ຕາລາງລາຍການ FM93Mhz

ຝ່າຍຕ່າງໆທີ່ເຂົ້າຮ່ວມກອງປະຊຸມລັດຖະມົນຕີຕ່າງປະເທດຂອງປະເທດໃກ້ຄຽງອັຟການິດສະຖານຄັ້ງທີ 3 ບັນລຸຄວາມເຫັນທີ່ເປັນເອກະພາບກັນຫຼາຍດ້ານ

2022-04-01 14:32:04 CRI

ວັນທີ 31 ມີນາແລ້ວນີ້, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເປັນປະທານຈັດກອງປະຊຸມ ລັດຖະມົນຕີຕ່າງປະເທດຂອງປະເທດໃກ້ຄຽງອັຟການິດສະຖານຄັ້ງທີ 3 ຢູ່ເມືອງທຸນຊີ່ແຂວງອ່ານຫຸ່ຍຈີນ. ລັດຖະມົນຕີຕ່າງປະເທດ ຫຼື ຜູ້ຕາງໜ້າ 6 ປະເທດ ຄື ປາກິສະຖານ ອີຣານ ຣັດເຊຍ, ຕັດຈິກິດສະຖານ, ຕວັກເມນິດສະຖານ, ອຸດສະເບກິດສະຖານໄດ້ເຂົ້າຮ່ວມກອງປະຊຸມ. ໃນເວລາຕາງໜ້າຝ່າຍຈີນປະກອບຄຳເຫັນ, ທ່ານຫວາງຢີ້ສະເໜີໃຫ້ຝ່າຍຕ່າງໆຈົ່ງສະໜັບສະໜູນອັຟການິດສະຖານບຸກເບີກເສັ້ນທາງພັດທະນາທີ່ເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ, ມີຄວາມສິວິໄລກ້າວໜ້າ ແລະ ພັດທະນາໂດຍສັນຕິ.


ກອງປະຊຸມໄດ້ເຜີຍແຜ່ “ຖະແຫຼງການຮ່ວມຂອງ ກອງປະຊຸມລັດຖະມົນຕີຕ່າງປະເທດຂອງປະເທດໃກ້ຄຽງອັຟການິດສະຖານຄັ້ງທີ 3”, ແລະ “ຂໍ້ສະເໜີທຸນຊີ່ຂອງປະເທດໃກ້ຄຽງກ່ຽວກັບການສະໜັບສະໜູນການສ້າງເສດຖະກິດອັຟການິດສະຖານຄືນໃໝ່ ແລະ ການຮ່ວມມືທີ່ຕິດແທດຕົວຈິງ”.


ພາຍຫຼັງກອງປະຊຸມ, ທ່ານຫວາງຢີ້ໄດ້ຕາງໜ້າໃຫ້ຝ່າຍຕ່າງໆທີ່ເຂົ້າຮ່ວມກອງປະຊຸມສະຫຼຸບຄວາມເຫັນທີ່ເປັນເອກະພາບກັນຫຼາຍຂໍ້, ຄື: ກ່າວເນັ້ນໜັກໃຫ້ເຄົາລົບຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງອັຟການິດສະຖານ, ສະໜັບສະໜູນປະຊາຊົນອັຟການິດສະຖານຕັດສິນຊາຕາກຳຂອງປະເທດຕົນຢ່າງເປັນເຈົ້າຕົນເອງ, ຄົ້ນຄວ້າເສັ້ນທາງພັດທະນາທີ່ສອດຄ່ອງກັບສະພາບຄວາມເປັນຈິງຂອງປະເທດຕົນ ພ້ອມທັງສອດຄ່ອງກັບກະແສຟອງຂອງຍຸກສະໄໝ. ຮຽກຮ້ອງໃຫ້ອັຟການິດສະຖານບັນລຸຄວາມປອງດອງຊາດ ແລະ ຄວາມສາມັກຄີພາຍໃນປະເທດໂດຍຜ່ານການປຶກສາຫາລື ແລະການເຈລະຈາ, ຮຽກຮ້ອງໃຫ້ອັຟການິດສະຖານຈົ່ງປາສະຈາກກຸ່ມກໍ່ການຮ້າຍທຸກຮູບແບບຢ່າງຊັດເຈນ ແລະ ໂຈມຕີພວກເຂົາຢ່າງເດັດດ່ຽວ ພ້ອມທັງກຳຈັດໃນທີ່ສຸດ. ຕົກລົງວ່າຈະສືບຕໍ່ໃຫ້ການຊ່ວຍເຫຼືອດ້ານມະນຸດສະທຳແກ່ປະຊາຊົນອັຟການິດສະຖານ, ສະໜັບສະໜູນອັຟການິດສະຖານສ້າງສາເສດຖະກິດຄືນໃໝ່ ແລະ ພັດທະນາຢ່າງເປັນເຈົ້າຕົນເອງ, ເພີ່ມທະວີການເຊື່ອມໂຍງ ແລະ ເຊື່ອມຈອດກັນກັບພາກພື້ນ, ຄັດຄ້ານການຫັນການຊ່ວຍເຫຼືອດ້ານມະນຸດສະທຳເປັນບັນຫາການເມືອງ.


ຝ່າຍຕ່າງໆທີ່ເຂົ້າຮ່ວມກອງປະຊຸມຮຽກຮ້ອງໃຫ້ອາເມຣິກາ ແລະ ປະເທດຕາເວັນຕົກຈົ່ງປະຕິບັດຄວາມຮັບຜິດຊອບທີ່ສຳຄັນເປັນອັນດັບໜຶ່ງໃນການສ້າງສາອັຟການິດສະຖານຄືນໃໝ່, ສົ່ງຄືນຊັບສິນຂອງປະຊາຊົນອັຟການິດສະຖານໂດຍໄວ, ຄັດຄ້ານການເຈຕະນາທີ່ສ້າງຄວາມປັ່ນປ່ວນວຸ້ນວາຍຢູ່ອັຟການິດສະຖານ ແລະ ສົ່ງຜົນກະທົບຢ່າງໜັກໜ່ວງຕໍ່ພາກພື້ນ. ສະໜັບສະໜູນອົງການສະຫະປະຊາຊາດເສີມຂະຫຍາຍບົດບາດເທົ່າທີ່ຄວນໃນການຊຸກຍູ້ສັນຕິພາບ ສະຖຽນລະພາບຂອງອັຟການິດສະຖານ, ປະສານງານໃນການຊ່ວຍເຫຼືອ ແລະດ້ານອື່ນໆ, ຮຽກຮ້ອງໃຫ້ອົງການຈັດຕັ້ງດ້ານການເງິນສາກົນຕັ້ງໜ້າປ່ອຍເງິນທຶນໃຫ້ອັຟການິດສະຖານ, ເພື່ອຊ່ວຍເຫຼືອອັຟການິດສະຖານກ້າວຂຶ້ນສູ່ເສັ້ນທາງພັດທະນາໄປໃນທິດທາງທີ່ດີ.