ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 14 ກຸມພານີ້ຕາມເວລາທ້ອງຖິ່ນ, ທ່ານອັນໂຕນີໂອ ກູເຕີເລສ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການຢູ່ສຳນັກງານໃຫຍ່ອົງການສະຫະປະຊາຊາດ, ໂດຍໄດ້ຮຽກຮ້ອງໃຫ້ຝ່າຍຕ່າງໆແກ້ໄຂສະຖານະການຄວາມເຄັ່ງຕຶງລະຫວ່າງຣັດເຊຍ ແລະອູແກຼນໃນປັດຈຸບັນນີ້ດ້ວຍວິທີທາງການທູດ.
ທ່ານອັນໂຕນີໂອ ກູເຕີເລສກ່າວວ່າ: ທ່ານເປັນຫ່ວງເປັນໃຍທີ່ສຸດກ່ຽວກັບສະຖານະການຢູ່ເອີຣົບທີ່ມີຄວາມເຄັ່ງຕຶງຂຶ້ນຕື່ມ ແລະການຄາດຄະເນເຖິງການປະທະກັນທາງການທະຫານໄດ້ເພີ່ມຂຶ້ນ. ທ່ານກ່າວຕື່ມວ່າ: ການເປັນປໍລະປັກກັນກ່ຽວກັບບັນຫາອູແກຼນຈະນຳເອົາຄວາມເສຍຫາຍທີ່ຄາດຄິດບໍ່ເຖິງມາໃຫ້ກັບຄວາມໝັ້ນຄົງຂອງເອີຣົບ ແລະທົ່ວໂລກ.
ທ່ານໄດ້ຮຽກຮ້ອງໃຫ້ບັນດາປະເທດຈົ່ງເຄົາລົບກົດບັດອົງການສະຫະປະຊາດຢ່າງເຕັມທີ່, ຜ່ອນຄາຍສະຖານະການທີ່ມີຄວາມເຄັ່ງຕຶງ ແລະມີການປະຕິບັດຕົວຈິງໄປພ້ອມ.
ທ່ານອັນໂຕນີໂອ ກູເຕີເລສກ່າວຕື່ມວ່າ: ບໍ່ຄວນມີຄຳເວົ້າທີ່ມີລັກສະນະປຸກປັ່ນ. ຈຸດປະສົງຂອງຄຳຖະແຫຼງການຂອງບັນດາປະເທດທີ່ເປີດເຜີຍມານັ້ນຄວນແມ່ນການຜ່ອນຄາຍສະຖານະການທີ່ມີຄວາມເຄັ່ງຕຶງ, ຫາກບໍ່ແມ່ນເພື່ອຫວັງປຸກປັ່ນສະຖານະການມີຄວາມເຄັ່ງຕຶງຂຶ້ນຕື່ມ. ທ່ານໄດ້ສະແດງຄວາມຊົມເຊີຍການໄກ່ເກ່ຍ ແລະການຕິດຕໍ່ພົວພັນກັນທາງດ້ານການຕ່າງປະເທດໃນຫວ່າງມໍ່ໆມານີ້, ລວມທັງການພົບປະກັນລະຫວ່າງບັນດາປະມຸກລັດ, ແຕ່ຍັງຕ້ອງມີການເຄື່ອນໄຫວຫຼາຍກວ່າເກົ່າ.
ຄຳເຫັນ
0