ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 11 ທັນວານີ້, ໂຄສົກກະຊວງການຕ່າງປະເທດໄດ້ໃຫ້ຄຳເຫັນກ່ຽວກັບເລື່ອງທີ່ອາເມຣິກາຈັດອັນທີ່ເອີ້ນວ່າ “ກອງປະຊຸມສຸດຍອດປະຊາທິປະໄຕ”, ໂດຍຊີ້ອອກວ່າ, ອັນທີ່ເອີ້ນວ່າ “ກອງປະຊຸມສຸດຍອດປະຊາທິປະໄຕ” ໄດ້ຂີດແບ່ງດ້ວຍຮູບຖານຈິດສຳນຶກ, ໃຊ້ປະຊາທິປະໄຕເປັນເຄື່ອງມື ແລະ ອາວຸດ, ໃຊ້ ປະຊາທິປະໄຕເປັນຂໍ້ອ້າງເພື່ອຕໍ່ຕ້ານປະຊາທິປະໄຕ, ຍຸແຍ່ສົ່ງເສີມການແບ່ງແຍກ ແລະ ການເປັນປໍລະປັກກັນ, ເພື່ອຫັນແຫຄວາມສົນໃຈຕໍ່ຄວາມຂັດແຍ່ງພາຍໃນປະເທດຕົນໄປສູ່ພາຍນອກ, ຮັກສາຖານະການເປັນເຈົ້າອຳນາດຂອງອາເມຣິກາໃນໂລກ, ທຳລາຍລະບົບສາກົນທີ່ຖືອົງການສະຫະປະຊາຊາດເປັນແກນກາງ ແລະ ລະບຽບການສາກົນທີ່ຖືກົດໝາຍສາກົນເປັນພື້ນຖານ. ການກະທຳຂອງອາເມຣິກາເປັນການຝ່າຝືນກັບກະແສປະຫວັດສາດ, ໄດ້ຖືກປະຊາຄົມໂລກຄັດຄ້ານໂດຍທົ່ວໄປ.
ໂຄສົກທ່ານນີ້ຊີ້ໃຫ້ເຫັນວ່າ, ປະຊາທິປະໄຕແບບອາເມຣິກາໃນທຸກມື້ນີ້ໄດ້ສະແດງໃຫ້ເຫັນຄວາມຜິດປົກກະຕິຢ່າງຫຼວງຫຼາຍ, ການເມືອງທີ່ເນັ້ນເງິນຄຳ, ການເມືອງທີ່ເນັ້ນສະຖານະພາບ, ການເປັນປໍລະປັກກັນລະຫວ່າງພັກຝ່າຍການເມືອງ, ການເມືອງຫັນເປັນຂົ້ວ, ການແບ່ງແຍກທາງສັງຄົມ, ຄວາມຂັດແຍ່ງກັນລະຫວ່າງເຊື້ອຊາດ, ຄວາມແຕກໂຕນກັນລະຫວ່າງຜູ້ຮັ່ງມີກັບຜູ້ທຸກຍາກຂະຫຍາຍວົງກວ້າງອອກ ແລະ ບັນຫາອື່ນໆນັບມື້ນັບຮຸນແຮງຂຶ້ນ. ຜົນການສຳຫຼວດທີ່ກ່ຽວຂ້ອງສະແດງໃຫ້ເຫັນວ່າ, ຊາວອາເມຣິກາ 72%ເຫັນວ່າອາເມຣິກາບໍ່ເປັນ “ແບບຢ່າງດ້ານປະຊາທິປະໄຕ” ທີ່ສາມາດໃຫ້ປະເທດອື່ນຮຽນແບບໄດ້ອີກ, ຜູ້ໃຫ້ສຳພາດ 44% ໃນໂລກເຫັນວ່າ ອາເມຣິກາເປັນໄພຂົ່ມຂູ່ໃຫຍ່ທີ່ສຸດຕໍ່ປະຊາທິປະໄຕຂອງໂລກ.
ໂຄສົກທ່ານນີ້ກ່າວເນັ້ນອີກວ່າ, ເສັ້ນທາງປະຊາທິປະໄຕຂອງບັນດາປະເທດຄວນໃຫ້ປະຊາຊົນຂອງປະເທດຕົນເປັນຜູ້ຄັດເລືອກຢ່າງເປັນເຈົ້າຕົນເອງ, ແຕ່ບໍ່ຄວນຖືກບີບບັງຄັບຈາກພາຍນອກ. ປະເທດໜຶ່ງແມ່ນປະເທດປະຊາທິປະໄຕຫຼືບໍ່, ຄວນໃຫ້ປະຊາຊົນຂອງປະເທດນັ້ນເປັນຜູ້ຕັດສິນ, ແຕ່ບໍ່ຄວນຖືກຊີ້ໄມຊີ້ມືຈາກບຸກຄົນສ່ວນໜ້ອຍຂອງພາຍນອກ.
ສຸດທ້າຍ, ໂຄສົກທ່ານນີ້ໄດ້ກ່າວເນັ້ນວ່າ, ຈີນຍິນດີຮ່ວມກັບບັນດາປະເທດ, ສົ່ງເສີມຄ່ານິຍົມຮ່ວມຂອງມວນມະນຸດ ຄື: ສັນຕິພາບ ການພັດທະນາ, ຄວາມຍຸດຕິທຳ, ຄວາມເປັນທຳ, ປະຊາທິປະໄຕ ແລະ ເສລີພາບ, ຕັ້ງໜ້າຊຸກຍູ້ການພົວພັນສາກົນຫັນເປັນແບບປະຊາທິປະໄຕ, ໃຫ້ມີຄວາມສາມັກຄີກັນ ແຕ່ບໍ່ໃຫ້ມີການແບ່ງແຍກ, ໃຫ້ມີການສົນທະນາກັນ ແຕ່ບໍ່ເປັນປໍລະປັກກັນ, ໃຫ້ມີປະຊາທິປະໄຕ ແຕ່ບໍ່ໃຫ້ມີເຈົ້າອຳນາດ, ເດັດດ່ຽວຄັດຄ້ານການກະທຳຊະນິດຕ່າງໆທີ່ເປັນປະຊາທິປະໄຕແບບຈອມປອມ, ຕ້ານປະຊາທິປະໄຕ ແລະ ຫຼິ້ນການເມືອງດ້ວຍຂໍ້ອ້າງປະຊາທິປະໄຕໃນທຸກຮູບແບບ, ພະຍາຍາມຢ່າງບໍ່ລົດລະເພື່ອຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ຄຳເຫັນ
0