ໃນເວລາຕອບຄຳຖາມຂອງນັກຂ່າວໃນກອງປະຊຸມຖະແຫຼງຂ່າວໃນວັນທີ　8　ກັນຍານີ້，ທ່ານນາງໝາວໜິງ　ໂຄສົກກະຊວງການຕ່າງປະເທດຈີນໄດ້ຊີ້ໃຫ້ເຫັນວ່າ：ບາງປະເທດບໍ່ເອົາຫົວຊານຳຈຸດປະສົງຂອງກົດບັດສະຫະປະຊາຊາດແລະຫຼັກການຂອງກົດໝາຍສາກົນ，ຢູ່ບໍ່ຢູ່ກໍ່ປະຕິບັດການລົງໂທດພຽງແຕ່ຝ່າຍດຽວຕໍ່ປະເທດອື່ນຢ່າງຜິດກົດໝາຍ，ໄດ້ກະທົບເຖິງລະບຽບການເມືອງເສດຖະກິດໂລກແລະລະບົບບໍລິຫານສາກົນຢ່າງໜັກໜ່ວງ．

ອີງຕາມການລາຍງານຂ່າວ：ຫວ່າງມໍ່ໆມານີ້，ທ່ານວະລາດີເມຍ　ປູຕິນ　ປະທານາທິບໍດີຣັດເຊຍໄດ້ກ່າວໃນເວທີເສດຖະກິດຕາເວັນອອກວ່າ，ການລົງໂທດຂອງຝ່າຍຕາເວັນຕົກໄດ້ເຂົ້າແທນສະພາບການແຜ່ລະບາດຂອງພະຍາດໂຄວິດ－19，ກາຍເປັນໄພຂົ່ມຂູ່ທີ່່ໃຫຍ່ກວ່າໝູ່ຂອງໂລກ．ເພື່ອສະກັດກັ້ນວິວັດທະນາການປະຫວັດສາດ，ອາເມຣິກາບໍ່ເສຍດາຍທີ່ຈະທຳລາຍເສົາຄ້ຳຂອງລະບຽບເສດຖະກິດສາກົນເຊັ່ນການທະນາຄານແລະເງິນຕາເປັນຕົ້ນທີ່ກຳນົດໄວ້ໃນ　100　ປີຜ່ານມານີ້，ເພື່ອສ້າງກະຕິກາທີ່ມີຜົນດີຕໍ່ຕົນເອງຕາມເຈຕະນາລົມຂອງຕົນ．

ຕໍ່ກັບເລື່ອງນີ້，ທ່ານນາງໝາວໜິງກ່າວວ່າ：

“ໃນຖານະເປັນປະເທດສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດແລະຜູ້ຕາງໜ້າປະເທດຕະຫຼາດຈະເລີນໃໝ່ຕ້ົນຕໍ，ຈີນແລະຣັດເຊຍໄດ້ເດັດດ່ຽວປົກປ້ອງລະບົບສາກົນທີ່ຖືອົງການສະຫະປະຊາຊາດເປັນແກນກາງແລະລະບຽບສາກົນທີ່ຖືກົດໝາຍສາກົນເປັນພື້ນຖານ，ເດັດດ່ຽວປະຕິບັດລັດທິຫຼາຍຝ່າຍທີ່ແທ້ຈິງ，ສຸມໃສ່ຊຸກຍູ້ການຟື້ນຟູຂອງເສດຖະກິດໂລກພາຍໃຕ້ເບື້ອງຫຼັງການແຜ່ລະບາດຂອງພະຍາດໂຄວິດ－19．ຝ່າຍຈີນຈະສືບຕໍ່ຮ່ວມກັບປະຊາຄົມໂລກລວມທັງຣັດເຊຍ，ຮ່ວມ　ກັນຊຸກຍູ້ການຫັນເປັນຫຼາຍຂົ້ວຂອງໂລກ，ເສດຖະກິດໂລກາພິວັດແລະການຫັນສາຍພົວພັນສາກົນເປັນແບບປະຊາທິປະໄຕ．ພວກເຮົາຈະປະກອບສ່ວນຢ່າງຕັ້ງໜ້າເພື່ອຊຸກຍູ້ການສ້າງລະບົບສາກົນແບບໃໝ່ແລະປະຊາຄົມຮ່ວມຊາຕາກຳຂອງມວນມະນຸດ．”