ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 3 ກຸມພານີ້, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານເຊີເກ ລັຟຣົຟ ລັດຖະມົນຕີກະຊວງການຕ່າງປະເທດຣັດເຊຍ.
ທ່ານຫວາງຢີ້ກ່າວວ່າ, ວັນທີ 4 ກຸມພານີ້, ທ່ານສີຈິ້ນຜິງປະທານປະເທດຈີນຈະພົບປະກັບ ທ່ານວຼາຕີເມຍ ປູຕິນ ປະທານາທິບໍດີຣັດເຊຍແບບອອຟລາຍເປັນຄັ້ງທຳອິດໃນ 2 ປີກວ່າມານີ້, ເພື່ອວາງແຜນການພັດທະນາການພົວພັນຈີນ-ຣັດເຊຍໃນໄລຍະຫຼັງການແຜ່ລະບາດຂອງພະຍາດໂຄວິດ-19. ນີ້ໄດ້ສະແດງໃຫ້ເຫັນເຖິງການຮ່ວມມືດ້ານຍຸດທະສາດລະຫວ່າງສອງປະເທດໄດ້ຢູ່ໃນລະດັບສູງ, ທັງສ່ອງແສງໃຫ້ເຫັນເຖິງຄວາມໄວ້ເນື້ອເຊື່ອໃຈກັນໃນລະດັບສູງ ແລະ ມິດຕະພາບລະຫວ່າງປະມຸກລັດສອງປະເທດ. ສອງຝ່າຍມີຄວາມໝັ້ນໃຈທີ່ເດັດດ່ຽວໜຽວແໜ້ນກວ່າເກົ່າເພື່ອປົກປ້ອງຜົນປະໂຫຍດຮ່ວມ, ມີໝາກຜົນທີ່ອຸດົມສົມບູນກວ່າເກົ່າໃນການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ມີມາດຕະການທີ່ມີປະສິດທິຜົນຫຼາຍກວ່າເກົ່າໃນການຮັບມືກັບຄວາມສ່ຽງ ແລະ ສິ່ງທ້າທາຍ, ຈີນຍິນດີຮ່ວມກັບຣັດເຊຍ ຖືເອົາການຈັດຕັ້ງປະຕິບັດຄວາມເຫັນທີ່ເປັນເອກະພາບກັນຂອງປະມຸກລັດສອງປະເທດ ໃຫ້ເປັນຮູບປະທຳນັ້ນເປັນທິດຊີ້ນຳ, ລົງເລິກມິດຕະພາບອັນເປັນມູນເຊື້ອມາທຸກເຊັ່ນຄົນ ແລະ ການປະສານງານດ້ານຍຸດທະສາດຮອບດ້ານລະຫວ່າງສອງປະເທດຢ່າງບໍ່ຫວັ່ນໄຫວຄອນແຄນ, ປົກປັກຮັກສາຄວາມຍຸຕິທຳ ແລະ ຄວາມເປັນທຳໃນສາກົນຢ່າງເດັດດ່ຽວ, ສ້າງຄວາມສຸກໃຫ້ກັບປະຊາຊົນສອງປະເທດ ກໍຄືປະຊາຊົນຂອງໂລກໃຫ້ຫຼາຍກວ່າເກົ່າ.
ທ່ານເຊີເກ ລັຟຣົຟກ່າວວ່າ, ຣັດເຊຍ ແລະ ຈີນດຳເນີນການປະສານງານຍຸດທະສາດໃນລະດັບສູງ ແລະ ປະສານສົມທົບກັນຢ່າງໃກ້ຊິດແມ່ນຄວາມຮັບຮູ້ທີ່ເປັນເອກະພາບກັນລະຫວ່າງສອງຝ່າຍ, ບໍ່ໄດ້ຮັບຜົນກະທົບຈາກສະຖານະການທາງການເມືອງໃນສາກົນ. ຣັດເຊຍຍິນດີຮ່ວມມືກັບຈີນ ເພີ່ມທະວີການເຊື່ອມຕໍ່ ສະຫະພັນເສດຖະກິດເອີຣົບອາຊີ ແລະ ການສ້າງ “ໜຶ່ງແລວໜຶ່ງເສັ້ນທາງ”, ເປີດກວ້າງຜົນປະໂຫຍດຮ່ວມຂອງສອງຝ່າຍ.
ສອງຝ່າຍມີຈຸດຢືນເປັນເອກະພາບກັນວ່າຕ້ອງປົກປັກຮັກສາສັນຕິພາບ ແລະ ສະຖຽນລະພາບຢູ່ພາກພື້ນອາຊີປາຊີຟິກ, ຄັດຄ້ານເຈດຕະນາໃດໆທີ່ກໍ່ການເປັນປໍລະກັນລະຫວ່າງກຸ່ມປະເທດ, ສອງຝ່າຍເຫັນດີດຳເນີນການປະສານງານ ແລະ ການປະສານສົມທົບກັນໃນອົງການຮ່ວມມືຊຽງໄຮ ແລະ ອົງການສົນທິສັນຍາຄວາມໝັ້ນຄົງລວມໝູ່, ຮ່ວມກັນຊຸກຍູ້ສັນຕິພາບ ແລະ ສະຖຽນລະພາບຢູ່ອັຟການິດສະຖານ, ສອງຝາຍຍັງເຫັນດີລົງເລິກການແລກປ່ຽນ ແລະ ການຮ່ວມມືໃນຂອບອົງການຮ່ວມມືຊຽງໄຮ, ປະເທດບຣິກສ, ຈີນ-ຣັດເຊຍ-ອິນເດຍ, ອົງການສະຫະປະຊາຊາດ ແລະອື່ນໆ, ຮ່ວມກັນປົກປັກຮັກສາຫຼັກການດ້ານການພົວພັນສາກົນ, ຄວາມໝັ້ນຄົງໃນພາກພື້ນ ແລະສາກົນ.
ຄຳເຫັນ
0