ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 1 ມັງກອນປີ 2022, ຂະບວນລົດໄຟຂົນສົ່ງສິນຄ້າສາກົນຖ້ຽວທຳອິດໄດ້ບັນທຸກສິນຄ້າຈາກນະຄອນຄຸນມິງປະເທດຈີນ, ໂດຍຜ່ານການເດີນທາງເປັນເວລາປະມານ 30 ຊົ່ວໂມງ, ຂະບວນລົດໄຟຖ້ຽວນີ້ທີ່ໄດ້ບັນທຸກເສື້ອຜ້າອາພອນ, ຜະລິດຕະພັນເຕັກນິກຂັ້ນສູງ ແລະ ອື່ນໆ ໄດ້ເດີນທາງໄປເຖິງນະຄອນຫຼວງວຽງຈັນປະເທດລາວ ເຊິ່ງເປັນຂະບວນລົດໄຟຖ້ຽວທຳອິດທີ່ຂົນສົ່ງສິນຄ້າຈາກຈີນໄປລາວຕາມເສັ້ນທາງລົດໄຟລາວ-ຈີນໃນປີນີ້. ພາຍຫຼັງເດີນທາງໄປເຖິງນະຄອນຫຼວງວຽງຈັນແລ້ວ, ຂາກັບຂອງຂະບວນລົດໄຟຖ້ຽວນີ້ໄດ້ບັນທຸກຢາງພາລາ ແລະ ປຸຍເປັນຕົ້ນກັບຄືນສູ່ນະຄອນຄຸນມິງປະເທດຈີນ ແລ້ວຂົນສົ່ງໄປນະຄອນຊຽງໄຮ້ ແລະ ແຂວງກວາງຕຸ້ງ, ຕົ້ນທຶນໃນການຂົນສົ່ງໄດ້ຫຼຸດລົງ 30% ເມື່ອທຽບໃສ່ແຕ່ກ່ອນ.
ນັບແຕ່ໄດ້ເປີດນຳໃຊ້ທາງລົດໄຟລາວ-ຈີນຢ່າງເປັນທາງການໃນວັນທີ 3 ທັນວາປີ 2021 ເປັນຕົ້ນມາ, ໄດ້ຊຸກຍູ້ການໄປມາຫາສູ່ລະຫວ່າງປະຊາຊົນ ແລະ ການພົວພັນດ້ານການຄ້າຢ່າງຫຼວງຫຼາຍ ແລະ ໄດ້ນຳເອົາຜົນປະໂຫຍດມາໃຫ້ປະຊາຊົນສອງຊາດລາວແລະຈີນນັບມື້ນັບຫຼາຍຂຶ້ນ. ມາຮອດວັນທີ 15 ທັນວາປີຜ່ານມາ, ຍອດມູນຄ່າສິນຄ້າຂາເຂົ້າຂາອອກໂດຍຜ່ານທາງລົດໄຟລາວ-ຈີນໄດ້ບັນລຸຫຼາຍກວ່າ 100 ລ້ານຢວນ; ມາຮອດວັນທີ 20 ທັນວາປີຜ່ານມາ, ທາງລົດໄຟລາວ-ຈີນຕອນຢູ່ປະເທດລາວໄດ້ໃຫ້ບໍລິການແກ່ຜູ້ໂດຍສານຫຼາຍກວ່າ 22.000 ເທື່ອຄົນ; ມາຮອດວັນທີ 21 ທັນວາປີຜ່ານມາ, ນັບລວມແລ້ວ, ທາງລົດໄຟລາວ-ຈີນໄດ້ມີຂະບວນສົ່ງສິນຄ້າ 203 ຖ້ຽວ ແລະ ຂົນສົ່ງສິນຄ້າຫຼາຍກວ່າ 5 ໝື່ນໂຕນ ພ້ອມທັງໄດ້ຮັກສາທ່ວງທ່າເພີ່ມຂຶ້ນຢ່າງໜັກແໜ້ນ. ວັນທີ 28 ທັນວາປີຜ່ານມາ, ເພື່ອຕອບສະໜອງຕາມຄວາມຕ້ອງການໃນການເດີນທາງຂອງຜູ້ໂດຍສານ, ບໍລິສັດທາງລົດໄຟລາວ-ຈີນໄດ້ເພີ່ມຖ້ຽວລົດໄຟໄປ-ກັບສະຖານີນະຄອນຫຼວວຽງຈັນ-ສະຖານີບໍ່ເຕັນໜຶ່ງຖ້ຽວ.
