ຕາລາງລາຍການ FM93Mhz

ເປີດປະຕູສູ່ເມືອງຈີນ: ເລື່ອງເລົ່າກ່ຽວກັບ “ໜຶ່ງແລວໜຶ່ງເສັ້ນທາງ”01

2022-07-22 09:23:26 cri

ວັນທີ 9 ກຸມພາປີ 2021, ໃນກອງປະຊຸມສຸດຍອດຜູ້ນຳປະເທດຈີນ-ເອີຣົບກາງ ແລະຕາເວັນອອກ, ທ່ານສີຈິ້ນຜິງ ປະທານປະເທດຈີນໄດ້ສະເໜີຮ່ວມມືກັນສ້າງ “ໜຶ່ງແລວໜຶ່ງເສັ້ນທາງ” ຢ່າງມີຄຸນນະພາບສູງ, ເລັ່ງລັດຊຸກຍູ້ການກໍ່ສ້າງທາງລົດໄຟຮົງກາລີ-ແຊັກບີ ແລະ ໂຄງການໃຫຍ່ອື່ນໆ, ສືບຕໍ່ສະໜັບສະໜູນການພັດທະນາຂະບວນລົດໄຟຈີນ-ເອີຣົບ, ຂຸດຄົ້ນຄວາມສາມາດບົ່ມຊ້ອນຂອງການຮ່ວມມືລະຫວ່າງສອງຝ່າຍຢ່າງເຕັມທີ່. ມາຮອດເດືອນມັງກອນປີ 2022 ນີ້, ຂະບວນລົດໄຟຈີນ-ເອີຣົບທັງໝົດໄດ້ເປີດ 50.000 ຖ້ຽວແລ້ວ. ພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ຂະບວນລົດໄຟຈີນ-ເອີຣົບ ທີ່ເໝືອນດັ່ງ “ຂະບວນອູດເຫຼັກ” ນັ້ນ ກຳລັງຊ່ວຍບັນດາປະເທດລຽບຕາມ “ໜຶ່ງແລວໜຶ່ງເສັ້ນທາງ” ເດີນຕາມເສັ້ນທາງການເຊື່ອມໂຍງເຊື່ອມຈອດກັນ ແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດ ເພື່ອກ້າວໄປສູ່ອະນາຄົດທີ່ດີງາມ.

ທ້າວໂທມັສ ກຣານິກກີ ເປັນພະນັກງານສາງເຄື່ອງຄົນໜຶ່ງຂອງບໍລິສັດແຫ່ງໜຶ່ງທີ່ນະຄອນດູອິສເບີກ ປະເທດເຢຍລະມັນ. ຫຼັງຈາກເຄື່ອງທີ່ຂົນມາດ້ວຍຂະບວນລົດໄຟຈີນ-ເອີຣົບໄດ້ຖືກລົດບັນທຸກຄອນເທນເນີຂົນສົ່ງມາຮອດບໍລິສັດແຫ່ງນີ້ແລ້ວ, ທ້າວ ໂທມັສ ກຣານິກກີ ແລະ ໝູ່ຮ່ວມງານຂອງລາວກໍເປັນຜູ້ຮັບຜິດຊອບຂົນເຄື່ອງລົງ ແລະ ເກັບມ້ຽນໃຫ້ດີ. ການພັດທະນາຢ່າງວ່ອງໄວຂອງຂະບວນລົດໄຟຈີນ-ເອີຣົບ ໄດ້ເຮັດໃຫ້ການໄປມາຫາສູ່ກັນດ້ານການຄ້າລະຫວ່າງຈີນກັບເຢຍລະມັນເພີ່ມຂຶ້ນເລື້ອຍໆ ເຊິ່ງກໍເຮັດໃຫ້ທ້າວ ໂທມັສ ກຣານິກກີ ຮູ້ສຶກວຽກຂອງຕົນໄດ້ຮັບຜົນຕອບສະໜອງນັບມື້ນັບເພີ່ມຂຶ້ນ ແລະ ຊີວິດການເປັນຢູ່ຂອງຕົນກໍນັບມື້ນັບດີຂຶ້ນເຊັ່ນກັນ.

ທ້າວໂທມັສ ກຣານິກກີ ກ່າວວ່າ: ແຫຼ່ງສິນຄ້າຂອງບໍລິສັດພວກເຮົາມີຫຼາກຫຼາຍຊະນິດ, ບໍ່ວ່າສິນຄ້າທີ່ຂົນສົ່ງໄປຈີນ ຫຼືສິນຄ້າທີ່ຂົນສົ່ງມາຈາກຈີນ ກໍຫຼາຍຂຶ້ນກວ່າເກົ່າ. ຂ້ອຍມາເຮັດວຽກຢູ່ບໍລິສັດແຫ່ງນີ້ໃນເດືອນກັນຍາປີ 2019, ມາຮອດປັດຈຸບັນ ເວລາໄດ້ຜ່ານໄປເກືອບ 3 ປີແລ້ວ, ຂ້ອຍຮູ້ສຶກວ່າວຽກຂອງພວກເຮົາໄດ້ເພີ່ມຂຶ້ນຢ່າງຈະແຈ້ງ, ເຄື່ອງສິນຄ້າກໍມີຫຼາຍຂຶ້ນກວ່າເກົ່າ, ບໍ່ວ່າແມ່ນຜະລິດຕະພັນອຸດສາຫະກຳເບົາ ຫຼືເຄື່ອງກົນຈັກຂະໜາດໃຫຍ່ ມີເກືອບໝົດທຸກຢ່າງເລີຍ. ຂ້ອຍຮູ້ສຶກດີໃຈທີ່ສຸດທີ່ມີໂອກາດເຮັດວຽກຢູ່ນີ້ ເພາະວ່າຂ້ອຍມີອາຍຸໄດ້ 55 ປີແລ້ວ, ຍັງມີໂອກາດໄດ້ວຽກທີ່ເປັນສັນຍາຈ້າງໝັ້ນຄົງ, ອາຍຸ 55 ປີແລ້ວແຕ່ຍັງໄດ້ໂອກາດແບບນີ້ ແມ່ນບໍ່ຄ່ອຍເຫັນເລີຍຢູ່ເຢຍລະມັນ. ຂ້ອຍຍິນດີເຮັດວຽກຢູ່ນີ້ຈົນຮອດມື້ບຳນານ.

