ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ການແຂ່ງຂັນລາຍການຕ່າງໆຂອງງານກິລາໂອລິມປິກລະດູໜາວປັກກິ່ງພວມດຳເນີນໄປຢ່າງຂ້ຽວຂາດ, ໃນຖານະເປັນງານມະໂຫລານດ້ານກິລາ, ງານກິລາໂອລິມປິກລະດູໜາວປັກກິ່ງຍັງໄດ້ດຶງດູດຄວາມສົນໃຈຈາກທົ່ວໂລກ ຍ້ອນວ່າການຈັດງານແມ່ນໄດ້ໃຊ້ວິທະຍາສາດເຕັກນິກຂັ້ນສູງຫຼາຍຢ່າງ.
ໃນງານກິລາໂອລິມປິກລະດູໜາວປັກກິ່ງຄັ້ງນີ້, ຄົນທັງຫຼາຍສາມາດຮັບຊົມລີລາແລະຄວາມໄວຂອງກິລາຫິມະແລະນ້ຳກ້ອນລາຍການຕ່າງໆໄດ້ຢ່າງສົມໃຈຜ່ານການຖ່າຍທອດສົດ, ສາມາດຮັບຊົມຄວາມກະຕືລືລົ້ນແລະມິດຕະພາບລະຫວ່າງນັກກິລາທັງຫຼາຍ. ແຕ່ນອກຈາກນີ້ແລ້ວ, ງານກິລາໂອລິມປິກລະດູໜາວປັກກິ່ງຄັ້ງນີ້ຍັງໄດ້ນຳໃຊ້ວິທະຍາສາດເຕັກນິກຂັ້ນສູງແລະໃໝ່ຫຼາຍຢ່າງ ໂດຍໄດ້ປະຕິບັດຕາມແນວຄວາມຄິດການຈັດງານໂອລິມປິກຕາມທິດສີຂຽວ ແລະ ກາກບອນຕ່ຳ. ໃນຂະນະທີ່ຈັດງານໂອລິມປິກລະດູໜາວໃຫ້ດີ, ຍັງໄດ້ເຮັດໃຫ້ງານກິລາໂອລິມປິກຄັ້ງນີ້ກາຍເປັນງານວາງສະແດງດ້ານວິທະຍາສາດເຕັກນິກຂັ້ນສູງແລະໃໝ່ອີກດ້ວຍ.
ທວນໄຟສຳລັບງານກິລາໂອລິມປິກລະດູໜາວປັກກິ່ງເປັນທວນໄຟທີ່ໃຊ້ເຊື້ອໄຟຮີໂດຣແຊນເປັນຄັ້ງທຳອິດໃນປະຫວັດສາດຂອງງານກິລາໂອລິມປິກລະດູໜາວ, ວິທະຍາສາດເຕັກນິກການບິນອະວະກາດຈີນໄດ້ຊ່ວຍແກ້ໄຂບັນຫາຫຍຸ້ງຍາກໃນການນຳໃຊ້ເຊື້ອໄຟຮີໂດຣແຊນ ເຊັ່ນ: ບໍ່ຫ້ມັນລະເບີດ, ຮົ່ວໄຫຼ ແລະ ຄວບຄຸມຍາກ ເຊິ່ງໄດ້ບັນລຸການເປົ້າໝາຍການນຳໃຊ້ທວນໄຟທີ່ລະບາຍກາກບອນດິອັອກຊິດເປັນຄັ້ງທຳອິດໃນປະຫວັດສາດງານກິລາໂອລິມປິກລະດູໜາວ.
