ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 30 ທັນວານີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຖະແຫຼງຂ່າວປະຈຳວັນວ່າ: ຈີນເດັດດ່ຽວຄັດຄ້ານແລະກ່າວປະນາມຢ່າງຮຸນແຮງຕໍ່ກໍລະນີທີ່ອາເມຣິກາໄດ້ລົງໂທດເຈົ້າໜ້າທີ່ລັດຖະບານຈີນຕາມກົດໝາຍອາເມຣິກາ ແລະໄດ້ແຊກແຊງວຽກງານພາຍໃນຂອງຈີນ, ຈີນໄດ້ຕັດສິນໃຈໃຊ້ມາດຕະການລົງໂທດທີ່ເທົ່າທຽມກັນ.
ຕາມຂ່າວແຈ້ງວ່າ: ກະຊວງການຕ່າງປະເທດແລະກະຊວງການເງິນອາເມຣິກາໄດ້ປະກາດໃນຫວ່າງມໍ່ໆນີ້ວ່າ: ອາເມຣິກາໄດ້ລົງໂທດຮອງຫົວໜ້າຫ້ອງການພົວພັນຂອງລັດຖະບານກາງຈີນປະຈຳຮົງກົງ 5 ທ່ານຕາມກົດໝາຍທີ່ເອີ້ນວ່າ “ກົດໝາຍປົກຄອງຕົນເອງຂອງຮົງກົງ”. ໃນເວລາຕອບຄຳຖາມທີ່ກ່ຽວຂ້ອງ, ທ່ານຈ້າວລີ້ຈ່ຽນກ່າວວ່າ: ຈີນໄດ້ສະແດງຫຼັກໝັ້ນທີ່ເຄັ່ງຂຶມກ່ອນໜ້ານີ້ແລ້ວ.
ທ່ານຈ້າວລີ້ຈ່ຽນກ່າວວ່າ: “ໃນເດືອນກໍລະກົດປີນີ້, ອາເມຣິກາໄດ້ປະກາດການລົງໂທດເຈົ້າໜ້າທີ່ຂອງຈີນ 7 ທ່ານ ເຊິ່ງລວມທັງຮອງຫົວໜ້າຫ້ອງການພົວພັນຂອງລັດຖະບານກາງຈີນປະຈຳຮົງກົງ 5 ທ່ານ ໂດຍສວຍໃຊ້ໂອກາດທີ່ເຜີຍແຜ່ອັນທີ່ເອີ້ນວ່າ: ຄຳເຕືອນການເຮັດທຸລະກິດຢູ່ຮົງກົງ. ຈີນກໍໄດ້ປະຕິບັດການລົງໂທດທີ່ເທົ່າທຽມກັນກັບເຈົ້າໜ້າທີ່ທີ່ກ່ຽວຂ້ອງຂອງອາເມຣິກາຕາມກົດໝາຍວ່າດ້ວຍການຕໍ່ຕ້ານການລົງໂທດຂອງຕ່າງປະເທດ. ການປະກາດການລົງໂທດຄືນໃໝ່ຂອງອາເມຣິກາຄັ້ງນີ້ແມ່ນຮື້ຟື້ນບັນຫາເກົ່າ, ເປັນການສວຍໃຊ້ການປ່າວຂ່າວກ່ຽວກັບບັນຫາຮົງກົງ ເພື່ອຮັບໃຊ້ກົນອຸບາຍທາງການເມືອງໃນການສະກັດກັ້ນຈີນ, ນີ້ໄດ້ເຜີຍແບໃຫ້ເຫັນຢ່າງຈະແຈ້ງວ່າ: ຄວາມເອົາໃຈໃສ່ຮົງກົງຂອງອາເມຣິກາແມ່ນເລື່ອງຈອມປອມ, ການທຳລາຍຄວາມຈະເລີນຮຸ່ງເຮືອງແລະສະຖຽນລະພາບຂອງຮົງກົງຈິ່ງແມ່ນເລື່ອງຈິງ.”
ຄຳເຫັນ
0