ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 9 ທັນວານີ້, ຢູ່ທີ່ນະຄອນຫຼວງອິສລາມມາບັດຂອງປາກີສະຖານ, ທ່ານຄາລິດ ມານໂຊ, ຜູ້ຊ່ວຍວຽກພິເສດຂອງນາຍົກລັດຖະມົນຕີປາກີສະຖານກ່ຽວກັບວຽກງານແລວເສດຖະກິດຈີນ-ປາກີສະຖານກ່າວວ່າ: ການປະຕິບັດໂຄງການແລວເສດຖະກິດຈີນ-ປາກີສະຖານຢ່າງສະດວກນັ້ນ ໄດ້ປັບປຸງສະພາບການສະໜອງພະລັງງານ ແລະສະພາບພື້ນຖານໂຄງລ່າງຂອງປາກີສະຖານ ໃຫ້ດີຂຶ້ນກວ່າເກົ່າຢ່າງຫຼວງຫຼາຍ, ການຮ່ວມມືດ້ານອຸດສາຫະກຳລະຫວ່າງສອງປະເທດພາຍໃນຂອບແລວທາງເສດຖະກິດດັ່ງກ່າວ ຈະສ້າງພະລັງຂັບເຄື່ອນທີ່ແຂງແຮງໃຫ້ກັບການພັດທະນາອຸດສາຫະກຳຂອງປາກີສະຖານ.
ທ່ານມານໂຊກ່າວວ່າ: ປາກີສະຖານເຄີຍປະສົບກັບສະພາບຄວາມຫຍຸ້ງຍາກຍ້ອນການຂາດແຄນພະລັງງານໄຟຟ້າ, ແຕ່ລະມື້ໄຟຟ້າມອດເປັນເວລາ 10 ຊົ່ວໂມງຂຶ້ນໄປ ເຊິ່ງໄດ້ສ້າງຜົນກະທົບອັນໜັກໜ່ວງໃຫ້ກັບຊີວິດການເປັນຢູ່ຂອງປະຊາຊົນ ແລະການພັດທະນາດ້ານອຸດສາຫະກຳ. ການເປີດນຳໃຊ້ໂຄງການພະລັງງານຫຼາຍໂຄງການຂອງແລວເສດຖະກິດຈີນ-ປາກີສະຖານ ໄດ້ນຳເອົາພະລັງງານໄຟຟ້າທີ່ພຽງພໍ, ເຊື່ອໝັ້ນໄດ້ ແລະລາຄາຖືກ ມາໃຫ້ກັບປາກີສະຖານ.
ທ່ານມານໂຊຍັງກ່າວຕື່ມວ່າ: ແລວເສດຖະກິດຈີນ-ປາກີສະຖານໄດ້ສຸມກຳລັງເຂົ້າໃນການລົງເລິກການເຊື່ອມໂຍງເຊື່ອມຈອດກັນຂອງພາກພື້ນ, ການເປີດນຳໃຊ້ທາງຫຼວງຫຼາຍສາຍໃນຂອບແລວເສດຖະກິດດັ່ງກ່າວ ແລະການຂະຫຍາຍຕົວຂອງທ່າກຳປັ່ນກວາດາຢ່າງວ່ອງໄວ ບໍ່ພຽງແຕ່ໄດ້ເຮັດໃຫ້ເຄືອຂ່າຍຄົມມະນາຄົມພາຍໃນປະເທດປາກີສະຖານນັບມື້ນັບສົມບູນຂຶ້ນເທົ່ານັ້ນ, ຍັງໄດ້ເຮັດໃຫ້ປາກີສະຖານ ແລະປະເທດອື່ນຢູ່ອາຊີກາງນັ້ນ ມີສາຍພົວພັນນຳກັນທີ່ແໜ້ນແຟ້ນກວ່າເກົ່າອີກດ້ວຍ.
ຄຳເຫັນ
0