ໃນເດືອນມີນາ ປີ 2011, ຂະບວນລົດໄຟຈີນ-ເອີຣົບຖ້ຽວທຳອິດ ໄດ້ອອກເດີນທາງຈາກນະຄອນຈຸ່ງກິ່ງ ແລະ ຜ່ານເຂດຊິ່ນຈ່ຽງອອກຊາຍແດນປະເທດຈີນ, ແລ້ວເດີນທາງຜ່ານກາຊັກສະຖານ, ຣັດເຊຍ, ເບລາຣຸດ ແລະ ໂປໂລຍ, ສຸດທ້າຍເດີນທາງໄປຮອດນະຄອນດູອິສເບີກ ທີ່ເປັນສູນຮັບ-ສົ່ງສິນຄ້າທີ່ສຳຄັນຂອງປະເທດເຢຍລະມັນ. ນີ້ກໍໄດ້ເປີດວາລະໃໝ່ຂອງການຂົນສົ່ງທາງບົກລະຫວ່າງອາຊີ-ເອີຣົບ. ພາຍຫຼັງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໄດ້ສະເໜີອອກມາໃນປີ 2013, “ຂະບວນອູດເຫຼັກ” ກໍຄືຂະບວນລົດໄຟຈີນ-ເອີຣົບ ໄດ້ຂະຫຍາຍຕົວຢ່າງຕໍ່ເນື່ອງ ໂດຍໄດ້ສືບຕໍ່ເພີ່ມຖ້ຽວລົດໄຟ, ເສັ້ນທາງລົດໄຟ, ແຫຼ່ງສິນຄ້າ ແລະ ຊະນິດສິນຄ້າ. ມາຮອດເດືອນມັງກອນປີ 2022, ຂະບວນລົດໄຟຈີນ-ເອີຣົບໄດ້ເປີດລວມທັງໝົດ 50.000 ຖ້ຽວແລ້ວ.

ນະຄອນດູອິສເບີກ ເປັນນະຄອນອຸດສາຫະກຳທີ່ສຳຄັນ ແລະ ສູນອຸດສາຫະກຳເຫຼັກກ້າທີ່ສຳຄັນ ທາງພາກຕາເວັນຕົກຂອງເຢຍລະມັນ ທັງເປັນທ່າເຮືອແມ່ນ້ຳທີ່ໃຫຍ່ທີ່ສຸດ ແລະເປັນສູນກາງທາງລົດໄຟທີ່ສຳຄັນຂອງເອີຣົບ. ໂດຍໄດ້ຮັບຜົນປະໂຫຍດຈາກຂະບວນລົດໄຟຈີນ-ເອີຣົບ ແລະ ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ການພັດທະນາເສດຖະກິດຂອງນະຄອນດູອິສເບີກ ໄດ້ຮັບພະລັງໃໝ່ ແລະການມີຖານະທີ່ເປັນສູນກາງຈໍລະຈອນສິນຄ້າທີ່ສຳຄັນຂອງເອີຣົບ ກໍມີຄວາມໝັ້ນທ່ຽງເພີ່ມຂຶ້ນຕື່ມອີກ.

ທ້າວໂທມັສ ກຣານິກກີ ກ່າວວ່າ: ທາງລົດໄຟທີ່ທັນສະໄໝ ໄດ້ເຮັດໃຫ້ເສັ້ນທາງສາຍໄໝທີ່ເກົ່າແກ່ ມີຊີວິດໃໝ່. ປັດຈຸບັນ, ການຂົນສົ່ງຜ່ານທາງລົດໄຟມີທ່າແຮງຢ່າງຈະແຈ້ງ, ຖ້ຽວລົດໄຟໂດຍກົງລະຫວ່າງຕົວເມືອງຂອງຈີນ ກັບນະຄອນດູອິສເບີກຂອງເຢຍລະມັນ ໃຊ້ເວລາເດີນທາງພຽງແຕ່ປະມານ 16 ມື້ເທົ່ານັ້ນ ເຊິ່ງເປັນການເປີດຊ່ອງທາງການຄ້າສາຍໃໝ່ ແລະເຮັດໃຫ້ນະຄອນດູອິສເບີກກາຍເປັນສູນເຕົ້າໂຮມແລະຈໍລະຈອນສິນຄ້າ. ພວກເຮົາສາມາດສັງເກດໄດ້ງ່າຍວ່າ: ການຮ່ວມມືກັບຈີນ ໄດ້ເຮັດໃຫ້ຕົວເມືອງແຫ່ງນີ້ໄດ້ຮັບຜົນປະໂຫຍດຢ່າງຫຼວງຫຼາຍ. ຂ້ອຍຄິດວ່າ: ຖ້າບໍ່ມີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ເລື່ອງເຫຼົ່ານີ້ກໍບໍ່ສາມາດບັງເກີດຜົນເປັນຈິງໄດ້. ຂ້ອຍຮູ້ສຶກດີໃຈຫຼາຍທີ່ໄດ້ມີສ່ວນຮ່ວມນຳ.