ການເປີດນຳໃຊ້ທາງລົດໄຟລາວ-ຈີນໄດ້ເພີ່ມພະລັງຂັບເຄື່ອນອັນແຂງແຮງໃຫ້ແກ່ການພັດທະນາປະເທດລາວ. ຕະຫຼອດໄລຍະໜຶ່ງເດືອນທີ່ເປີດນຳໃຊ້ທາງລົດໄຟລາວ-ຈີນເປັນຕົ້ນມາ, ປີ້ໂດຍສານລົດໄຟກໍຂາຍດິບຂາຍດີແທ້ໆ ເຊິ່ງໄດ້ສ່ອງແສງໃຫ້ເຫັນວ່າ: ປະຊາຊົນສອງຊາດລາວຈີນມັກຂີ່ລົດໄຟສາຍນີ້ຫຼາຍ. ການກໍ່ສ້າງແລະເປີດນຳໃຊ້ທາງລົດໄຟລາວ-ຈີນຢ່າງເປັນທາງການ, ໄດ້ກາຍເປັນຫົວຂໍ້ທີ່ປະຊາຊົນປະເທດຕ່າງໆມັກເວົ້າເຖິງເລື້ອຍໆ ໃນເວລາເຂົາເຈົ້າລົມກັນ.
ທາງລົດໄຟລາວ-ຈີນໄດ້ສ້າງຄວາມສະດວກສະບາຍມາໃຫ້ແກ່ປະຊາຊົນສອງຊາດລາວຈີນຫຼາຍແທ້ໆ, ແຕ່ການໃສ່ຮ້າຍປ້າຍສີຂອງປະເທດຕາເວັນຕົກກໍ່ເກີດຂຶ້ນເລື້ອຍໆ. ໃນໄລຍະມໍ່ໆມານີ້, ຂ່າວສານອາເປຂອງອາເມຣິກາໄດ້ລາຍງານວ່າ: ທາງລົດໄຟລາວ-ຈີນໄດ້ເຮັດໃຫ້ປະເທດລາວ “ຕິດກັບດັກໜີ້ສິນອັນມະຫາສານ” ແລະຍັງກ່າວວ່າ: ນີ້ຈະເຮັດໃຫ້ປະເທດລາວຕ້ອງອີງອາໄສປະເທດຈີນໃນດ້ານເສດຖະກິດນັບມື້ນັບຫຼາຍຂຶ້ນ ແລະ ຖືກຈີນຜູກຂາດທາງດ້ານການເມືອງ. ແຕ່ວ່າ: ປະຊາຊົນໃນໂລກຈື່ໄດ້ດີວ່າ: ແມ່ນອາເມຣິກາເອງ ເຄີຍໄດ້ຖິ້ມລູກລະເບີດ 260 ລ້ານກວ່າລູກໃສ່ດິນແດນລາວ ແລະ ເຮັດໃຫ້ປະຊາຊົນລາວ 5 ໝື່ນກວ່າຄົນເສຍຊີວິດ, ອາເມຣິກາທີ່ເຄີຍທຳຮ້າຍປະຊາຊົນລາວຢ່າງໂຫດຮ້າຍປ່າເຖື່ອນແບບນີ້, ພັດໃສ່ຮ້າຍປ້າຍສີທາງລົດໄຟລາວ-ຈີນ ເຊິ່ງແມ່ນເສັ້ນທາງທີ່ໄດ້ນຳເອົາຜົນປະໂຫຍດອັນມະຫາສານມາໃຫ້ແກ່ປະຊາຊົນສອງຊາດລາວແລະຈີນວ່າ ເປັນທາງລົດໄຟທີ່ຊົ່ວຮ້າຍ. ກ່ຽວກັບເລື່ອງນີ້, ທ່ານທອມ ໂຟດີ ນັກວິເຄາະການພົວພັນສາກົນຂອງອັງກິດໄດ້ກ່າວຢ່າງເປັນທຳວ່າ: ສື່ມວນຊົນຕາເວັນຕົກພວມສົ່ງຂໍ້ມູນອັນແປກປະຫຼາດໃຫ້ແກ່ປະຊາຊົນລາວ, ນັ້ນກໍຄື: “ຜູ້ທີ່ຖິ້ມລະເບີດໃສ່ປະເທດລາວພັດທສ້າງພາບພັດວ່າເປັນເພື່ອນມິດ, ແຕ່ຜູ້ທີ່ສ້າງທາງລົດໄຟພັດຖືກໃສ່ຮ້າຍວ່າເປັນສັດຕູ”. ທັດສະນະອັນແປກປະຫຼາດ ແລະ ການລາຍງານຂ່າວແບບບິດເບືອນຄວາມຈິງແບບນີ້ໄດ້ສ່ອງແສງໃຫ້ເຫັນເຖິງຄວາມຈອມປອມຂອງປະເທດຕາເວັນຕົກລ້ວນໆ.
