ຕາລາງລາຍການ FM93Mhz

ອາເມຣິກາເປັນຜູ້ຊົ່ວຮ້າຍທີ່ສຸດໃນບັນຫາຢາເສບຕິດຢູ່ອັຟການິສະຖານ

2022-04-08 18:16:21 cri

      ຫວ່າງບໍ່ດົນມານີ້, ລັດຖະບານຊົ່ວຄາວຂອງອັຟການິສະຖານໄດ້ປະກາດຫ້າມບໍ່ໃຫ້ປູກຝີ່ນໃນທົ່ວປະເທດ,ພ້ອມທັງຍັງຫ້າມບໍ່ໃຫ້ຜະລິດ,ນຳໃຊ້ແລະຂາຍຢາເສບຕິດປະເພດຕ່າງໆ. ກ່ຽວກັບເລື່ອງນີ້, ທ່ານ ຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 7 ເມສານີ້ໂດຍຊີ້ໃຫ້ເຫັນວ່າ: ໃນຖານະເປັນຜູ້ສ້າງບັນຫາຢູ່ອັຟການິສະຖານ, ອາເມຣິກາໄດ້ເຫັນດີແລະໄດ້ເຂົ້າຮ່ວມການຜະລິດແລະ ຄ້າຢາເສບຕິດໃນປະຫວັດສາດຂອງອັຟການິສະຖານ, ເປັນຜູ້ຊົ່ວຮ້າຍທີ່ສຸດໃນບັນຫາຢາເສບຕິດຢູ່ອັຟການິສະຖານ.

      ທ່ານ ຈ້າວລີ້ຈ່ຽນ ຍົກຕົວຢ່າງວ່າ: ມີການລາຍງານວ່າ: ກອງທັບອາເມຣິກາໄດ້ຈັດຕັ້ງປະຕິບັດໂຄງການຫ້ອງທົດລອງຜະລິດຢາເສບຕິດໃນຂອບເຂດທົ່ວໂລກໃນໄລຍະປະຈຳຢູ່ອັຟການິສະຖານ, ເຮັດໃຫ້ປະລິມານການຜະລິດຢາຝິ່ນຢູ່ອັຟການິສະຖານໃນໄລຍະນັ້ນເພີ່ມຂຶ້ນ 40 ກວ່າເທົ່າ. “ໃນໄລຍະເວລາ 20 ປີທີ່ກອງທະຫານອາເມຣິກາປະຈຳຢູ່ອັຟການິສະຖານແມ່ນ 20 ປີ ທີ່ປະຊາຊົນອັຟການິສະຖານເສຍຊີວິດໂດຍບໍ່ມີໂທດກຳຫຍັງແລະຊັດເຊພະເນຈອນ,ທັງແມ່ນ 20 ປີ ທີ່ຢາເສບຕິດຢູ່ທ້ອງຖິ່ນໄດ້ລະບາດຢ່າງຮຸນແຮງ. ອາເມຣິກາໄດ້ຖອນທະຫານອອກຈາກອັຟການິສະຖານແບບຟ້າວຟັ່ງໂດຍບໍ່ມີຄວາມຮັບຜິດຊອບຫຍັງໝົດ,ເຫຼືອໄວ້ແຕ່ຢາເສບຕິດແລະບັນຫາທີ່ເປັນສິ່ງທ້າທາຍທີ່ຂ້ຽວຂາດຕ່າງໆໃຫ້ແກ່ປະຊາຊົນອັຟການິສະຖານຜູ້ບໍ່ມີໂທດກຳຫຍັງ. ອາເມຣິກາຄວນສຳຫຼວດການປະພຶດຂອງຕົນເອງຄືນໃໝ່ຢ່າງເລິກເຊິ່ງ,ຂໍອະໄພປະຊາຊົນອັຟການິສະຖານຢ່າງຈິງໃຈ,ໄຊ້ແທນຜົນເສຍຫາຍຢ່າງເຕັມສ່ວນ.ເພື່ອທົດແທນຜົນຮ້າຍຂອງຕົນທີ່ມີຕໍ່ປະຊາຊົນອັຟການິສະຖານດ້ວຍການກະທຳຕົວຈິງ.”