ໂດຟກໍຍັງບໍ່ສາມາດລອດຈາກຊາຕາກຳທີ່ຕ້ອງເສຍຊີວິດຍ້ອນເຫດການຍິງກັນໄດ້.
ເຫດການຍິງກັນເກີດຂຶ້ນເລື້ອຍໆ ໄດ້ເປັນໄພຂົ່ມຂູ່ຕໍ່ຄວາມປອດໄພດ້ານຊີວິດຂອງປະຊາຊົນອາເມຣິກາຢ່າງໜັກໜ່ວງ. ຕາມສະຖິຕິ, ນັບແຕ່ປີ 1972 ເປັນຕົ້ນມາ, ທຸກມື້, ສະເລ່ຍແລ້ວ, ຈະມີປະຊາຊົນອາເມຣິກາ 80 ກວ່າຄົນເສຍຊີວິດຍ້ອນເຫດການຍິງກັນ, ໃນນັ້ນ, ມີ 12 ຄົນເປັນເດັກນ້ອຍ. ຕາມໜັງສືພິມ “ອາເມຣິກາວັນນີ້” ໄດ້ລາຍງານວ່າ: ມາຮອດເດືອນກໍລະກົດປີນີ້, ມີປະຊາຊົນອາເມຣິກາ 23.000 ກວ່າຄົນເສຍຊີວິດຍ້ອນປືນ. ສ່ວນໃນທ້າຍສັບປະດາຂອງ “ວັນຊາດ” ອາເມຣິກາ ຄືວັນທີ 4 ກໍລະກົດປີນີ້, ທົ່ວປະເທດອາເມຣິກາໄດ້ເກີດເຫດການຍິງກັນ 540 ກວ່າເທື່ອ, ສົ່ງຜົນເຮັດໃຫ້ມີຜູ້ເສຍຊີວິດ 180 ກວ່າຄົນ ແລະ 500 ກວ່າຄົນໄດ້ຮັບບາດເຈັບ. ຢູ່ເບື້ອງຫຼັງຕົວເລກເຫຼົ່ານີ້, ເປັນຄວາມສູນເສຍຊີວິດ ແລະ ຄວາມແຕກສະຫຼາຍຂອງຄອບຄົວ.
ຫວ່າງມໍ່ໆມານີ້, ໃນຂະນະທີ່ທ່ານຕີໂຊຣາ ຈອນ ເຈົ້າຄອງນະຄອນເຊນລຸຍສລັດມິດຊູຣີຂອງອາເມຣິກາພວມຖະແຫຼງຂ່າວຕໍ່ນັກຂ່າວ ເພື່ອສະແດງຄວາມເປັນຫ່ວງຕໍ່ເຫດການຍິງກັນທີ່ໄດ້ເກີດຂຶ້ນຢູ່ອາເມຣິກາເລື້ອຍໆ, ແຕ່ການກ່າວຄຳປາໄສຂອງທ່ານໄດ້ຂາດສະບັ້ນໄປ ຍ້ອນສຽງປືນດັງຂຶ້ນຢູ່ທາງຂ້າງ. ທ່ານຕີໂຊຣາ ຈອນໄດ້ກ່າວແບບສຸດວິໄສຕາມຫຼັງວ່າ: “ຕອນຄ່ຳທຸກມື້, ຢູ່ຂ້າງເຮືອນຂອງຂ້າພະເຈົ້າຈະໄດ້ຍິນສຽງປືນດັງຂຶ້ນເລື້ອຍໆ, ຂ້າພະເຈົ້າກັບລູກຊາຍຂອງຂ້າພະເຈົ້າຈະ “ນອນຫຼັບ” ທ່າມກາງ “ສຽງເພງກ່ອມນອນດ້ວຍລູກປືນ”.
ການມີສິດຖືຄອງປືນເປັນສິດທິທີ່ມີກຽດສັກສີທີ່ສຸດຢ່າງໜຶ່ງ ທີ່ລັດຖະທຳມະນູນອາເມຣິກາມອບໃຫ້ປະຊາຊົນອາເມຣິກາ, ການຜະລິດ, ຄ້າຂາຍ ແລະ ນຳໃຊ້ປືນຢູ່ອາເມຣິກາໄດ້ກາຍເປັນອຸດສາຫະກຳຂະໜາດໃຫຍ່ ເຊິ່ງໄດ້ພົວພັນເຖິງຜົນປະໂຫຍດອັນມະຫາສານຂອງກຸ່ມນາຍທຶນ. ຢູ່ອາເມຣິກາ, ຈົນເຖິງຂັ້ນມີຊາວໜຸ່ມເຍົາວະຊົນພາກັນຖືປືນໄປເຂົ້າຮຽນໂດຍບໍ່ມີຂໍ້ຈຳກັດ. ການຖືປືນຢ່າງເສລີໄດ້ເປັນການກະຕຸ້ນໃຫ້ເກີດມີການໃຊ້ຄວາມຮຸນແຮງໃນສັງຄົມ, ເຫດການຍິງກັນທີ່ເກີດຂຶ້ນເລື້ອຍໆກໍໄດ້ກະຕຸກຊຸກຍູ້ໃຫ້ການຜະລິດແລະຈຳໜ່າຍປືນໄດ້ດີກວ່າເກົ່າ. ໄພຂົ່ມຂູ່ຍ້ອນປືນຢູ່ອາເມຣິກາໄດ້ກາຍເປັນບັນຫາທີ່ແກ້ໄຂບໍ່ຕົກ, ການມີປືນ, ບໍ່ພຽງແຕ່ບໍ່ສາມາດເຮັດໃຫ້ປະຊາຊົນອາເມຣິກາຮູ້ສຶກມີຄວາມປອດໄພເທົ່ານັ້ນ, ຫາກຍັງໄດ້ເຮັດໃຫ້ຄວາມປອດໄພກາຍເປັນ “ສິ່ງທີ່ຫາຍາກ” ໃນສັງຄົມອາເມຣິກາ. “ເສລີພາບແບບອາເມຣິກາ” ທີ່ສາມາດຖືປືນໄດ້ນຳເອົາໂສກນາດຕະກຳ ແລະ ຄວາມໝົດຫວັງທີ່ບໍ່ສິ້ນສຸດມາໃຫ້ແກ່ປະຊາຊົນອາເມຣິກາ.
ຄຳເຫັນ
0