ໃນອະດີດ, ຍ້ອນການກໍ່ສ້າງພື້ນຖານໂຄງລ່າງໃນປະເທດລາວຍັງບໍ່ທັນສະໄໝ, ການພັດທະນາອຸດສາຫະກຳໃນປະເທດລາວກໍ່ຈິ່ງບໍ່ໄວ. ແຕ່ຄຽງຄູ່ກັບການເປີດນຳໃຊ້ທາງລົດໄຟລາວ-ຈີນ, ໂດຍອີງໃສ່ການພັດທະນາການບໍລິການດ້ານການຈໍຂົນສົ່ງສິນຄ້າທີ່ມີປະສິດທິພາບສູງ, ປະເທດລາວສາມາດພັດທະນາໃຫ້ເປັນສູນກາງຈໍລະຈອນສິນຄ້າຂອງພາກພື້ນ. ການລົງທຶນໃນຂະແໜງການກະສິກຳ ແລະ ທ່ອງທ່ຽວ ກໍຈະສ້າງໂອກາດໃໝ່ສຳລັບການສົ່ງອອກໃຫ້ແກ່ປະເທດລາວ. ໃນຂະນະດຽວກັນ, ຂະແໜງການທ່ອງທ່ຽວຢູ່ລຽບຕາມທາງລົດໄຟລາວ-ຈີນ ກໍຈະກ້າວເຂົ້າສູ່ໄລຍະພັດທະນາຢ່າງວ່ອງໄວ. ອີງຕາມການຄາດຄະເນຂອງທະນາຄານໂລກ, ໃນອະນາຄົດ, ແຕ່ລະປີຈະມີປະຊາຊົນລາວ 4 ລ້ານເທື່ອຄົນ ແລະ ນັກທ່ອງທ່ຽວປະເທດອ້ອມຂ້າງ 10 ລ້ານກວ່າເທື່ອຄົນໃຊ້ບໍລິການຂອງທາງລົດໄຟລາວ-ຈີນ.
ຄືດັ່ງຄຳເວົ້າຂອງທ່ານພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ໃຫ້ສຳພາດຕໍ່ສື່ມວນຊົນໃນໄລຍະມໍ່ໆມານີ້ວ່າ: ຖ້ອຍຄຳ “ທາງລົດໄຟລາວ-ຈີນຈະເຮັດໃຫ້ປະເທດລາວຕົກເຂົ້າສູ່ກັບດັກໜີ້ສິນ” ນັ້ນ ເປັນການໃສ່ຮ້າຍປ້າຍສີລ້ວນໆ. ສ່ວນທາງລົດໄຟລາວ-ຈີນດີຫຼືບໍ່ດີສົມຄວນໃຫ້ປະຊາຊົນສອງຊາດລາວແລະຈີນເປັນຜູ້ເວົ້າຈະດີກວ່າ.
ຄຳເຫັນ
0