ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວແຈ້ງວ່າ, ວັນທີ 21 ທັນວານີ້, ບໍລິສັດພະລັງງານໄຟຟ້າໂຕກຽວໄດ້ຍື່ນຄຳຮ້ອງເຖິງຄະນະກຳມະການພະລັງງານນິວເຄຼຍຍີ່ປຸ່ນເພື່ອຂໍການອະນຸມັດປ່ອຍນ້ຳປົນເປື້ອນລັງສີນິວເຄຼຍລົງສູ່ທະເລຢ່າງເປັນທາງການ.
ກ່ຽວກັບເລື່ອງນີ້, ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 22 ທັນວານີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວວ່າ: ການແກ້ໄຂບັນຫານ້ຳປົນເປື້ອນລັງສີນິວເຄຼຍຢູ່ເກາະຟູກູຊີມະກ່ຽວພັນເຖິງສະພາບນິເວດທາງທະເລຂອງທົ່ວໂລກແລະສຸຂະພາບຂອງປະຊາຊົນ, ບໍ່ແມ່ນເລື່ອງຂອງຍີ່ປຸ່ນແຕ່ຝ່າຍດຽວ. ນັບແຕ່ເດືອນເມສາປີນີ້ເປັນຕົ້ນມາ, ປະຊາຄົມໂລກໄດ້ຕັ້ງຄຳຖາມກັບຍີ່ປຸ່ນກ່ຽວກັບບັນຫາທີ່ຍີ່ປຸ່ນຈະປ່ອຍນ້ຳປົນເປື້ອນລັງສີນິວເຄຼຍລົງສູ່ທະເລ. ວຽກງານຂອງໜ່ວຍເຕັກນິກຂອງອົງການພະລັງງານປະລະມານູສາກົນກ່ຽວກັບການແກ້ໄຂບັນຫານ້ຳປົນເປື້ອນລັງສີນິວເຄຼຍຢູ່ເກາະຟູກູຊີມະກໍພວມດຳເນີນຢູ່. ແຕ່ວ່າຍີ່ປຸ່ນບໍ່ໄດ້ເອົາຫົວຊາຕໍ່ຄວາມເປັນຫ່ວງທີ່ສົມເຫດສົມຜົນຂອງປະຊາຄົມໂລກ, ຍິ່ງກວ່ານັ້ນຍັງໄດ້ຊຸກຍູ້ນະໂຍບາຍແລະເຕັກນິກກະກຽມຕ່າງໆກ່ຽວກັບການປ່ອຍນ້ຳປົນເປື້ອນລັງສີນິວເຄຼຍຢູ່ເກາະຟູກູຊີມະລົງສູ່ທະເລຢ່າງບໍ່ຢຸດຢັ້ງ, ເປັນເລື່ອງທີ່ຈະແຈ້ງແລ້ວວ່າ: ຍີ່ປຸ່ນຢາກໃຫ້ປະເທດຕ່າງໆຢູ່ແຄມຟັງມະຫາສະໝຸດປາຊີຟິກແບ່ງປັນຄວາມສ່ຽງຈາກການປ່ອຍນ້ຳປົນເປື້ອນລັງສີນິວເຄຼຍລົງສູ່ທະເລ. ການກະທຳດັ່ງກ່າວຂອງຍີ່ປຸ່ນເປັນການກະທຳທີ່ຂາດຄວາມຮັບຜິດຊອບທີ່ສຸດ. ຍີ່ປຸ່ນຄວນຕັ້ງໃຈຮັບຟັງແລະຕອບສະໜອງຄວາມເປັນຫ່ວງຂອງປະຊາຄົມໂລກລວມທັງປະເທດໃກ້ຄຽງ, ຍົກເລີກການຕັດສິນໃຈທີ່ຜິດພາດທີ່ຈະປ່ອຍນ້ຳປົນເປື້ອນລັງສີນິວເຄຼຍລົງສູ່ທະເລ.
ຄຳເຫັນ
0