ຕາລາງລາຍການ FM93Mhz

ຈີນກ່າວວ່າ: ການທີ່ອາເມຣິກາຊູຊີຖືໄຕ້ຫວັນເປັນເກມການພະນັນ ຈະເຮັດໃຫ້ການພົວພັນລະຫວ່າງຈີນ-ອາເມຣິກາຕົກເຂົ້າສູ່ຄວາມອັນຕະລາຍເທົ່ານັ້ນ

2022-06-03 17:21:46 cri


ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 2 ມິຖຸນານີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ກ່າວເຕືອນອາເມຣິກາແລະເຂດໄຕ້ຫວັນຂອງຈີນວ່າ: ຈົ່ງຍຸດຕິການໄປມາຫາສູ່ກັນແບບທາງການໃນທຸກຮູບແບບ. ທ່ານກ່າວເນັ້ນໜັກວ່າ: ການທີ່ອາເມຣິກາຊູຊີຖືໄຕ້ຫວັນເປັນເກມການພະນັນ ຈະເຮັດໃຫ້ການພົວພັນລະຫວ່າງຈີນ-ອາເມຣິກາຕົກເຂົ້າສູ່ຄວາມອັນຕະລາຍເທົ່ານັ້ນ.

ຕາມຂ່າວແຈ້ງໃຫ້ຮູ້ວ່າ: ວັນທີ 1 ມິຖຸນານີ້, ຮອງຜູ້ຕາງໜ້າການຄ້າອາເມຣິກາໄດ້ຈັດການພົບປະເຈລະຈາກັນກັບຜູ້ຕາງໜ້າເຂດໄຕ້ຫວັນຂອງຈີນຜ່ານທາງວິດີໂອ ໂດຍໄດ້ປະກາດເລີ່ມປະຕິບັດ “ຂໍ້ລິເລີ່ມການຄ້າສະຕະວັດທີ 21”. ໃນເວລາຕອບຄຳຖາມທີ່ກ່ຽວຂ້ອງ, ທ່ານຈ້າວລີ້ຈ່ຽນກ່າວວ່າ: ຢູ່ໃນໂລກນີ້ມີພຽງແຕ່ປະເທດຈີນດຽວເທົ່ານັ້ນ, ໄຕ້ຫວັນແມ່ນພາກສ່ວນໜຶ່ງທີ່ບໍ່ສາມາດຕັດແຍກອອກຈາກກັນໄດ້ຂອງດິນແດນຈີນ, ລັດຖະບານສາທາລະນະລັດປະຊາຊົນຈີນ ແມ່ນລັດຖະບານພຽງໜຶ່ງດຽວຂອງຈີນທີ່ຖືກຕ້ອງຕາມກົດໝາຍ, ນີ້ແມ່ນຄວາມຮັບຮູ້ທີ່ເປັນເອກະພາບກັນຂອງປະຊາຄົມໂລກ ທັງແມ່ນຄຳໝັ້ນສັນຍາທີ່ເຄັ່ງຂຶມຂອງອາເມຣິກາໃນຖະແຫຼງການຮ່ວມ ຈີນ-ອາເມຣິກາ 3 ສະບັບ.

ທ່ານຈ້າວລີ້ຈ່ຽນກ່າວຕື່ມວ່າ: “ອາເມຣິກາຄວນເຄົາລົບຫຼັກການປະເທດຈີນດຽວແລະຂໍ້ກຳນົດໃນຖະແຫຼງການຮ່ວມຈີນ-ອາເມຣິກາ 3 ສະບັບ, ຍຸດຕິການໄປມາຫາສູ່ກັນທາງການໃນທຸກຮູບແບບກັບໄຕ້ຫວັນ, ຍຸດຕິການປຶກສາຫາລືແລະເຊັນສັນຍາທີ່ມີຄວາມໝາຍອະທິປະໄຕແລະເປັນທາງການກັບນັກທຸລະກິດໄຕ້ຫວັນ, ບໍ່ສົ່ງສັນຍານທີ່ຜິດພາດໃດໆໃຫ້ແກ່ອິດທິກຳລັງແບ່ງແຍກໄຕ້ຫວັນ. ນອກນີ້, ພວກຂ້າພະເຈົ້າຈະເຕືອນໃຫ້ພັກປະຊາທິປະໄຕກ້າວໜ້າໄຕ້ຫວັນວ່າ: ຈົ່ງປະຖິ້ມກົນອຸບາຍທີ່ອາໄສອາເມຣິກາເພື່ອແບ່ງແຍກໄຕ້ຫວັນໃຫ້ເປັນເອກະລາດນັ້ນໂດຍໄວ, ຖ້າບໍ່ດັ່ງນັ້ນ, ພວກເຂົາຈະເຕັ້ນສູງສຳໃດ, ຕົກລົງຍິ່ງເຈັບໜັກສ່ຳນັ້ນ.”