ບໍ່ວ່າຢູ່ສະໜາມແຂ່ງຂັນ ຫຼືບ້ານພັກນັກກິລາງານກິລາໂອລິມປິກລະດູໜາວປັກກິ່ງ, ຫຸ່ນຍົນອັດສະລິຍະຈະປະກົດໃຫ້ເຫັນຢູ່ເລື້ອຍໆ, ພວກມັນໄດ້ແລ່ນໄປມາຢູ່ຫົນທາງທຸກສາຍ, ອະນາໄມຄວາມສະອາດ, ຂ້າເຊື້ອ, ປຸງແຕ່ງອາຫານ, ສົ່ງອາຫານ ແລະ ອື່ນໆ. ໃນໂຮງອາຫານສຳລັບນັກກິລາໂອລິມປິກລະດູໜາວປັກກິ່ງ, ມີລະບົບບໍລິການສັ່ງອາຫານແບບອັດຕະໂນມັດຕະຫຼອດ 24 ຊົ່ວໂມງ, ອຸປະກອນປຸງແຕ່ງອາຫານແບບອັດຕະໂນມັດສາມາດປຸງແຕ່ງອາຫານໄດ້ 10 ກວ່າຊະນິດ ເຊັ່ນ: ແຮມເບີເກີ, ຂະໜົມກ້ຽວ, ຂົ້ວຜັກເປັນຕົ້ນ, ສ່ວນອາຫານທີ່ປຸງແຕ່ງຮຽບຮ້ອຍແລ້ວ, ຈະຜ່ານຈາກ “ລະບົບຂົນສົ່ງເທິງເພດານ” ສົ່ງໄປເຖິງໜ້າໂຕະຂອງຜູ້ສັ່ງອາຫານ. ຫຸ່ນຍົນຍັງສາມາດປຸງແຕ່ງເຫຼົ້າຄັອກເທວຈອກໜຶ່ງໃຊ້ເວລາພຽງແຕ່ 5 ວິນາທີ, ເຮັດໃຫ້ນັກກິລາທັງຫຼາຍພາກັນຖ່າຍຮູບ, ທ້າວວິນລຽມ ດາວກລາສ ຊາວເນັດອັງກິດກ່າວວ່າ: “ຫຸ່ນຍົນໂຕນີ້ມັນທັງໜ້າຮັກທັງສະຫຼາດ, ໂດຍສະເພາະແມ່ນໃນຍາມເຮັດເຫຼົ້າຄອກເທວ.”
ສະໜາມແຂ່ງຂັນກິລາຂອງງານກິລາໂອລິມປິກລະດູໜາວປັກກິ່ງກໍໄດ້ນຳໃຊ້ວິທະຍາສາດຂັ້ນສູງແລະໃໝ່ຫຼາຍຢ່າງເຊັ່ນກັນເຊັ່ນ: ເຕັກນິກເຮັດນ້ຳກ້ອນດ້ວຍກາກບອນດິອັອກຊິດໂດຍກົງຢູ່ສະໜາມແຂ່ງຂັນກິລາສະເກັດຄວາມໄວແຫ່ງຊາດຈີນ, ໂດຍໃຊ້ວິທີການວາງເຫຼັກສະແຕນເລດຢູ່ໃຕ້ພື້ນນ້ຳກ້ອນ, ເຮັດໃຫ້ອຸນຫະພູມຂອງໜ້ານ້ຳກ້ອນບໍ່ຫຼຸດລື່ນ 0,5 ອົງສາ ເຊິ່ງໄດ້ກາຍເປັນນ້ຳກ້ອນທີ່ສົມບູນທີ່ສຸດ ແລະ ສະໝ່ຳສະເໝີທີ່ສຸດ, ໄດ້ເຮັດໃຫ້ນັກກິລາທັງຫຼາຍສາມາດສະແດງລີລາຂອງຕົນໄດ້ເຖິງສຸດສີມື. ສະໜາມກິລາລອຍນ້ຳ “ຮູບຈະຕຸລັດ” ຖືກດັດແປງໃຫ້ກາຍມາເປັນສະໜາມກິລາ “ນ້ຳກ້ອນຈະຕຸລັດ” ເຮັດໃຫ້ສະໜາມກິລາລອຍນ້ຳແຫ່ງຊາດຈີນກາຍເປັນສະໜາມກິລານ້ຳກ້ອນແຫ່ງຊາດຈີນ ແລະ ກໍຍັງສາມາດດັດແປງໃຫ້ກາຍມາເປັນສະໜາມກິລາລອຍນ້ຳຄືນໃໝ່ໄດ້ອີກ ດ້ວຍການນຳໃຊ້ເຕັກນິກຂັ້ນສູງແລະໃໝ່ ເຊິ່ງແມ່ນແບບຢ່າງທີ່ດີເດັ່ນຂອງຈີນໃນການນຳໃຊ້ສະໜາມກິລາໂອລິມປິກແບບຍືນຍົງ. “ລານສະກີໂດດທີ່ສວນໂສກ່າງ” ທີ່ສ້າງຂຶ້ນຢູ່ໂຮງງານຜະລິດເຫຼັກແລະເຫຼັກກ້າຮ້າງໂສກ່າງໃນນະຄອນຫຼວງປັກກິ່ງ ໄດ້ນຳໃຊ້ເຫຼັກກ້າແບບໃໝ່ທີ່ທົນຕໍ່ຄວາມໜາວ ແລະ ທົນຕໍ່ການກັດເຊາະຈາກສານລະລາຍຫິມະໄດ້ເປັນຢ່າງດີທີ່ຖືກຄົ້ນຄວ້າຜະລິດອອກມາໃໝ່, ທັງມີຄວາມປອດໄພ ທັງເປັນມິດຕໍ່ສິ່ງແວດລ້ອມ. “ໜັງສືພິມເວທີປຶກສາຫາລືຊີກາໂກ” ຂອງອາເມຣິກາສະບັບວັນທີ 7 ກຸມພານີ້ໄດ້ລົງພິມບົດຄວາມວ່າ: “ຢູ່ນະຄອນຫຼວງປັກກິ່ງ, ໂຮງງານຜະລິດເຫຼັກກ້າຮ້າງແຫ່ງໜຶ່ງໄດ້ນຳໃຊ້ “ທໍ່ຄວັນຮ້າງໄດ້ຢ່າງອັດສະຈັນ” ສົ່ງນັກກິລາສະກີສະແດງລີລາຢູ່ກາງເວຫາ. ເພື່ອສະທ້ອນໃຫ້ເຫັນເຖິງການຍ້ອງຍໍສັນລະເສີນລານສະກີໂດດທີ່ມີເອກະລັກພິເສດຢູ່ສວນໂສກ່າງ.
ນອກຈາກນີ້ແລ້ວ, ການນຳໃຊ້ເຕັກນິກຂັ້ນສູງແລະໃໝ່ຫຼາຍຢ່າງໃນການຊຳລະຂີ້ເຫຍື້ອແລະນ້ຳເປື້ອນໃນງານກິລາໂອລິມປິກລະດູໜາວປັກກິ່ງຄັ້ງນີ້, ຍັງມີເຕັກນິກທີ່ນຳໃຊ້ພະລັງງານສີຂຽວ ແລະ ພາຫະນະດ້ານຄົມມະນາຄົມທີ່ປ່ອຍກາກບອນຕ່ຳເປັນຕົ້ນ ເຊິ່ງໄດ້ເຮັດໃຫ້ງານກິລາໂອລິມປິກລະດູໜາວປັກກິ່ງກາຍເປັນງານກິລາໂອລິມປິກລະດູໜາວທີ່ “ເປັນມິດຕໍ່ສິ່ງແວດລ້ອມທີ່ສຸດ” ໃນປະຫວັດສາດງານກິລາໂອລິມປິກລະດູໜາວ. ງານມະໂຫລານດ້ານກິລາຄັ້ງນີ້ເປັນການໂຮມສູນວາງສະແດງແລະນຳໃຊ້ວິທະຍາສາດເຕັກນິກຂັ້ນສູງແລະໃໝ່ຂອງຈີນ, ສະນັ້ນ, ຈິ່ງຖືໄດ້ວ່າ: ເປັນ “ງານວາງສະແດງດ້ານວິທະຍາສາດເຕັກນິກ” ທີ່ແທ້ຈິງຄັ້ງໜຶ່ງ.
ຄຳເຫັນ
0