ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າຂອງວັນທີ 30 ມັງກອນນີ້, ສູນກາງພັກກອມມູນິດຈີນ ແລະ ລັດຖະບານຈີນ ໄດ້ຈັດພິທີອວຍພອນປີໃຫມ່ 2022 ຢູ່ຫໍສະພາປະຊາຊົນແຫ່ງຊາດ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ, ປະທານ ຄະນະກຳມະການການທະຫານສູນກາງຈີນ ໄດ້ກ່າວຄຳອວຍພອນປີໃຫມ່ ເພື່ອສົ່ງພອນໄຊ ອັນປະເສີດໄປຍັງປະຊາຊົນບັນດາເຜົ່າທົ່ວປະເທດ, ພີ່ນ້ອງຮ່ວມຊາດເຂດບໍລິຫານພິເສດ ຮົງກົງ, ພີ່ນ້ອງຮ່ວມຊາດຂດບໍລິຫານພິເສດມາກາວ, ພີ່ນ້ອງຮ່ວມຊາດໄຕ້ຫວັນ ແລະ ຊາວຕ່າງປະເທດເຊື້ອສາຍຈີນແລະຊາວຈີນຕ່າງດ້າວ ໂດຍຕາງຫນ້າໃຫ້ແກ່ສູນກາງພັກ ກອມມູນິດຈີນ ແລະ ລັດຖະບານຈີນ.
ທ່ານສີຈິ້ນຜິງ ກ່າວເນັ້ນວ່າ: ໃນຫນຶ່ງຮ້ອຍປີຜ່ານມາ, ພັກກອມມູນິດຈີນໄດ້ຍື່ນ ໃບຕອບຂໍ້ສອບໃຫ້ແກ່ປະຊາຊົນ ແລະ ໃຫ້ແກ່ປະຫວັດສາດທີ່ດີເດັ່ນສະບັບຫນຶ່ງ. ໃນ 6 ເດືອນທ້າຍປີນີ້, ພັກກອມມູນິດຈີນຈະຈັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ເພື່ອສະຫລຸບວຽກງານໃນຮອບ 5 ປີຜ່ານມາ ແລະ ວາງແຜນພັດທະນາສຳລັບໄລຍະຕໍ່ຫນ້ານີ້. ພວກເຮົາຕ້ອງວາງແຜນຢ່າງເປັນເອກະພາບໃນ ສະຖານະການໂດຍລວມທັງພາຍໃນແລະຕ່າງປະເທດ, ຕ້ອນຮັບການໄຂກອງປະຊຸມຜູ້ແທນ ທົ່ວປະເທດຄັ້ງທີ 20 ຂອງພັກກອມມູນິດຈີນຢ່າງມີໄຊ ດ້ວຍການກະທຳຕົວຈິງ.
ທ່ານສີຈິ້ນຜິງ ຍັງກ່າວຕື່ມວ່າ: ງານກິລາໂອລິມປິກລະດູຫນາວປັກກິ່ງ ແລະ ງານກິລາໂອລິມປິກຄົນພິການລະດູຫນາວປັກກິ່ງຈະຈັດຂຶ້ນແລ້ວໃນອີກບໍ່ເທົ່າໃດມື້, ປະຊາ ຊົນຈີນກໍໄດ້ກຽມຄວາມພ້ອມຢ່າງຮຽບຮ້ອຍແລ້ວ ເຊິ່ງຈະຈັດງານມະໂຫລານໂອລິມປິກຄັ້ງ ຫນຶ່ງທີ່ກະທັດຮັດງ່າຍດາຍ, ປອດໄພ ແລະ ຫນ້າຊົມໃຫ້ແກ່ໂລກ, ຂໍອວຍພອນໃຫ້ນັກກິລາ ທັງພາຍໃນແລະຕ່າງປະເທດຈົ່ງຊີງໄດ້ຜົນງານດີເດັ່ນໃນງານກິລາໂອລິມປິກລະດູຫນາວຄັ້ງນີ້.
ຄຳເຫັນ
0