ຕາລາງລາຍການ FM93Mhz

ສະພາກາແດງຈີນໄດ້ຮັບລາງວັນສູງສຸດຈາກ IFRC ເປັນຄັ້ງທຳອິດ

2022-06-21 12:47:39 CRI


     ວັນທີ 19 ມິຖຸນາປີ 2022 ນີ້, ສະຫະພັນສະພາກາແດງແລະສະພາຊີກວົງເດືອນແດງສາກົນ ຫຼື IFRC ໄດ້ມອບລາງວັນແຮນຣີ ແດວິຊັນ ເຊິ່ງເປັນລາງວັນສູງສຸດຂອງສະຫະພັນດັ່ງກ່າວໃຫ້ແກ່ສະພາກາແດງຈີນ ພ້ອມທັງສະພາກາແດງແລະບຸກຄົນຂອງປະເທດອີກຈຳນວນໜຶ່ງ. ນີ້ແມ່ນສະພາກາແດງຈີນໄດ້ຮັບລາງວັນດັ່ງກ່າວເປັນຄັ້ງທຳອິດ.


     ລາງວັນແຮນຣີ ແດວິຊັນ ແມ່ນຕັ້ງຂຶ້ນໂດຍ IFRC ໃນປີ 2003, ຕັ້ງຕາມຊື່ຂອງທ່ານແຮນຣີ ແດວິຊັນ ຜູ້ລິເລີ່ມຂອງສະຫະພັນດັ່ງກ່າວ, ຈັດປະກວດສອງປີເທື່ອໜຶ່ງ, ເພື່ອຍ້ອງຍໍສັນລະເສີນສະພາກາແດງ ຫຼື ບຸກຄົນທີ່ໄດ້ປະກອບສ່ວນອັນພົ້ນເດັ່ນເຂົ້າໃນການລະດົມກຳລັງມະນຸດສະທຳເພື່ອປັບປຸງຊີວິດການເປັນຢູ່ຂອງກຸ່ມຄົນທີ່ອ່ອນແອໃຫ້ດີຂຶ້ນ ເຊິ່ງມີບົດບາດຢ່າງໃຫຍ່ຫຼວງໃນຂົງເຂດຂະບວນການມະນຸດສະທຳສາກົນ.


     ສະພາກາແດງຈີນໄດ້ຮັບຄະແນນສຽງທັງໝົດຈາກຄະນະກຳມະການປະກວດ. ອົງການແລະບຸກຄົນທີ່ໄດ້ຮັບລາງວັນດັ່ງກ່າວຍັງມີສະພາກາແດງເອຕີໂອປີ ສະພາຊີກວົງເດືອນແດງອີຣານ ແລະອາສາສະໝັກຜູ້ດີເດັ່ນຄົນໜຶ່ງທີ່ສະເໜີໂດຍສະພາຊີກວົງເດືອນແດງໂຊມາລີ.