ຕາລາງລາຍການ FM93Mhz

ການພົບປະກັນລະຫວ່າງຜູ້ນຳປະເທດບຣິກສ໌ໄດ້ຮັບໝາກຜົນຢ່າງຫຼວງຫຼາຍ

2022-06-25 11:01:02 cri

ວັນທີ 24 ມິຖຸນານີ້, ທ່ານ ວັງໂຊ້ເວີນ ຮອງລັດຖະມົນຕີກະຊວງການຄ້າຈີນ ທັງເປັນຮອງຜູ້ຕາງໜ້າການເຈລະຈາການຄ້າສາກົນ ໄດ້ໃຫ້ສຳພາດຕໍ່ສື່ມວນຊົນ ເພື່ອແນະນຳໝາກຜົນດ້ານເສດຖະກິດການຄ້າຂອງການພົບປະກັນລະຫວ່າງຜູ້ນຳປະເທດບຣິກສ໌.

ທ່ານ ວັງໂຊ້ເວີນ ກ່າວວ່າ: ປີ 2021, ການຄ້າສອງຝ່າຍລະຫວ່າງຈີນ ແລະ ປະເທດບຣິກສ໌ອື່ນໆ ໄດ້ເພີ່ມຂຶ້ນ ເຊິ່ງມີຍອດຈຳນວນຫຼາຍກວ່າ 490 ຕື້ໂດລາສະຫະລັດ, ເພີ່ມຂຶ້ນ 1 ເທົ່າເມື່ອທຽບໃສ່ 5 ປີກ່ອນ, ຍັງໄດ້ສະແດງໃຫ້ເຫັນເຖິງຄວາມໝັ້ນໜຽວທີ່ເຂັ້ມແຂງນຳອີກ. ນັບແຕ່ເດືອນມັງກອນຮອດເດືອນພຶດສະພາປີນີ້, ຕົວເລກດັ່ງກ່າວໄດ້ບັນລຸເຖິງ 205,1 ຕື້ໂດລາ, ເຊິ່ງໄດ້ເພີ່ມຂຶ້ນປະມານ 16% ເມື່ອທຽບໃສ່ໄລຍະດຽວກັນຂອງປີກາຍ ແລະ ສືບຕໍ່ຮັກສາຈັງຫວະເຕີບໂຕທີ່ຂ້ອນຂ້າງໄວ. ການຮ່ວມມືທາງເສດຖະກິດການຄ້າ ໄດ້ເຮັດໃຫ້ 5 ປະເທດມີການພົວພັນຜົນປະໂຫຍດທີ່ແໜ້ນແຟ້ນກວ່າເກົ່າ ແລະ ມີຄວາມສາມັກຄີເຕົ້າໂຮມຫຼາຍກວ່າເກົ່າ.

ຂະນະດຽວກັນ, ມູນຄ່າການຄ້າຂອງປະເທດບຣິກສ໌ ໄດ້ກວມປະມານ 20% ຂອງໂລກ, ແຕ່ການຄ້າລະຫວ່າງ 5 ປະເທດນັ້ນພຽງແຕ່ກວມ 6% ຂອງຍອດມູນຄ່າການຄ້າກັບຕ່າງປະເທດຂອງແຕ່ລະປະເທດ ເຊິ່ງຂ້ອນຂ້າງຕ່ຳ, ສະນັ້ນ ການຮ່ວມມືດ້ານເສດຖະກິດການຄ້າຂອງປະເທດບຣິກສ໌ ຍັງມີທ່າແຮງບົ່ມຊ້ອນຢ່າງຫຼວງຫຼາຍໃນການເຕີບໂຕ.