ວັນທີ 17 ພຶດສະພານີ້ຕາມເວລາທ້ອງຖິ່ນ, ຊູແອດ ແລະ ແຟງລັງ ໄດ້ຮ່ວມກັນຖະແຫຼງວ່າ: ສອງປະເທດຈະຍື່ນໃບສະໝັກເຂົ້າເປັນສະມາຊິກກຸ່ມນາໂຕໃນວັນທີ 18 ພຶດສະພານີ້. ກ່ອນໜ້ານີ້, ທ່ານເຈນສ ສະໂຕນເທນເບີກ ເລຂາທິການໃຫຍ່ກຸ່ມນາໂຕກ່າວວ່າ: ກຸ່ມນາໂຕຈະ “ຍິນດີ” ຮັບເອົາຊູແອດ ແລະ ແຟງລັງເຂົ້າເປັນສະມາຊິກກຸ່ມນາໂຕ.

ເມື່ອຫວນຄືນປະຫວັດສາດ, ຕະຫລອດໄລຍະ 70 ກວ່າປີທີ່ຜ່ານມາ, ແຟງລັງໄດ້ມີຖານະເປັນກາງ ແລະ ປະເທດຊູແອດກໍມີຖານະເປັນກາງມາເປັນເວລາ 200 ກວ່າປີແລ້ວ. ສອງປະເທດໄດ້ປະຖີ້ມຖານະເປັນກາງຂອງຕົນໃນປັດຈຸບັນ ເຊິ່ງຈະເຮັດໃຫ້ສະພາບຄວາມໝັ້ນຄົງຂອງເອີຣົບ ທີ່ເຄີຍມີຄວາມສະຫງົບມາດົນຫລັງສົງຄາມໂລກຄັ້ງທີ 2 ສິ້ນສຸດລົງ ຈະບໍ່ມີຄວາມໝັ້ນຄົງອີກ ແລະ ບໍ່ມີຄວາມແນ່ນອນ. ທ່ານໂທນີ ຟາງ ສາສະດາຈານຈາກວິທະຍາໄລການຄ້າຂອງມະຫາວິທະຍາໄລສະໂຕກໂຮມ ປະເທດຊູແອດກ່າວວ່າ: “ທະເລບານຕິກຈະກາຍເປັນແນວໜ້າຂອງການເປັນປໍລະປັກກັນລະຫວ່າງກຸ່ມນາໂຕກັບຣັດເຊຍ, ຊູແອດແລະແຟງລັງຈະມີຄວາມສ່ຽງເພີ່ມຂຶ້ນທີ່ຈະຖືກດຶງເຂົ້າໄປສູ່ສະພາບການປະທະກັນທາງການທະຫານ.”

ທ່ານວະລາດິເມຍ ປູຕິນ ປະທານາທິບໍດີຣັດເຊຍກ່າວວ່າ: ການທີ່ແຟງລັງແລະຊູແອດເຂົ້າເປັນສະມາຊິກຂອງກຸ່ມນາໂຕ ຈະບໍ່ເປັນ “ໄພຂົ່ມຂູ່ໂດຍກົງ” ຕໍ່ຣັດເຊຍ, ແຕ່ເມື່ອໃດຖ້າກຸ່ມນາໂຕຂະຫຍາຍສິ່ງກໍ່ສ້າງທາງການທະຫານຢູ່ສອງປະເທດດັ່ງກ່າວ, ຣັດເຊຍຈະຕອບໂຕ້ຄືນ, “ມາດຕະການຕອບໂຕ້ລະອຽດຈະຂຶ້ນກັບຂະໜາດຂອງໄພຂົ່ມຂູ່ທີ່ມີຕໍ່ຣັດເຊຍ.”