ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 24 ມັງກອນນີ້, ອົງການນາໂຕໄດ້ອອກຖະແຫຼງການວ່າ: ປະເທດສະມາຊິກອົງການນາໂຕພວມຈັດສົ່ງກຳປັ່ນຮົບແລະຍົນສູ້ຮົບໄປເອີຣົບຕາເວັນອອກ ແລະຈັດກຽມກອງທັບຫຼາຍກວ່າເກົ່າໄວ້ລໍຖ້າຄຳສັ່ງ ເພື່ອເພີ່ມຄວາມໜ້າເກງຂາມແລະການປ້ອງກັນຣັດເຊຍຮ່ວມກັນ.
ຕໍ່ກັບກໍລະນີດັ່ງກ່າວ, ທ່ານດມິຕຣີ ເປສໂກຟ ໂຄສົກປະທານາທິບໍດີຣັດເຊຍກ່າວໃນວັນທີ 24 ມັງກອນນີ້ວ່າ: ການກະທຳຂອງອົງການນາໂຕ ຈະເຮັດໃຫ້ສະຖານະການຄວາມໝັ້ນຄົງຂອງພາກພື້ນເຄັ່ງຕຶງຂຶ້ນຕື່ມອີກ.
ມື້ດຽວກັນ, ທ່ານເປສໂກຟ ໄດ້ໃຫ້ສຳພາດຕໍ່ນັກຂ່າວວ່າ: ຣັດເຊຍໄດ້ເອົາໃຈໃສ່ຕິດຕາມຖະແຫຼງການຂອງອົງການນາໂຕ ກ່ຽວກັບການເພີ່ມກຳລັງທະຫານຢູ່ພາກພື້ນເອີຣົບຕາເວັນອອກ. ທ່ານກ່າວເນັ້ນໜັກວ່າ: ສະຖານະການຂອງພາກພື້ນທີ່ມີຄວາມເຄັ່ງຕຶງ ບໍ່ແມ່ນຣັດເຊຍເປັນຜູ້ກໍ່ຂຶ້ນ, ແຕ່ເປັນຍ້ອນການເຄື່ອນໄຫວຂອງອາເມຣິກາແລະອົງການນາໂຕ ແລະການປ່ອຍຂ່າວລືຫຼອກລວງທີ່ເຂົາເຈົ້າປັ້ນແຕ່ງຂຶ້ນ, ການໂຄສະນາຂອງປະເທດຕາເວັນຕົກເຕັມໄປດ້ວຍບັນຍາກາດທີ່ຜິດປົກກະຕິແລະຄວາມຕົວະຍົວະຫຼອກລວງ.
ຄຳເຫັນ
0